អាគារសិក្សាថ្មីមួយខ្នង មាន៥បន្ទប់ ដែលស្ថិតនៅភូមិធម្មជាតិរុនតាឯក នៃសាលាបឋមសិក្សាជាលាធំ ត្រូវបានសម្ពោធដាក់ឱ្យប្រើប្រាស់ជាផ្លូវការនាព្រឹកថ្ងៃទី២៣ ខែមករា ឆ្នាំ២០១៩ ក្រោមអធិបតីភាពឯកឧត្តមខូយ គឹមទួ ទីប្រឹក្សាអាជ្ញាធរជាតិអប្សរា និងជាតំណាងឯកឧត្តម ស៊ុ ម៉ាប់ អគ្គនាយកអាជ្ញាធរជាតិអប្សរា ព្រមទាំងថ្នាក់ដឹកនាំអាជ្ញាធរជាតិអប្សរា តំណាងម្ចាស់ជំនួយនៃអង្គការ ARK Beautiful Earth of Children លោក Kiyoshi MATSUMOTO លោកគ្រូអ្នកគ្រូ សិស្សានុសិស្ស ព្រះសង្ឃ អាជ្ញាធរមូលដ្ឋាន និងប្រជាពលរដ្ឋប្រមាណ៥០០នាក់ ។
ថ្លែងទៅកាន់អង្គពិធីនោះឯកឧត្តមខូយ គឹមទួ បានលើកឡើងថា ការចូលរួមអភិវឌ្ឍន៍វិស័យអប់រំដែលជាកិច្ចការសំខាន់មួយរបស់យើងគ្រប់គ្នាក្នុងការរួមចំណែកជាមួយ រាជរដ្ឋាភិបាលកម្ពុជា ។ កន្លងមកអាជ្ញាធរជាតិអប្សរាមានកិច្ចសហការល្អជាមួយសប្បុរសជនបណ្តាប្រទេសជាច្រើន និងទាំងថ្នាក់ជាតិ ថ្នាក់អន្តរជាតិ តាមរយៈការជួយគាំទ្រជាសម្ភារៈ ថវិកា និងស្មារតី ដើម្បីជួយអភិវឌ្ឍន៍វិស័យអប់រំជាបន្តបន្ទាប់ ក្នុងការកាត់បន្ថយភាពក្រីក្ររបស់ប្រជាពលរដ្ឋ និងជំរុញការលើកកម្ពស់ធនធានមនុស្សឲ្យដល់មូលដ្ឋាន ។
លោក Kiyoshi MATSUMOTO តំណាងឱ្យអង្គការ ARK Beautiful Earth of Children ក្នងនាមម្ចាស់ជំនួយមានប្រសាសន៍ថា បេតិកភណ្ឌវប្បធម៌អង្គរ គឺជាសម្បត្តិបេតិកភណ្ឌពិភពលោកដ៏សំខាន់បំផុត ហើយមានតម្លៃខ្ពង់ខ្ពស់សម្រាប់ពិភពលោក។ ដូច្នេះកុមារដែលមានដើមកំណើត និងបានធំធាត់នៅក្នុងតំបន់បេតិកភណ្ឌគួរតែត្រូវបានទទួលនូវការអប់រំជាមួយនឹងបេតិកភណ្ឌវប្បធម៌របស់គាត់ និងអភិវឌ្ឍអនាគតរបស់ពួកគេឱ្យកាន់តែប្រសើរ ។ លោកបន្ថែមថា ការចូលរួមសង់អាគារសិក្សាថ្មីនេះ ជាកិត្តិយសដ៏អស្ចារ្យ របស់លោក ដែលអាចធ្វើសហប្រតិបត្តិការដើម្បីកែលម្អស្ថានភាពអប់រំរបស់កុមារនៅក្នុងតំបន់បេតិកភណ្ឌពិភពលោកឱ្យកាន់តែប្រសើរឡើង៕
អត្ថបទ និងរូបភាព លោកអុិន សីហរីទ្ធ
កែសម្រួលដោយ លោក លីវ សុខុន !!!
