ក្នុងរយៈពេល៣ថ្ងៃ គឺចាប់ពីថ្ងៃទី២២ ដល់ថ្ងៃទី២៤ ខែមករា ឆ្នាំ២០១៩នេះ ស្ថាប័នធានាគុណភាពជប៉ុន ហៅកាត់ថា JQA (Japan Quality Assurance) បាននឹងកំពុងបើកសវនកម្មផ្ទៃក្រៅលើកទី១ លើប្រព័ន្ធគ្រប់គ្រងបរិស្ថាន ISO 14001: 2015 លើកទី១ ដែលគ្រប់គ្រងដោយអាជ្ញាធរជាតិអប្សរា នៅស្នាក់ការអាជ្ញាធរជាតិអប្សរា ដើម្បីបញ្ជាក់នូវភាពអនុលោមជាប្រចាំថ្ងៃ នៃប្រព័ន្ធគ្រប់គ្រងបរិស្ថាន នៅក្នុងរយៈពេលនៃសុពលភាព៣ឆ្នាំ នៃស្ដង់ដា ISO14001: 2015 បន្ដពីសវនកម្មឆ្នាំទៅមិញ។
លោក ម៉ាម៉ូរុ យ៉ាម៉ាដា តំណាងស្ថាប័ន JQA និងជាសវនករ បានបញ្ជាក់ថា ចំណុចយកចិត្តទុកដាក់នៅពេលធ្វើសវនកម្មជាថ្មីនេះ មាន៥ចំណុច គឺ
ទី១. ប្រសិទ្ធភាពនៃប្រព័ន្ធគ្រប់គ្រងបរិស្ថានទាំងមូល ឆ្លើយតបនឹងសភាពការប្រែប្រួលផ្ទៃក្រៅ និងផ្ទៃក្នុង ។
ទី២. ភាពទាក់ទងគ្នាជាប្រចាំ ព្រមទាំងលក្ខណៈអាចអនុវត្តបាននៃប្រព័ន្ធគ្រប់គ្រងបរិស្ថានឆ្លើយតបនឹងវិសាលភាពនៃ វិញ្ញាបនប័ត្រ ។
ទី៣. ប្រសិទ្ធភាពនៃប្រព័ន្ធគ្រប់គ្រងបរិស្ថាន ព្រមជាមួយការចាត់ចែងបន្ដការកែលម្អ ។
ទី៤. អំណោយផលនៃការអនុវត្តប្រព័ន្ធគ្រប់គ្រងទៅលើការសម្រេចគោលនយោបាយបរិស្ថាន និងគោលដៅបរិស្ថាន របស់ស្ថាប័។
ទី៥. សវនកម្មលើកនេះ នឹងពិនិត្យអំពីស្ថានភាពកែលម្អជាប្រចាំតាមរយៈការបង្វិលកង PDCA (Plan, Do, Check, Act)។
មានប្រសាសន៍ក្នុងឱកាសនោះដែរ ឯកឧត្តម សុខ លក្ខិណា ប្រធានអង្គភាពប្រព័ន្ធគ្រប់គ្រងបរិស្ថាន នៃអាជ្ញាធរជាតិអប្សរា បានសម្ដែងអារម្មណ៍រីករាយ និងកោតសរសើរចំពោះការចូលរួមរបស់មន្ត្រីជំនាញ ដែលជាសេនាធិការតាមនាយកដ្ឋានទាំងអស់នៃអាជ្ញាធរជាតិអប្សរា ដែលបានចូលរួមជាប្រចាំក្នុងការងារមួយនេះ ហើយបើទោះបីការធ្វើសវនកម្មថ្មីនេះមានភាពលំបាកខ្លះៗក៏ពិតមែន តែមន្ត្រីយើង បានចូលរួម និងយកចិត្តទុកដាក់ធ្វើឱ្យការងារនេះមានលទ្ធផលល្អនាពេលកន្លងមក ដូច្នេះតាមរយៈការធ្វើសវនកម្មលើកនេះរំពឹងថា មន្ត្រីជំនាញទាំងអស់ នឹងខិតខំយកចិត្តទុកដាក់ និងបន្តសហការឱ្យបានល្អជាមួយសវនករ ដើម្បីជោគជ័យថែមទៀត ក្នុងការអនុវត្តប្រព័ន្ធគ្រប់គ្រងបរិស្ថានថ្មីនេះ។
គួរបញ្ជាក់ថា នេះជាលើកទី៥ហើយ ដែលអាជ្ញាធរជាតិអប្សរាទទួលវិញ្ញាបនបត្រស្ដង់ដា ISO ខណៈ លើកទី១ នៅឆ្នាំ២០០៦ វិញ្ញាបនបត្រ ISO 14001 ដោយមានស្ថាប័នជប៉ុនទាំង៤ មាន JQA, Sophia, ISRI, JQAI នៅបន្តជួយជាបច្ចេកទេសដើម្បីជំរុញការងារប្រព័ន្ធគ្រប់គ្រងបរិស្ថាននេះឱ្យដំណើរការជាប្រក្រតី , លើកទី២ នៅឆ្នាំ២០០៩ , លើកទី៣ នៅឆ្នាំ២០១២ , លើកទី៤ នៅឆ្នាំ២០១៥ ទទួលបានវិញ្ញាបនបត្រ ISO 14001 តាមរយៈការវាយតម្លៃ និងផ្តល់វិញ្ញាបនបត្រនេះដោយស្ថាប័ន JQA និងលើកទី៥ នៅឆ្នាំ២០១៨ វិញ្ញាបនបត្រ ISO 14001:2015 តាមរយៈការវាយតម្លៃ និងផ្តល់វិញ្ញាបនបត្រនេះដោយស្ថាប័ន JQA៕
អត្ថបទ និង រូបថត : លោក ម៉ាត់ អារីហ្វីន
កែសម្រួលអត្ថបទ : លោក លីវ សាន្ត
