ដើម្បីអប់រំ កែលម្អចំណុចអសកម្ម និងជម្រុញឲ្យមន្ត្រី-រាជការ អនុវត្តអភិក្រមទាំង៥ នៃសម្តេចតេជោ ប្រមុខរាជរដ្ឋាភិបាលកម្ពុជា ការងារធ្វើអធិការកិច្ចជាការងារចាំបាច់ តែពុំមែនជាការស្រាវជ្រាវចាប់កំហុសនោះទេ។
ឯកឧត្តម រស់ វរុណ អនុរដ្ឋលេខាធិការក្រសួងមហាផ្ទៃ មានប្រសាសន៍ថា ៖ ការងារអធិការកិច្ច ដែលដឹកនាំបំពេញការងារដោយអគ្គារធិការដ្ឋានក្រសួងមហាផ្ទៃ មានគោលដៅជាចម្បង គឺការត្រួតពិនិត្យ ស្រាវជ្រាវស្វែងរកចំណុចអសកម្ម ដើម្បីផ្តល់ជូននូវការអប់រំ ណែនាំ តម្រង់ទិសដៅលើកកម្ពស់គុណភាពនិងប្រសិទ្ឌភាពការងារ អនុវត្តគោលនយោបាយវិមជ្ឈការនិងវិសហមជ្ឈការនៅថ្នាក់ក្រោមជាតិ ដែលមិនមែនស្ថិតក្នុងគោលបំណងស្វែងរកទោសកំហុសនោះទេ ។ ការងារអធិការកិច្ច ក៏ជាផ្នែកមួយជម្រុញឲ្យមន្ត្រីរាជការ យកចិត្តទុកដាក់ដល់ការអនុវត្ត អភិក្រមទាំង៥ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលពីមុនមានចំនួន៤ គឺ ងូតទឹក ឆ្លុះកញ្ចក់ ដុះក្អែល ព្យាបាល និងត្រូវបានបន្ថែមអភិក្រមទី៥ គឺ វះកាត់ ។
( សម្លេងដើម ឯកឧត្តម រស់ វរុណ )(មានក្នុងវីដេអូ)
ឯកឧត្តម មានប្រសាសន៍យ៉ាងដូច្នេះ នៅក្នុងពិធីផ្សព្វផ្សាយលទ្ធផលការងារអធិការកិច្ច កិច្ចការរដ្ឋបាល និងពន្ធនាគារ នៅសាលាខេត្តសៀមរាប នាព្រឹកថ្ងៃទី ២១ ខែមករា ឆ្នាំ២០១៩នេះ ។
ឯកឧត្តមបញ្ជាក់ទៀតថា គ្រប់បណ្តាគោលដៅនៃការចុះធ្វើអធិការកិច្ច ក្រុមការងារពិតជាមិនអាចរកឃើញចំណុចអវិជ្ជមាន ១០០% នោះទេ បើសិនជាបណ្តាអង្គភាពនោះ មានចេតនាលាក់ទុកអាថ៌កំបាំងទាំងនោះ ក៏ប៉ុន្តែទោះជាយ៉ាងនេះក្តី សូមឲ្យបណ្តាអង្គភាព ឬ បុគ្គលបម្រើអង្គភាពនោះ គប្បីភ្ញាក់រលឹក កែសម្អឡើងវិញដោយស្វ័យភាព រាល់ចំណុចអសកម្មរបស់ខ្លួន ។ បើគ្មានមនសិការក្នុងការកែលម្អ នោះទេ គឺក្រុមការងាររកឃើញចំណុចណា កែលម្អចំណុចនោះ ចំណុចណារកមិនឃើញ នៅតែបន្តអនុវត្តខុសបំពាន វាពិតជាមានគ្រោះថ្នាក់ខ្លាំងណាស់ ដល់កិច្ចដំណើរការអភិវឌ្ឍប្រទេសជាតិ ។
ឯកឧត្តម សុខ លីនណា អគ្គារធិការរង នៃអគ្គារធិការដ្ឋានក្រសួងមហាផ្ទៃ បង្ហាញឲ្យដឹងក្នុងរបាយការណ៍ ថា ៖ ក្រុមការងារអធិការកិច្ច នៃ អគ្គាធិការដ្ឋានក្រសួងមហាផ្ទៃ អស់រយៈពេល៥ថ្ងៃ កាលក្នុងសប្តាហ៍ទី២ ខែសីហា ឆ្នាំ២០១៧កន្លងទៅ បានចុះធ្វើអធិការកិច្ច កិច្ចការរដ្ឋបាល នគរបាល និង ពន្ធនាគារនៅខេត្តសៀមរាប ដោយបានកំណត់គោលដៅ គឺ នៅសាលាខេត្តសៀមរាប សាលាក្រុងសៀមរាប សាលាសង្កាត់សាលាកំរើក សាលាស្រុកសូទ្រនិគម សាលាឃុំខ្ចាស់ ពន្ធនាគារខេត្តសៀមរាប និង ផ្នែកនគរបាលនៅស្នងការដ្ឋាននគរបាលខេត្តសៀមរាប អធិការដ្ឋាននគរបាលក្រុងសៀមរាប អធិការដ្ឋាននគរបាលស្រុកសូទ្រនិគម និង ប៉ូស្ថិនគរបាលរដ្ឋបាលចំនួន៩ទៀត ចំណុះឲ្យអធិការដ្ឋានទាំងពីរ ( ក្រុងសៀមរាប និង ស្រុកសូទ្រនិគម ) នៃគោលដៅអធិការកិច្ច ។ មុននឹងឈានដល់ការផ្សព្វផ្សាយនេះ របាយការណ៍លទ្ធផលនេះ ក៏ត្រូវបានឆ្លងកាត់កិច្ចប្រជុំពិភាក្សាវាយតម្លៃយ៉ាងល្អិតល្អន់ផងដែរ និងបានធ្វើរបាយការណ៍ គោរពជូន សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចុះថ្ងៃទី១០ ខែសីហា ឆ្នាំ២០១៨ ។
ឯកឧត្តមបានបញ្ជាក់នៅក្នុងពីធីផ្សព្វផ្សាយនោះថា ក្នុងដំណើរចុះធ្វើអធិការកិច្ច ក្រុមការងារបានកំណត់វិធីសាស្ត្រចំនួណ២ គឺ ទី១ ការធ្វើសម្ភាសន៍ប្រមូលព័ត៌មាន ដោយធ្វើកំណត់ហេតុសង្ខេបជាមួយបុគ្គលជាមន្ត្រី និងអ្នកពាក់ព័ន្ធ សម្រាប់កត់សម្គាល់ ធ្វើជាអំណះអំណាង អំពីលទ្ធផលដែលបានរកឃើញ ទី២ ពិនិត្យស្រាវជ្រាវឯកសារពាក់ព័ន្ធ ដើម្បីជាមូលដ្ឋានក្នុងការផ្ទៀងផ្ទាត់ ៕
អត្ថបទ និងរូបថត៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
