ថ្នាក់ដឹកនាំ និង មន្ត្រី នៃមន្ទីរព័ត៌មានខេត្តសៀមរាប ធ្វើដំណើរទស្សនកិច្ចនៅខេត្តស្ទឹងត្រែង ដើម្បីសិក្សាស្វែងយល់ ការអភិវឌ្ឍវិស័យព័ត៌មាន របស់មន្ទីរព័ត៌មានខេត្តស្ទឹងត្រែង និងពង្រីកចំណងសាមគ្គីភាព ឱ្យកាន់តែជិតស្និទ្ឋលើវិស័យព័ត៌មានតាមបណ្ដាខេត្តរបស់កម្ពុជា។
នាល្ងាចថ្ងៃទី១៩ ខែមករា ឆ្នាំ២០១៩នេះ ឯកឧត្តម អ៊ុក ធាវី ទីប្រឹក្សាអមក្រសួងព័ត៌មាន និងជាប្រធានមន្ទីរព័ត៌មានខេត្តស្ទឹងត្រែង បានទទួលស្វាគមន៍យ៉ាងកក់ក្ដៅ ចំពោះវត្តមានរបស់ថ្នាក់ដឹកនាំ និងមន្ត្រី នៃមន្ទីរព័ត៌មានខេត្តសៀមរាប ដែលបានជ្រើសរើសយកខេត្តស្ទឹងត្រែង ជាគោលដៅនៃដំណើរទស្សនកិច្ចសម្រាប់ឆ្នាំ២០១៩នេះ សកម្មភាពនេះសរបញ្ជាក់ឲ្យឃើញថា ខេត្តស្ទឹងត្រែងក៏ជាខេត្តគោលដៅទេសចរណ៍មួយ ក្នុងចំណោមរាជធានី ខេត្តទាំង២៥នៃប្រទេសកម្ពុជា ជាពិសេសក៏ជាខេត្ត ដែលបាននឹងកំពុងអភិវឌ្ឍន៍លើគ្រប់វិស័យ ក្រោមដំបូលសន្តិភាពពេញផ្ទៃប្រទេស និង ការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។
មានប្រសាសន៍ក្នុងឱកាសនោះ ឯកឧត្តម អ៊ុក ធាវី ក្នុងនាមថ្នាក់ដឹកនាំ និងមន្ត្រីរាជការទាំងអស់នៃមន្ទីរព័ត៌មានខេត្តស្ទឹងត្រែង សូមសម្ដែងនូវការស្វាគមន៍ចំពោះវត្តមានរបស់ថ្នាក់ដឹកនាំនិងមន្ត្រីរាជការនៃមន្ទីរព័ត៌មានខេត្តសៀមរាប នៅក្នុងទឹកដីនៃខេត្តស្ទឹងត្រែងនាពេលនេះ ដែលមិនត្រឹមតែជាឆ្លុះបញ្ចាំងនិងបង្ហាញឱ្យឃើញពីជំហរដឹកនាំ និងស្មារតីសាមគ្គីសហការក្នុងការងារបានល្អប្រសើររវាងថ្នាក់ដឹកនាំនិងមន្ត្រី នៃមន្ទីរព័ត៌មានខេត្តទាំងពីរប៉ុណ្ណោះនោះទេ គឺថែមទាំងបានផ្តល់ឱកាសដល់ថ្នាក់ដឹកនាំ និងមន្ត្រីនៃមន្ទីរព័ត៌មាននៃខេត្តយើងទាំងពីរ បានចែករំលែកនូវបទពិសោធន៍ការងារពីគ្នាទៅវិញទៅមក លើចំណុចគន្លឺះល្អៗ សម្រាប់ការដឹកនាំ និងការអភិវឌ្ឍវិស័យព័ត៌មាន ដើម្បីដើរឱ្យទាន់ទៅនឹងភាពរីកចម្រើននៃសម័យបច្ចេកវិទ្យាទំនើប ស្របតាមអនុសាសន៍របស់ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន គឺប្លែក លឿន ទុកចិត្តបាន ពេលណា ទីកន្លែងណាក៏បាន ។
ឯកឧត្តម អ៊ុក ធាវី មានប្រសាសន៍បន្ថែមទៀតថា នៅពេលខាងមុខឆាប់ៗនេះ ថ្នាក់ដឹកនាំនិងមន្ត្រីនៃមន្ទីរព័ត៌មានខេត្តស្ទឹងត្រែង ក៏មានគម្រោងនឹងទៅធ្វើទស្សនកិច្ចសិក្សាផ្លាស់ប្តូរនិងចែករំលែកបទពិសោធន៍ពីគ្នាទៅនៅខេត្តសៀមរាបវិញផងដែរ។
ឆ្លៀងក្នុងឱកាសនោះ លោក លីវ សុខុន ប្រធានមន្ទីរព័ត៌មានខេត្តសៀមរាប បានសម្ដែងនូវអំណរគុណយ៉ាងជ្រាលជ្រៅបំផុត ចំពោះថ្នាក់ដឹកនាំ និងមន្ត្រីរាជការ នៃមន្ទីរព័ត៌មានខេត្តស្ទឹងត្រែង ដែលបានទទួលស្វាគមន៍ប្រកបដោយភាពកក់ក្តៅ ដល់រូបលោក ក៏ដូចជាមន្ត្រីរាជការនៃមន្ទីរព័ត៌មានខេត្តសៀមរាប ដែលបង្ហាញឲ្យឃើញថា ក្រោមដំបូលក្រសួងតែមួយ យើងពិតជាមានភាពស្និទ្ធស្នាល ស្រឡាញ់រាប់អានគ្នា និង សហការ សាមគ្គីគ្នាបានល្អប្រសើរណាស់ ដែលទង្វើទាំងអស់នេះ គឺស្របតាមប្រសាសន៍របស់ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលឯកឧត្ដមរដ្ឋមន្ត្រី តែងតែដាស់តឿន និង ក្រើនរំលឹក ដល់ថ្នាក់ដឹកនាំនៃមន្ទីរព័ត៌មានរាជធានី ខេត្ត ឲ្យមានកិច្ចសហការគ្នា ស្រឡាញ់រាប់អានគ្នា និង សាមគ្គីគ្នាឲ្យបានល្អ ទាំងថ្នាក់ដឹកនាំ និង ទាំងមន្ត្រីរាជការក្រោមឱវាទ ដើម្បីរួមគ្នា លើកកម្ពស់ និង អភិវឌ្ឍន៍វិស័យព័ត៌មានរបស់យើង ឲ្យកាន់តែមានភាពជឿនលឿន ។
លោក លីវ សុខុន មានប្រសាសន៍ទៀតថា គោលបំណងសំខាន់ នៃការធ្វើដំណើរទស្សនកិច្ចនេះ ក៏ផ្នែកមួយ នៃការលើកទឹកចិត្ត ដល់មន្ត្រីរាជការទាំងអស់ នៃមន្ទីរព័ត៌មានខេត្តសៀមរាប ដែលរយៈពេលពេញមួយឆ្នាំកន្លងមកនេះ ពួកគេទាំងអស់គ្នា បានយកអស់កម្លាំងកាយ ចិត្ត ប្រាជ្ញា និង ស្មារតី ដោយគ្មានខ្លាចការនឿយហត់ និង មានជំហរទទួលខុសត្រូវខ្ពស់ បំពេញភារកិច្ចរបស់ខ្លួន ដោយសហការ សាមគ្គីគ្នាស្អិតរមួត ទទួលបានជោគជ័យជាបន្តបន្ទាប់ ព្រមទាំងទទួលបានការគាំទ្រ និង លើកសរសើរ ពីថ្នាក់ដឹកនាំក្រសួងព័ត៌មាន និង គណៈអភិបាលខេត្តសៀមរាប ។
សូមបញ្ជាក់ថា នេះជាលើកទី២ហើយ ក្នុងអាណត្តិលោក លីវ សុខុន ប្រធានមន្ទីរព័ត៌មានខេត្តសៀមរាប ដែលបានដឹកនាំមន្ត្រីរាជការក្រោមឱវាទ ធ្វើដំណើរទស្សនាកំសាន្តនៅតាមរមណីយដ្ឋានក្រៅខេត្តសៀមរាប ដែលកាលពីលើកទីមួយ បានធ្វើដំណើរកំសាន្តទៅលេងប្រាសាទព្រះវិហារ ក្នុងខេត្តព្រះវិហារ នាថ្ងៃទី០៣ ខែមករា ឆ្នាំ២០១៨ និង លើកទីពីរនេះ ធ្វើដំណើរទស្សនាកំសាន្តទៅកាន់ខេត្តស្ទឹងត្រែង រយៈពេល២ថ្ងៃ គឺនៅថ្ងៃទី១៩ និង ថ្ងៃទី២០ ខែមករា ឆ្នាំ២០១៩ កន្លងទៅថ្មីៗនេះ ៕
អត្ថបទ ៖ លោក យូ វង្ស
រូបថត ៖ សហការី
កែសម្រួលអត្ថបទ ៖ លោក លីវ សាន្ត
