កំលាំងសមត្ថកិច្ច នៃស្នងការដ្ឋាននគរបាលខេត្តសៀមរាប បង្ក្រាបបានជនបរទេសបើកល្បែងស៊ីសងតាមប្រព័ន្ធអ៊ីនធឺណេតពីរកន្លែង ស្ថិតនៅក្នុងក្រុងសៀមរាប ខេត្តសៀមរាប។
កាលពីថ្ងៃទី២០ខែមករា ឆ្នាំ២០១៩ម្សិលមិញនេះ លោកឧត្តមសេនីយ៍ត្រី ជា គឹមសាន ស្នងការរងនគរបាលខេត្តសៀមរាប បានប្រាប់អ្នកយកព័ត៌មាននៃទូរទស្សន៍ជាតិខេត្តសៀមរាប តាមទូរសព្ទ័ឲ្យដឹងថា កាលពីរសៀលថ្ងៃទី១៨ ខែមករា ២០១៩ កំលាំងសមត្ថកិច្ច ចុះធ្វើប្រតិបត្តិការលើទីតាំងផ្ទះជួល ពីរកន្លែង ស្ថិតនៅភូមិភ្ញាជ័យ និងភូមិតាភុល សង្កាត់ស្វាយដង្គុំ ក្រុងសៀមរាប ឃាត់ខ្លួនបានជនជាតិចិនចំនួន ២០នាក់ ក្នុងនោះស្រី ៥នាក់។
ក្នុងប្រតិបត្តិការនេះដែរ ធ្វើឡើងដោយកំលាំងការិយាល័យស៊ើបអង្កេត និងអនុវត្តនីតិវិធី និងសហការពីកំលាំងការិយាល័យអន្តរាគមន៍ និងតម្រួតបទបញ្ជា កំលាំងអធិការដ្ឋាននគរបាលក្រុងសៀមរាប និងប៉ុស្តិ៍នគរបាលរដ្ឋបាលសង្កាត់ស្វាយដង្គំ។
ព័ត៌មានជាតិ ថ្មីៗ
បើតាមការឲ្យដឹងពីលោកឧត្តមសេនីយ៍ត្រី ជា គឹមសាន បញ្ជាក់ថា ជនជាតិចិនទាំង២០នាក់នេះ នឹងត្រូវបញ្ជូនទៅកាន់សាលាដំបូងខេត្តសៀមរាប នៅថ្ងៃទី២១ខែមករា ឆ្នាំ២០១៩ បន្ទាប់ពីសមត្ថកិច្ចនគរបាលការិយាល័យស៊ើបអង្កេត និងអនុវត្តនីតិវិធី បញ្ចប់ការសាកសួរ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
