បំរែបំរួលអាកាសធាតុ ជាបញ្ហាប្រឈមដ៏ធ្ងន់ធ្ងរមួយនៅលើពិភពលោក បណ្តាលមកពី កំណើនកំហាប់ឧស្ម័នផ្ទះកញ្ចក់ ក្នុងបរិយាកាស ដើម្បីចូលរួមកាត់បន្ថយការបំភាយឧស្ម័នផ្ទះកញ្ចក់ រដ្ឋបាលខេត្តសៀមរាប គ្រោងនឹងបំពាក់ប្រព័ន្ធអំពូលបំភ្លឺផ្លូវឆ្លាតវៃ ជាមួយបណ្តាញគ្រប់គ្រងឥតខ្សែ ដែលជាបច្ចេកវិទ្យាចុងក្រោយបង្អស់ របស់គម្រោងJCM អនុវត្តដោយក្រុមហ៊ុន មីនីបៀ មីសុមិ របស់ប្រទេសជប៉ុន។
បន្ទាប់ពីបញ្ចប់ ជួបប្រជុំពិនិត្យ ពិភាក្សា នៅថ្ងៃទី១៧ ខែ មករា ឆ្នាំ២០១៩ លោក សុខ ថុល នាយករដ្ឋបាលសាលាខេត្តសៀមរាប បានលើកឡើងថា ការបំពាក់អំពូលបំភ្លឺផ្លូវ LED ជាជំហាននៃការបង្កើតទីក្រុងវៃឆ្លាត ក្នុងខេត្តសៀមរាប ដែលគ្រោងនឹងបញ្ចប់ក្នុងឆ្នាំ២០១៨ ប៉ុន្តែដោយសារបញ្ហានីតិវិធីហិរញ្ញវត្ថុ គម្រោងនេះត្រូវពន្យារទៅឆ្នាំ២០១៩។
លោកបានបន្តទៀតថា ដោយបច្ចេកវិទ្យាទំនើបនេះ រាល់អំពូលភ្លើង ដែលបានបំពាក់បំភ្លឺនៅតាមដង ផ្លូវក្នុងក្រុងសៀមរាប អាចគ្រប់គ្រង ដោយមិនប្រើខ្សែ ដែលជួយដល់ការបិទ បើកអំពូលភ្លើងកាន់តែមានភាពងាយស្រួល។ តាមរយៈការអនុវត្តគម្រោងJCMនេះ វាបានចូលរួមចំណែកដល់ការកាត់បន្ថយការបំភាយឧស្ម័នផ្ទះកញ្ចក់ ហើយគម្រោងនេះនឹងធ្វើការពង្រីកអំពូលបំភ្លឺផ្លូវ ដែលប្រើប្រាស់ថាមពលមានប្រសិទ្ធិភាព នៅតាមតំបន់ផ្សេងៗ នាពេលអនាគត ដោយ សហការជាមួយក្រុមហ៊ុន មីនីបៀ មីសសុមិ និង រដ្ឋាភិបាលជប៉ុន ។ ទន្ទឹមនឹងនោះ ដើម្បីធានានូវកិច្ចសហប្រតិបត្តិ ការ និង ថែទាំ ក្នុងការអនុវត្តគម្រោងJCM ឲ្យមានភាពរលូន សាលាខេត្តសៀមរាប នឹងរាយការណ៍ពីទិន្នន័យនៃគម្រោង ទៅរដ្ឋាភិបាលជប៉ុនសម្រាប់រយៈពេល ១០ឆ្នាំខាងមុខនេះ ។
ព័ត៌មានជាតិ ថ្មីៗ
ក្នុងនោះដែរ លោកសុខ ថុល ក៏បានលើកនូវសំណូមពរដល់គម្រោងJCM និង ក្រុមហ៊ុនអនុវត្តគម្រោង ធ្វើការបំពាក់នូវភ្លើងសញ្ញាចរាចរណ៍វៃឆ្លាត ក្នុងក្រុងសៀមរាប ដើម្បីធានាបាននូវសុវត្ថិភាពចរាចរណ៍ ដល់ភ្ញៀវជាតិ និង អន្តរជាតិ ។
លើសពីនេះ តាមរយៈគម្រោងនេះដែរ ខេត្តក៏ធ្វើការកែលម្អនូវប្រព័ន្ធព័ត៌មានទេសចរណ៍ ឲ្យក្លាយជាទីក្រុងគោលដៅ ទាក់ទាញ ភ្ញៀវទេសចរណ៍ និង ការអនុវត្តសុវត្ថិភាពចរាចរណ៍ ដោយពង្រឹង និង ជួសជុលផ្លូវថ្នល់ ដំឡើងអំពូលបំភ្លឺផ្លូវ ព្រមទាំងយកចិត្ត ទុកដាក់លើការងារបរិស្ថាន ដោយប្រើប្រាស់ឧបករណ៍ដែលប្រើប្រាស់ថាមពលមានប្រសិទ្ធភាព ដូរអំពូលបំភ្លឺផ្លូវវៃឆ្លាត និងការគ្រប់គ្រងកាកសំណល់តាមគ្រួសារ និងឧស្សាហកម្ម ដោយធ្វើការណែនាំប្រព័ន្ធគ្រប់គ្រងកាកសំណល់វៃឆ្លាតផងដែរ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
