គម្រោង ប៉ាជឺរ៉ា (PAAJERA) គឺជាគម្រោង ផ្ដល់នូវថវិកាមួយចំណែក ដើម្បីជួយដល់គ្រួសារនានាដែលខ្វះថវិកា និងកំពុងរស់នៅក្នុងតំបន់រមណីយដ្ឋានអង្គរ ទទួលបានបង្គន់អនាម័យឯកជនប្រើប្រាស់សមរម្យមួយ ដែលជាផ្នែកមួយលើកកម្ពស់ដល់សុខុមាលភាពប្រជាពលរដ្ឋនៅទីនោះ។
មន្ត្រីបច្ចេកនាយកដ្ឋានគ្រប់គ្រងទឹកនៃអាជ្ញាធរជាតិអប្សរា លោក ឡៃ ប៉ូទី បានឱ្យដឹងថា គម្រោង ប៉ាជឺរ៉ា គឺជាកិច្ចសហការរវាងអាជ្ញាធរជាតិអប្សរា និងរដ្ឋាភិបាលបារាំង តាំងពីខែ សីហា ឆ្នាំ២០១៨មកដល់បច្ចុប្បន្ន តាមរយៈគម្រោងនេះ ថវិកាបដិភាគនេះ បានសង់បង្គន់អនាម័យប្រមាណជាង ៣០០បង្គន់ហើយ សម្រាប់ជូនដល់ប្រជាពលរដ្ឋ ហើយចំនួននេះនឹងបន្តកើនឡើងជាបន្តបន្ទាប់។
លោកបន្ថែមថា គម្រោងនេះបានសម្រួលដល់ប្រជាពលរដ្ឋដែលមានជីវភាពខ្សត់ខ្សោយឲ្យមានបង្គន់អនាម័យប្រើប្រាស់ ដែលជាតម្រូវការចាំបាច់ក្នុងការរស់នៅ។ តាមរយៈគម្រោងនេះ ពលរដ្ឋអាចជ្រើសរើសបង្គន់អនាម័យចំនួន ៣ប្រភេទ គឺបង្គន់ដែលមានរណ្ដៅចាប់ពី១រណ្ដៅ ដល់៣ រណ្ដៅ ដែលមានជម្រៅលូ៣កង់ ដោយអាជ្ញាធរជាតិអប្សរា តាមរយៈគម្រោងប៉ាជីរ៉ា(PAAJERA) ផ្តល់ថវិកាបដិភាគចំនួន ៤០ភាគរយសម្រាប់បង្គន់១រណ្តៅ ថវិកាបដិភាគចំនួន ៣០ភាគរយសម្រាប់បង្គន់២រណ្តៅ និងថវិកាបដិភាគចំនួន ២០ភាគរយសម្រាប់បង្គន់៣រណ្តៅ។
តាមការពន្យល់របស់លោក ប៉ូទី តាមពិតទៅគម្រោង ប៉ាជឺរ៉ា បានចាប់ផ្តើមតាំងពីអំឡុងឆ្នាំ ២០១៣ ដោយអប់រំប្រជាពលរដ្ឋកំពុងរស់នៅតំបន់អង្គរឱ្យយល់ពីការរស់នៅប្រកបដោយសុខុមាលភាពនិងអនាម័យល្អក្នុងគ្រួសារ។ ប៉ុន្តែតាមរយៈការសិក្សាកន្លងមក មានគ្រួសារខ្លះខ្វះលទ្ធភាពក្នុងការកសាងបង្គន់អនាម័យ ដែលធ្វើឱ្យពួកគេមិនមានលទ្ធភាពគ្រប់គ្រន់ក្នុងការសង់បង្គន់អនាម័យត្រឹមត្រូវក្នុងការប្រើប្រាស់ប្រចាំថ្ងៃ។ ហេតុដូច្នេះហើយ ទើបគម្រោង ប៉ាជឺរ៉ា បានសម្រេចចិត្តលើកទឹកចិត្តប្រជាពលរដ្ឋក្នុងការសាងសង់បង្គន់អនាម័យដោយផ្តល់ថវិកាបដិភាគសម្រាប់ការសាងសង់នេះ។
អ្នកស្រី អិច ទ្រប់ អ្នកភូមិរហាល សង្កាត់នគរធំ ក្រុងសៀមរាប ដែលទើបនឹងទទួលថវិកាបដិភាគសង់បង្គន់អនាម័យ បាននិយាយថា អ្នកស្រីរីករាយជាខ្លាំង នៅពេលអាជ្ញាធរជាតិអប្សរា បានចូលរួមគិតគូរពីសុខុមាលភាពរបស់ប្រជាពលរដ្ឋ ដែលកន្លងមកអ្នកស្រីក៏ដូចជាអ្នកភូមិឯទៀត ទទួលបានការអប់រំច្រើនពីបញ្ហាអនាម័យនេះ។ ក្នុងនោះដែរ អ្នកស្រីសូមថ្លែងអំណរគុណដល់អាជ្ញាធរជាតិអប្សរា តាមរយៈការផ្តល់ថវិកាបដិភាគសង់បង្គន់អនាម័យបានជួយសម្រាលជីវភាពគ្រួសារអ្នកស្រីបានមួយកម្រិត។
សូមបញ្ជាក់ថា ការយកចិត្តទុកដាក់ខ្ពស់លើការអភិវឌ្ឍសហគមន៍ ជាពិសេសការលើកកម្ពស់ជីវភាពរស់នៅរបស់ប្រជាពលរដ្ឋក្នុងតំបន់អង្គរគឺជាការងារអាទិភាពចំបងមួយក្នុងចំណោមការងារអាទិភាពជាច្រើនផ្សេងទៀត។ ក្រៅពីនេះ អាជ្ញាធរជាតិអប្សរាក៏បានចូលរួមយ៉ាងសកម្មក្នុងការកសាងហេដ្ឋារចនាសម្ពន្ធរូបវន្តសំខាន់ៗសម្រាប់ជាប្រយោជន៍ផ្ទាល់របស់ប្រជាពលរដ្ឋក្នុងតំបន់រមណីយដ្ឋានអង្គរដូចជា ផ្លូវថ្នល់ ស្ពាន ប្រឡាយទឹក ទ្វារទឹក៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
