ថ្លែងក្នុងក្នុងពិធីទិវាជាតិអាហារូបត្ថម្ភលើកទី៥ នៅស្រុកពួក នាព្រឹកថ្ងៃទី១៨ ខែមករា ឆ្នាំ២០១៩នេះ លោក ពិន ប្រាកដ អភិបាលរងខេត្តសៀមរាប បានសម្តែងនូវមនោសញ្ចេតនារីករាយ និងគាំទ្រយ៉ាងពេញទំហឹង ចំពោះការរៀបចំ ទិវាជាតិអាហារូបត្ថម្ភនេះ ពីព្រោះដើម្បីបំផុសស្មារតីដល់ភាគីពាក់ព័ន្ធទាំងអស់ ទាំងរាជរដ្ឋាភិបាល ទាំងដៃគូអភិវឌ្ឍន៍ អង្គការសង្គមស៉ីវិល វិស័យឯកជន អ្នកស្រាវជ្រាវ និងបងប្អូនជនរួមជាតិ ឲ្យកាន់តែច្បាស់អំពីការចំណាយទៅលើការផ្តល់អាហារូបត្ថម្ភល្អដល់កុមារ គឺជាការវិនិយោគសម្រាប់ការអភិវឌ្ឍសង្គម មូលធនមនុស្ស និងសេដ្ឋកិច្ចជាតិ និងលើកទឹកចិត្តដល់អ្នកពាក់ព័ន្ធទាំងនោះ ឲ្យចូលរួមចំណែកដោះស្រាយបញ្ហា អាហារូបត្ថម្ភ ចែករំលែកបទពិសោធន៍ កៀរគរធនធាន និងបង្កើនការវិនិយោគទៅលើអាហារូបត្ថម្ភ ក្នុងគោលដៅដើម្បីកុមារ និងស្ត្រីមានសុខភាពល្អ ប្រសិទ្ធិភាពការងារ និងដើម្បីរួមចំណែកដល់កំណើនសេដ្ឋកិច្ចជាតិ និងការអភិវឌ្ឍសង្គមជាតិយើង ។
លោក ពិន ប្រាកដ មានប្រសាសន៍ទៀតថា ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន ធ្លាប់បានផ្តល់អនុសាសន៍មួយចំនួនជុំវិញបញ្ហាអាហារូបត្ថម្ភនេះ ដូចជា បន្តពង្រឹងភាពជាដៃគូនិងបន្តខិតខំសម្របសម្រួលសហការគ្នាដើម្បីធ្វើឲ្យស្ថានភាពអាហារូបត្ថម្ភស្ត្រី និងកុមារ មានភាពល្អប្រសើរឡើងតាមរយៈការ អប់រំផ្សព្វផ្សាយស្ដីពីការបរិភោគអាហារចម្រុះ សម្បូរប្រូតេអ៊ីន អាហារថាមពល និង មានសុវត្ថិភាពនិងអាហារមានមីក្រូសារជាតិគ្រប់គ្រាន់ពិសេសត្រូវហូប ត្រីឬក៏អាហារធ្វើពីម្សៅត្រីដែលជាប្រភពមានអាហាររូបត្ថម្ភច្រើនសម្រាប់ការលូតលាស់និងការវិវត្តន៍របស់កុមារ និង បន្តអន្តរាគមន៍អាហារូបត្ថម្ភក្នុងបរិបទវិស័យសុខាភិបាល រួមមានការផ្តល់ប្រឹក្សាយោបល់ស្តីពីអាហារូបត្ថម្ភក្នុងអំឡុងពេលមានផ្ទៃពោះ និង ក្រោយសម្រាល និងរក្សានិរន្តរភាពទម្លាប់ការបំបៅកូនដោយទឹកដោះម្ដាយឲ្យបានល្អបំផុតសម្រាប់កុមារកម្ពុជារួមមានការចាប់ផ្ដើមបំបៅកូនដោយទឹកដោះម្ដាយក្នុងម៉ោងដំបូងក្រោយពីសម្រាលការបំបៅកូនដោយទឹកដោះម្ដាយតែមួយមុខគត់ក្នុងអំឡុង ៦ ខែដំបូងនិងការបំបៅកូនដោយទឹកដោះម្ដាយឲ្យបានល្អដល់កុមារ អាយុយ៉ាងតិចបំផុតពីរឆ្នាំឬលើស ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
