ក្នុងឱកាសជួបសម្តែងការគួរសម និង ពិភាក្សាការងារ ជាមួយឯកឧត្តម ទៀ សីហា អភិបាលខេត្តសៀមរាប កាលពីរសៀលថ្ងៃទី១៤ ខែមករា ឆ្នាំ២០១៩ម្សិលមិញនេះ ឯកឧត្តម អូ ណាក់ខ្យង អគ្គរដ្ឋទូតនៃសាធារណរដ្ឋកូរ៉េ ប្រចាំព្រះរាជាណាចក្រកម្ពុជា បានសម្ដែងនូវចំណាប់អារម្មណ៍របស់ខ្លួន ចំពោះបញ្ហាសុខភាព អនាម័យលើចំណីអាហារនៅកម្ពុជា ខណៈកន្លងមក មាននិស្សិតកូរ៉េស្ម័គ្រចិត្ត ដែលចូលមកកម្ពុជា បានទទួលគ្រោះថ្នាក់ ធ្វើឲ្យប្រជាជនកូរ៉េ ដែលចូលមកធ្វើទេសចរណ៍មានការភ័យខ្លាច ដូច្នេះ ដើម្បីឲ្យក្រុមនិស្សិតមានទំនុកចិត្ត សំណូមពរដល់ឯកឧត្តមអភិបាលខេត្ត ផ្តល់ព័ត៌មានល្អៗដល់ពួកគេ ក្នុងការយកទៅធ្វើការផ្សព្វផ្សាយបន្ត ដល់ប្រជាជនកូរ៉េ ។
ជាមួយនូវការសម្តែងការសោកស្តាយ ចំពោះការបាត់បង់ជីវិតរបស់និស្សិតកូរ៉េ ដែលបានកើតឡើងនៅក្រុងភ្នំពេញ ដោយបញ្ហាពុលចំណីអាហារ ឯកឧត្តម ទៀ សីហា អភិបាលខេត្តសៀមរាប បានបញ្ជាក់ថា ចំពោះបញ្ហាអនាម័យសុខភាពចំណីអាហារនៅក្នុងខេត្តសៀមរាប ក្រសួងពាណិជ្ជកម្ម ក៏ដូចជាអាជ្ញាធរខេត្ត បានយកចិត្តទុកដាក់ជាខ្លាំងក្នុងការចុះត្រួតពិនិត្យលើចំណីអាហារនៅតាមទីផ្សារ និង ហាងទំនើបក្នុងខេត្ត ព្រោះថាបញ្ហាសុខភាពចំណីអាហារនេះ មិនមែនចោទចំពោះអ្នកទេសចរកូរ៉េតែប៉ុណ្ណោះទេ គឺវាប៉ះពាល់ដល់ប្រជាជន និង ភ្ញៀវទេសចរណ៍ឯទៀត ប្រសិនបើអាជ្ញាធរយើងមិនបានយកចិត្តទុកដាក់នោះ ។
សូមបញ្ជាក់ថា កាលពីថ្ងៃទី១១ ខែមករា ឆ្នាំ២០១៩កន្លងទៅថ្មីៗនេះ ក្រសួងទេសចរណ៍ បានចេញសារាចរណែនាំមួយ ស្ដីពីការពង្រឹងសុវត្ថិភាពចំណីអាហារតាមមូលដ្ឋានអាជីវកម្ម ភោជនីយដ្ឋាននិងអាហារដ្ឋានទេសចរណ៍ ដោយបានបញ្ជាក់ថា ដើម្បីចូលរួមដល់ការពង្រឹងសុវត្ថិភាពចំណីអាហារ នៅតាមមូលដ្ឋានអាជីវកម្មភោជនីយដ្ឋាន និងអាហារដ្ឋានទេសចរណ៍ ក្រសួងទេសចរណ៍ និងមន្ទីរទេសចរណ៍រាជធានី-ខេត្ត នឹងមិនផ្ដល់អាជ្ញាបណ្ណទេសចរណ៍ដល់គ្រប់អាជីវកម្មភោជនីយដ្ឋាន និងអាហារដ្ឋានទេសចរណ៍ទាំងឡាយណា ដែលមិនមានវិញ្ញាបនបត្របញ្ជាក់អនាម័យ ពីក្រសួងសុខាភិបាល ឬមន្ទីរសុខាភិបាល ឬរដ្ឋបាលថ្នាក់ក្រោមជាតិ ជាពិសេសក្រសួងទេសចរណ៍ នឹងសម្រេចដកហូតមកវិញនូវអាជ្ញាបណ្ណទេសចរណ៍ ប្រសិនបើពិនិត្យឃើញថា មូលដ្ឋានអាជីវកម្មភោជនីយដ្ឋាន និងអាហារដ្ឋានទេសចរណ៍នោះ ពុំបានអនុវត្តត្រឹមត្រូវតាមបទដ្ឋានអនាម័យ តាមការណែនាំរបស់ក្រសួងសុខាភិបាល ឬមន្ទីរសុខាភិបាល ឬរដ្ឋបាលថ្នាក់ក្រោមជាតិ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
