ក្នុងជំនួបពិភាក្សាការងារជាមួយសម្ដេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា នៃកិច្ចប្រជុំប្រចាំឆ្នាំលើកទី២៧ នៃវេទិកាអាស៊ី-ប៉ាស៊ីហ្វិក (APPF) ដែលប្រារព្ធធ្វើនៅខេត្តសៀមរាប នាព្រឹកថ្ងៃទី១៤ មករា ឆ្នាំ២០១៩ ម្សិលមិញនេះ លោកជំទាវ ផានី យ៉ាថូទូ ប្រធានរដ្ឋសភា នៃសាធារណរដ្ឋប្រជាធិបតេយ្យប្រជាមានិតឡាវ បានសម្ដែងអារម្មណ៍រីករាយចំពោះកិច្ចសហប្រតិបត្តិការរវាងរដ្ឋសភាទាំងពីរនាពេលកន្លងមក ពីសេសបានអបអរសាទរចំពោះការរៀបចំកិច្ចប្រជុំ APPF លើកទី២៧ ដែលកម្ពុជាធ្វើជាម្ចាស់ផ្ទះ ។
ក្នុងឱកាសនោះដែរ លោកជំទាវ ផានី យ៉ាថូទូ បានគាំទ្រលើខ្លឹមសារអនុស្សរណៈ ដែលបានចុះហត្ថលេខានាឱកាសនេះ និងបានស្នើសូមសម្តេចប្រធានរដ្ឋសភាកម្ពុជា បន្តជំរុញកិច្ចសហប្រតិបត្តិការសភាប្រទេសទាំងពីរឲ្យកាន់តែរឹងមាំថែមទៀត ចាប់ពីថ្នាក់ដឹកនាំរហូតដល់គណៈកម្មការជំនាញ ជាពិសេសគួរបង្កើតឲ្យមានសិក្ខាសាលារួមគ្នា ព្រមទាំងបានស្នើឲ្យរដ្ឋាភិបាលប្រទេសទាំងពីរ ជំរុញកិច្ចសហប្រតិបត្តិផ្នែកពាណិជ្ជកម្ម រវាងប្រទេសទាំងពីរ ដែលនៅមានកម្រិតឲ្យបានកើនឡើង ៕
អត្ថបទ ៖ លោក ម៉ាត់ អារីហ្វីន
រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
