កម្មវិធីបដិបត្តិព្រះធម៌-ធ្វើធុតង្គ “ដើរឆ្ពោះទៅរកការរំលត់ទុក” រយៈពេល៥ថ្ងៃបានបិទបញ្ចប់ហើយ នៅថ្ងៃទី១៣ ខែមករា ឆ្នាំ២០១៩ នៅវត្តប្រាសាទព្រះវិហារប្រាំពីរល្វែង ខាងមុខទីព្រះលានជល់ដំរី។
បដិបត្តិព្រះធម៌ ធ្វើធុតង្គ គឺជាផ្នែកមួយនៃវិបស្សនាធុរៈ និង ជាកម្មវិធីរៀនសូត្រអប់រំផ្លូវចិត្តដ៏ធំមួយ ដែលកម្រនឹងបានជួបប្រទះ។ វិបស្សនាធុរៈ គឺជាការប្រើប្រាស់វិញ្ញាណមើលជុំវិញខ្លួនឲ្យបានច្បាស់ មើលឲ្យឃើញសភាពពិតដោយបញ្ញា ដើម្បីឲ្យការរស់នៅប្រកបដោយសេក្តីសុខ ទាំងបុគ្គល គ្រួសារ និងសង្គមជាតិ ។
នេះគឺជាលើកទី២ ដែលកម្មវិធីនេះបានដំណើរការនៅវត្តព្រះវិហារ៧ល្វែង នៃតំបន់អតីតរាជធានីអង្គរ សម័យកាលដ៏រុងរឿងនៃអាណាចក្រខ្មែរ និងជាសម័យកាលសុខដុមណីកម្ម រវាងព្រហ្មសាសនា និង ព្រះពុទ្ធសាសនា ។ ព្រះអង្គបង្ហាញនូវព្រះទ័យជ្រះថ្លា ដោយបានទតឃើញនៅក្នុងកម្មវិធីនេះ មានការនិមន្តចូលរួមដោយយុវសង្ឃជាច្រើនអង្គ ។
ព្រះប្រធានគណៈសង្ឃនាយក នៃគណៈធម្មយុត្តិកនិកាយ នៃព្រះរាជាណាក្រកម្ពុជា បួរ គ្រី មានព្រះបន្ទូលថា ការប្រព្រឹត្តបំពេញបដិបត្តិព្រះធម៌-ធ្វើធុតង្គ “ដើរឆ្ពោះទៅរកការរំលត់ទុក្ខ ” គឺជាការបដិបត្តិព្រះធម៌ដើម្បីរំដោះសេចក្តីអាក្រក់ ជម្រះកិលេសដែលជាគ្រឿងមន្ទិល ដុសខាត់ទៅលើផ្លូវចិត្តរបស់មនុស្សឲ្យមានការអត់ធ្មត់ខ្ពស់ ចេះយោគយល់អាធ្យាស្រ័យគ្នាទៅវិញទៅមក រស់នៅសុខសប្បាយជាមហាគ្រួសារនៃសង្គមជាតិ ។ ព្រះពុទ្ធសាសនាគឺជាសាសនារបស់រដ្ឋ ច្បាប់របស់រដ្ឋ និងព្រះធម្មវិន័យ ពុទ្ធឱវាទ មិនអាចកាត់ផ្តាច់ចេញពីគ្នាបាននោះទេ ដែលត្រូវបានយកមកអប់រំផ្លូវចិត្ត កសាងសង្គមជាតិ ប្រកបដោយសេចក្តីសុខ ចម្រើន ។
ព្រះប្រធានគណៈសង្ឃនាយក នៃគណៈធម្មយុត្តិកនិកាយ មានបន្ទូលបន្ថែមថា ៖ តាមផ្លូវលោក ការរស់នៅនៃប្រជារាស្ត្រដោយបំពានច្បាប់របស់រដ្ឋ គឺជាការនាំទុក្ខទោសមកដាក់ខ្លួន ការគោរពច្បាប់គឺនាំមកនូវសង្គមថ្លៃថ្នូរ សុខចម្រើន ។ នៅក្នុងវិស័យពុទ្ធចក្រ ការគោរពព្រះធម៌ បដិបត្តិពុទ្ធឱវាទ គឺជាការនាំមកនូវសេចក្តីស្ងប់ ចៀសផុតបាបកម្មទាំងឡាយទាំងពួងផងដែរ ។ ព្រះពុទ្ធសាសនាត្រូវបានផ្សារភ្ជាប់ជាមួយសង្គមខ្មែរ ហើយដោយជំនឿនៃពុទ្ធសាសនិកជន និង ការទទួលបានឥទ្ធិពលពីគ្នាទៅវិញទៅមក បានធ្វើឲ្យសង្គមខ្មែរមានសេចក្តីសុខ ដែលអាចបញ្ជាក់បានថា អ្នកកាន់ព្រះពុទ្ធសាសនា គឺជាអ្នកស្រឡាញ់សន្តិភាព ព្រោះពុទ្ធឱវាទបានបង្ហាញថា គ្មានសេចក្តីសុខណា ស្មើនឹងសេចក្តីស្ងប់នោះឡើយ ៕
( ព្រះរាជបន្ទូល ព្រះមហាសង្ឃរាជាធិបតី បួរ គ្រី ក្នុងបទសម្ភាសន៍ )មានក្នុងវីដេអូ
