ព្រះពុទ្ធសាសនា មានតួនាទីយ៉ាងសំខាន់សម្រាប់ការគោរពប្រតិបត្តិតាមផ្លូវជំនឿ ដែលមានគណៈធម្មយុត្តនិងគណៈមហានិកាយ ជាតំណាងព្រះពុទ្ធសាសនាថេរវាទ នៅព្រះរាជាណាចក្រកម្ពុជា!
ថ្ងៃអង្គារ ៣កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនិងថ្ងៃទី ០៨ ខែមករា គ.ស ២០១៩
គឺជាអភិលក្ខិតសម័យមួយដ៏ឧត្តុងឧត្តមនៅក្នុងព្រះពុទ្ធសាសនា នាវត្តប្រាសាទព្រះវិហារប្រាំពីរល្វែង ខាងមុខទីព្រះលានជល់ដំរី ស្ថិតក្នុងបរិវេណប្រាសាទបាយ័ន សង្កាត់នគរធំ ក្រុងសៀមរាប ខេត្តសៀមរាប ទឹកដីអង្គរដ៏បវររុងរឿង ដែលគណៈសង្ឃ និកាយធម្មយុត្តខ្មែរ ដឹកនាំដោយសម្ដេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្ដេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា ប្រព្រឹត្តបំពេញបដិបត្តិព្រះធម៌-ធ្វើធុតង្គ “ដើរឆ្ពោះ ទៅរកការរំលត់ទុក្ខ ” រយៈពេល ០៦ ថ្ងៃ គឺចាប់ពីថ្ងៃអង្គារ ០៣ កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៨ ខែមករា គស ២០១៩ រហូតដល់ ថ្ងៃអាទិត្យ ០៨ កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៣ ខែមករា គស ២០១៩ ក្រោមការនិមន្តចូលរួមដោយមន្ត្រីសង្ឃ-ព្រះសង្ឃ និងចូលរួមពីសំណាក់ ឧបាសក-ឧបាសិកា-តាជី-យាយជី ជាច្រើនអង្គ-នាក់ ។
នេះបើតាមប្រសាសន៍លើកឡើងរបស់ ឯកឧត្តម ពៅ ពិសិដ្ឋ អភិបាលរងខេត្តសៀមរាប ក្នុងពិធីបើកការបដិបត្តិព្រះធម៌-ធ្វើធុតង្គ (ដើរឆ្ពោះទៅរកការរំលត់ទុក) នាព្រឹកថ្ងៃទី០៨ ខែមករា ឆ្នាំ២០១៩នេះ ។ ឯកឧត្តមបន្តថា ៖ ព្រះពុទ្ធសាសនា ជាសាសនាមួយ ដែលត្រាទុកក្នុងរដ្ឋធម្មនុញ្ញ ដែលជាច្បាប់កំពូលរបស់ជាតិ បានចែងក្នុងមាត្រា៤៣ត្រង់វាក្យខ័ណ្ឌទី ០៣ ថា ៖ ព្រះពុទ្ធសាសនា ជាសាសនារបស់រដ្ឋ ។ ព្រះពុទ្ធសាសនា មានតួនាទីយ៉ាងសំខាន់សម្រាប់ការគោរពប្រតិបត្តិតាមផ្លូវជំនឿ ដែលមានគណៈធម្មយុត្តនិងគណៈមហានិកាយ ជាតំណាងព្រះពុទ្ធសាសនាថេរវាទ នៅព្រះរាជាណាចក្រកម្ពុជា ។
ព័ត៌មានជាតិ ថ្មីៗ
សម្ដេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្ដេចព្រះមហាសង្ឃរាជ នៃគណៈធម្មយុត្តិកនិកាយ និង ជាព្រះប្រធានគណៈសង្ឃនាយកនៃគណៈធម្មយុត្តិកនិកាយនៃព្រះរាជាណាក្រកម្ពុជាមានព្រះរាជបន្ទូលថា ៖ ការប្រព្រឹត្តបំពេញបដិបត្តិព្រះធម៌-ធ្វើធុតង្គ “ដើរឆ្ពោះទៅរកការរំលត់ទុក្ខ ”នេះ គឺជាការដុសខាត់ទៅលើផ្លូវចិត្តរបស់មនុស្សឱ្យមានការអត់ធ្មត់ខ្ពស់ ចេះយោគយល់អាធ្យាស្រ័យគ្នា ជាភារតភាព រស់នៅជាសុខសប្បាយជាមហាគ្រួសារខ្មែរ និងសាកលលោក ។
ធុរៈក្នុងព្រះពុទ្ធសាសនាមានពីរយ៉ាងគឺ៖ គន្ធធុរៈមួយ និង វិបស្សនាធុរៈមួយ ។ ធុតង្គវត្តគឺជាផ្នែកមួយនៃវិបស្សនាធុរៈ ។ ព្រះពុទ្ធអង្គ ទ្រង់អនុញ្ញាតធុតង្គវត្តទុក ព្រោះព្រះអង្គមានពុទ្ធបំណងនឹងឲ្យបដិបត្តិដើម្បីជាគ្រឿងដុសខាត់កិលេសគឺ គ្រឿងសៅហ្មងដែលត្រាំនៅក្នុងចិត្តជាអកុសល ហេតុអោយកើតសេចក្ដីប្រាថ្នាច្រើន និងអោយផ្លាស់ផ្ដូរសភាពចិត្តទៅជាការប្រាថ្នាតិច ។ សន្ដោស គឺសេចក្ដីត្រេកអរក្នុងចំណែកដែលខ្លួនមាន ដើម្បីការពារចិត្តមិនអោយខ្វល់ខ្វាយក្នុងលាភរបស់អ្នកដ៏ទៃ ក្នុងផ្លូវដែលខុសសីលធម៌ ៕
រូបថត និងអត្ថបទ: លោក ងិន គឹមឡេង
