ខេត្តសៀមរាប នឹងរៀបចំពិធីព្យុហយាត្រដ៏ធំសម្រាប់ឆ្នាំ២០១៩នេះ ដើម្បីអបអរខួបអនុស្សាវរីយ៍លើកទី៤០ឆ្នាំ នៃទិវាជ័យជំនះ ៧មករា ពិធីនេះដែរគ្រោងនឹងមានមនុស្សចូលរួមប្រមាណជាង មួយម៉ឺននាក់។
លោក លី សំរិទ្ធ អភិបាលរង និងជាអ្នកនាំពាក្យសាលាខេត្តសៀមរាប បានឲ្យដឹងថា ដើម្បីអបអរថ្ងៃជ័យជម្នះ ៧មករា ខួបលើកទី៤០ ដែលកម្ពុជាទទួលបានជ័យជម្នះពីរបបកម្ពុជាប្រជាធិបតេយ្យ ខេត្តសៀមរាប គ្រោងនឹងប្រារព្ធពិធីនេះ នៅថ្ងៃទី១០ ខែមករាខាងមុខ ហើយគោលដៅសម្រាប់រៀបចំពិធីនេះ គឺធ្វើឡើងនៅលើសួនច្បារមុខមហាសណ្ឋាគារអង្គរ ក្រោមអធិបតីភាព សម្តេចពិជ័យសេនា ទៀ បាញ់។
តាមការពន្យល់របស់លោក លី សំរិទ្ធ ការប្រារព្ធពិធីអបអរថ្ងៃជ័យជម្នះ ៧មករា ខួបលើកទី៤០ នៅខេត្តសៀមរាប នៅឆ្នាំនេះ នឹងមានសភាពអ៊ូរអរខុសពីបណ្ដាឆ្នាំមុនៗ ដោយសារនេះជាគោលការណ៍របស់រាជរដ្ឋាភិបាល រាល់បុណ្យជាតិ ដែលគម្រប់ ឆ្នាំទី៥ គឺត្រូវរៀបចំឲ្យបានអធិកអធម ហើយការប្រាព្ធខួបលើកទី៤០ នៃថ្ងៃជ័យជម្នះ ៧ មករានេះ គឺជាជុំទី៨ផងដែរ។
សម្រាប់កម្មវិធីហែរព្យុហយាត្រានេះ លោក លី សំរិទ្ធ បានបញ្ជាក់ថា គ្រោងនឹងដង្ហែពីមុខសារមន្ទីរជាតិអង្គរ កាត់តាមសួនច្បារមហាសណ្ឋាគារអង្គរ តាមបណ្តោយផ្លូវដងស្ទឹងសៀមរាប រហូតដល់ស្ពានវត្តរាជបូព៌ បត់ស្តាំ រហូតដល់ស្តុបផ្សារកណ្តាល ធ្វើដំណើរតាមផ្លូវស៊ីវត្ថា ឆ្ពោះទៅស្តុបសុខាអង្គរ ជិតដល់សណ្ឋាគារ សេនជូរី បត់ស្តាំកែងសណ្ឋាគារ វិចតូរៀ ឆ្ពោះមកកាន់ទីតាំងប្រារព្ធកម្មវិធី នៅសួនច្បារមហាសណ្ឋាគារអង្គរ វិញ។
សូមបញ្ជាក់ថា ការរើសយកថ្ងៃទី១០ ខែមករា រៀបចំពិធីថ្ងៃជ័យជម្នះ ៧មករា នៅឆ្នាំនេះ គឺជាថ្ងៃ ដែលខេត្តសៀមរាប ត្រូវបានរំដោះរួចផុតពីរបបកម្ពុជាប្រជាធិបតេយ្យ ប្រល័យពូជសាសន៍ ពោលគឺនៅថ្ងៃទី១០ ខែមករា ឆ្នាំ១៩៧៩តែម្ដង។
រូបថត និងអត្ថបទ: លោក ម៉ាត់ អារីហ្វីន
សម្រួលអត្ថបទ : លោក សេង ផល្លី
