នៅសាលប្រជុំសាលាខេត្តសៀមរាប នាព្រឹកថ្ងៃទី០៤ ខែ មករា ឆ្នាំ២០១៩នេះ ឯកឧត្តម ទៀ សីហា អភិបាលនៃគណៈអភិបាល ខេត្តសៀមរាប និង ឯកឧត្តម អ៊ឹង ហឿន ប្រធានក្រុមប្រឹក្សាខេត្ត បានដឹកនាំកិច្ចប្រជុំ ស្តីពីការរៀបចំបុណ្យខួបអនុស្សាវរីយ៍លើកទី៤០ នៃ ទិវាជ័យជម្នះ ៧មករា ក្នុងនៅខេត្តសៀមរាប នឹងប្រព្រឹត្តនៅថ្ងៃទី១០ ខែមករា ឆ្នាំ២០១៩ បរិវេណព្រះអង្គចេកព្រះអង្គចម បន្ទាប់ពីមានការសម្រេចជាផ្លូវការរបស់ថ្នាក់ដឹកនាំខេត្តសៀមរាប នៅព្រឹកថ្ងៃទី០៤ ខែមករានេះ។
ទិវាជ័យជម្នះ ៧មករា នៅឆ្នាំ២០១៩នេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ជាសមាជិកគណៈអចិន្ត្រៃយ៍ គណៈកម្មាធិការកណ្តាល នៃគណបក្សប្រជាជនកម្ពុជា អ្នកតំណាងរាស្ត្រមណ្ឌលសៀមរាប និងជាប្រធានក្រុមការងារគណៈកម្មាធិការកណ្តាល ចុះជួយខេត្តសៀមរាប នឹងចូលរួមជាអធិបតីក្នុងទិវានេះ រួមនឹងសមាជិកសមាជិកាចូលរួមក្នុងពិធី សរុបប្រមាណ១០ពាន់១៣៤នាក់ ព្រមទាំងធ្វើពិធីហែក្បួន ព្យុហយាត្រាមហាជនផងដែរ។
ឯកឧត្តម ទៀ សីហា បានបញ្ជាក់ថា មូលហេតុ ដែលខេត្តសៀមរាប សម្រេចយកថ្ងៃទី១០ ខែមករា ប្រារព្ធខួបអនុស្សាវរីយ៍លើកទី៤០ នៃ ទិវាជ័យជម្នះ ៧មករា នាពេលនេះ ដោយសារខេត្តសៀមរាប ត្រូវបានរំដោះរួចផុតពីរបបកម្ពុជាប្រជាធិបតេយ្យ ប្រល័យពូជសាសន៍ គឺនៅថ្ងៃទី១០ មករា ១៩៧៩។
ព័ត៌មានជាតិ ថ្មីៗ
ឯកឧត្តមអភិបាលខេត្ត បានបញ្ជាក់ទៀតថា នៅឱកាសនោះ ដើម្បីធ្វើឲ្យកម្មវិធីយើងដំណើរការទៅ បានដោយជោគជ័យ សមត្ថកិច្ចចរាចរណ៍ ត្រូវធ្វើការផ្អាកសកម្មភាពចរាចរណលើផ្លូវ ស្ពាន មួយចំនួន។ ករណីនេះ សូមឲ្យកម្លាំងសមត្ថកិច្ចជំនាញ ត្រូវបញ្ចៀសនូវការការកកស្ទះចរាចរណ៍កុំឲ្យមាន នៅតាមដងផ្លូវ ព្រមទាំងកុំឲ្យមានការកើតឡើង នូវគ្រោះថ្នាក់ចរាចរណ៍ផងដែរ។ មួយវិញទៀត អាជ្ញាធរគ្រប់លំដាប់ថ្នាក់ ត្រូវរក្សាឲ្យបាននូវអនាម័យ បរិស្ថាន ការងារសន្តិសុខ សណ្តាប់ធ្នាប់ នៅតាមដងផ្លូវដែលក្រុមក្បួនព្យុហយាត្រ ធ្វើដំណើរ ដែលគណៈកម្មការរៀបចំបុណ្យជាតិ បានកំណត់។
រូបថត និងអត្ថបទ: លោក គឿន វេត
សម្រួលអត្ថបទ : លោក សេង ផល្លី
