ក្នុងថ្ងៃឆ្លងឆ្នាំ២០១៨ ឈានចូលឆ្នាំ២០១៩ មានភ្ញៀវទេសចរជាតិនិងអន្តរជាតិប្រមាណជិត៣០ម៉ឺននាក់ បានចូលមកកម្សាន្តនៅក្នុងខេត្តសៀមរាប កើនឡើង៧.៩៦ភាគរយបើធៀបរយៈពេលដូចគ្នានឹងឆ្នាំ២០១៧ នេះតាមរបាយការណ៍របស់មន្ទីរទេសចរណ៍ ខេត្តសៀមរាប។
ជារៀងរាល់ឆ្នាំ នៅថ្ងៃឆ្លងឆ្នាំសាកល ខេត្តសៀមរាបគឺជាគោលដៅដ៏មានប្រជាប្រិយភាពមួយ សម្រាប់អ្នកទេសចរជាតិនិងអន្តរជាតិ មកកំសាន្ត នាឱកាសពិធីបុណ្យឆ្លងឆ្នាំសាលក២០១៨-២០១៩នេះ នៅពេលថ្ងៃតំបន់ប្រាសាទ រមណីយដ្ឋានធម្មជាតិនានា មានសភាពអ៊ូអរ ដោយឡែកនៅពេលយប់ នៅក្នុងក្រុងសៀមរាបមានការតុបតែងលំអភ្លើងស្រស់បំព្រង រួមនិងការសម្ដែងរបាំបុរាណ តន្ត្រីស្គរដៃ ប្រគុំតន្ត្រីបុរាណ-សម័យ រហូតដល់ម៉ោង១២អាធ្រាត្រ បាញ់កាំជ្រួច ឆ្លងឆ្នាំតែម្ដង។
នៅក្នុងរបាយការណ៍របស់មន្ទីរទេសចរណ៍ខេត្តសៀមរាបដដែល បានបញ្ជាក់ថាចំនួនអ្នកទេសចរនាថ្ងៃឆ្លងឆ្នាំ២០១៨-២០១៩នេះ មានចំនួនសរុប២៨៤,០៣១នាក់ មានការកើនឡើង៧.៩៦ភាគរយ បើធៀបរយៈពេលដូចគ្នានឹងឆ្នាំ២០១៧ ដែលមានចំនួនត្រឹមតែ២៦៣,០៨៥នាក់។ ក្នុងនោះ អ្នកទេសចរអន្តរជាតិមានចំនួនសរុប ៣៤,០៣១នាក់ កើនឡើង២.៨៦ភាគរយ និងអ្នកទេសចរជាតិមានចំនួនប្រមាណ២៥ម៉ឺននាក់ មានការកើនឡើង ៨.៧០ភាគរយ។
ជាមួយនឹងកំណើនអ្នកទេសចរក្នុងខេត្តសៀមរាបនេះ លោកឧត្តមសេនីយ៍ត្រី ភឹង ចិន្តារ៉េត ស្នងការរងនគរបាលខេត្តសៀមរាប បានឲ្យដឹងថា ក្នុងរាត្រីឆ្លងឆ្នាំសាកលនេះកម្លាំងអាជ្ញាធរ បានពង្រឹងសន្តិសុខបានល្អ និងមិនមានបទល្មើសអ្វីធំដុំគួរឲ្យកត់សម្គាល់នោះទេ។
អត្ថបទ និង រូបថត : លោក ជា ស្រស់
កែសម្រួលអត្ថបទ : លោក សេង ផល្លី