សម្រាប់ជាការលើកទឹកចិត្ត និងថែរក្សាយុទ្ធគុនបុរាណខ្មែរ ល្បុក្កតោ ម្ចាស់គម្រោងភូមិដ្ឋានសំណាង ដែលជាគម្រោងលក់ដីឡូតិ៍ និងផ្ទះល្វែង បានបរិច្ចាគដីមួយកន្លែងនៅក្នុងស្រុកប្រាសាទបាគង ក្នុងខេត្តសៀមរាប ជូនដល់បណ្ឌិតសភាល្បុក្កតោ សម្រាប់បម្រើដល់ការបណ្តុះបណ្តាលវិស័យ ក្បាច់គុននេះ ដល់យុវជនជំនាន់ក្រោយ។
លោ ឡាយ សំណាង ម្ចាស់គម្រោងភូមិដ្ឋានសំណាង បានលើកឡើងថា ដើម្បីចូលរួមថែរក្សានូវមរតកដូនតា ជាពិសេសក្បាច់គុនល្បុក្កតោ ដែលកំពុងតែប្រឈមនឹងការខ្វះខាតទីតាំង សម្រាប់បណ្តុះបណ្តាលដល់យុវជនជំនាន់ក្រោយនោះ រូបលោក និងម្ចាស់ភាគហ៊ុនទាំងអស់ បានសម្រេចធ្វើការប្រគល់ដីជូនបណ្ឌិតសភាល្បុក្កតោ ដែលមានលោកគ្រូតា ក្រមាមាស សាន គឹមស៊ាន ប្រធានសហព័ន្ធគុនល្បុក្កតោជាតំណាង ។
លោកបានបញ្ចាក់ថា ដីដែលបានប្រគល់ជូនបណ្ឌិតសភាល្បុក្កតោនេះ មានទំហំ៦៥០ម៉ែត្រក្រឡា ក្រៅអំពីដី ខាងលោកក៏នឹងសាងសង់ផ្ទះ រួមទាំងរបងព័ទ្ធជុំវិញជូនផងដែរ។
តាំងនាម ឲ្យសហព័ន្ធគុនល្បុក្កតោ និងបណ្ឌិតសភាល្បុក្កតោ លោកគ្រូតា ក្រមាមាស សាន គឹមស៊ាន បានថ្លែងនូវការអរគុណយ៉ាងជ្រាលជ្រៅចំពោះភូមិដ្ឋានសំណាង ដែលបានយកចិត្តទុកដាក់ជួយប្រកបដោយឆន្ទៈយ៉ាងពិតប្រាកដ ដល់គុនល្បុក្កតោ ដែលជាក្បាច់គុនរបស់បុព្វបុរសខ្មែរពិតៗ។
លោកគ្រូ សាន គឹមស៊ាន បានបន្ថែមថា ការផ្តល់ជូននេះ គឺជាកម្លាំងចិត្តបន្ថែមទៀតសម្រាប់លោកតា ក៏ដូចជាអ្នកស្នេហាវិស័យ ក្បាច់គុនល្បុកតោនេះ ឲ្យខិតខំប្រឹងប្រែងបន្តទៀតក្នុងការនាំយកក្បាច់គុនបុរាណមួយនេះទៅកាន់ពិភពលោក។
សូមបញ្ជាក់ថា ក្រៅពីការប្រគល់ដីទំហំ ៦៥០ម៉ែត្រក្រឡា ជូនដល់បណ្ឌិតសភាល្បុក្កតោ ម្ចាស់គម្រោងភូមិដ្ឋានសំណាង ក៏បានធ្វើការប្រកាសថា ខ្លួននឹងធ្វើការប្រគល់ជូនដីដល់វីរសិល្បករចំនួន១២នាក់ ក្នុងម្នាក់ទទួលបានដីមួយឡូតិ៍ មានទីតាំងនៅភូមិគោកត្រាច ឃុំបាគង ស្រុកប្រាសាទបាគង ខេត្តសៀមរាបបន្ថែមទៀត។
រូបថត និងអត្ថបទ: លោក ជា ស្រស់
សម្រួលអត្ថបទ : លោក សេង ផល្លី
