វត្តអារាមក្នុងខេត្តសៀមរាប ក៏ជាផ្នែកមួយក្នុងការលើកម្ពស់វិស័យទេសចរណ៍ក្នុងខេត្ត ដែលបានផ្សព្វផ្សាយពីជំនឿ ប្រពៃណី និងជីវភាពរស់ប្រចាំថ្ងៃរបស់ប្រជាពលរដ្ឋខ្មែរ ដោយឡែកជាមួយនឹងសក្ដានុពលទេសចរណ៍នេះ សេវាករទេសចរណ៍ គួរបកស្រាយឲ្យបានច្បាស់ចៀងវាង ការបំផ្លាញសាសនារបស់រដ្ឋដោយមិនដឹងខ្លួន។
លោក វណ្ណ ប៊ុនណា ប្រធានមន្ទីរធម្មការ និងសាសនាខេត្តសៀមរាប បានឱ្យដឹងនៅព្រឹកថ្ងៃទី២៦ខែធ្នូ ឆ្នាំ២០១៨ នេះថា បន្ទាប់ពីក្រសួងទេសចរណ៍សហការជាមួយក្រសួងធម្មការ និងសាសនា បំផុសឱ្យមានវត្តអារាមទេសចរណ៍មក បច្ចុប្បន្នមន្ទីរធម្មការ និងសាសនាខេត្តសៀមរាប មានគម្រោងស្នើដាក់វត្តចំនួន៥ នៅក្នុងក្រុងសៀមរាបជាវត្តអារាមទេសចរណ៍ ក្នុងមានវត្តព្រះព្រហ្មរត្ន័ វត្តរាជបូព៌ វត្តដំណាក់ វត្តថ្មី និងវត្តស្វាយមៀត ប៉ុន្តែគម្រោងនេះមិនទាន់សម្រេចនៅឡើយទេ ដោយរង់ចាំការពិភាក្សាពីក្រុមមន្ត្រីជំនាញ។
តាមការបញ្ជាក់របស់ ព្រះតេជគុណ វិមុលសំវ ភទ្ទកោ នឿម វុទ្ធី ព្រះគ្រូចៅអធិការវត្តស្វាយរមៀត ព្រះអង្គមានសង្ឃដីកាថា វត្តបារាយណ៍នទី រតនារាម ហៅ វត្តស្វាយមៀត មានអ្នកទេសចរមកទស្សនានៅវត្តនេះ មិនដែលដាច់ឡើយ ហើយក្នុង១ខែៗ មានភ្ញៀវទេសចរបរទេសប្រមាណជា១៥០ទៅ២០០នាក់បានចូលមកទស្សនានៅក្នុងទីវត្តអារាមនេះ។
លោក អែលលីវ បារ អ្នកទេសចរជនជាតិអាមេរិកកាំង ដែលបានទៅទស្សនា និងទទួលបានព្រះសង្ឃប្រោះព្រំ សុំសេចក្ដីសុខនៅវត្តស្វាយមៀតនោះ បានមានប្រសាសន៍ថា ពេលមកដល់ប្រទេសកម្ពុជាលោកចង់ដឹងពីវប្បធម៌ទំនៀមទំលាប់ និងការគោរពសាសនារបស់ប្រជាពលរដ្ឋខ្មែរ ដូច្នេះបានជាបន្ទាប់ពីទស្សនាប្រាសាទ លោកសម្រេចចិត្តមកទស្សនាវត្តស្វាយរមៀតនេះ ដើម្បីបានស្វែងយល់ច្បាស់ពីការគោរពប្រតិបត្តិព្រះពុទ្ធសាសនារបស់ប្រជាពលរដ្ឋខ្មែរ។
តាមការបញ្ចេញមតិអំពី ការទាក់ទាញភ្ញៀវទេសចរ តាមរយៈវត្តអារាម កញ្ញារ៉ាន្នី យល់ឃើញថាវាជារឿងល្អ ដែលភ្ញៀវទេចរបរទេសចាប់អារម្មណ៍ពីទំនៀមទំលាប់សាសនារបស់ប្រជាពលរដ្ឋខ្មែរ។ ប៉ុន្តែកញ្ញា យល់ថាការប្រោសព្រំសុំសេចក្ដីសុខ ពុំមែនជាការណែនាំរបស់ព្រះពុទ្ធសាសនាឡើយ។
សំឡេងសម្ភាសន៍(មានក្នុងវីដេអូ)
ដើម្បីឲ្យអារាមទេសចរណ៍ក្លាយទៅផ្នែកមួយនេះ ក្នុងការលើកកម្ពស់វិស័យទេសចរណ៍ក្នុងប្រទេសប្រកបដោយភាពជោគជ័យ ក្រសួង មន្ទីរ អង្គភាព សេវាករទេសចរណ៍ ពាក់ព័ន្ធទាំងអស់ ចាំបាច់ត្រូវសិក្សា ពីផលប៉ះពាល់នានា ចៀសវាងការផ្សព្វផ្សាយទំនៀមទំលាប់ប្រពៃណី សាសនា ប្រាសចាកពីប្រភពដើម និងគួរបកស្រាយឲ្យបានច្បាស់ទៅដល់ភ្ញៀវទេសចរ តាមរយៈមគ្គុទេសទេសចរ ដែលមានវិជ្ជាជីវៈច្បាស់លាស់។
សូមបញ្ជាក់ថា កន្លងមកនេះក្រសួងទេសចរណ៍ បានសហការជាមួយក្រសួងធម្មការ និងសាសនា សមាគមទីភ្នាក់ងារទេសចរណ៍កម្ពុជា(CATA) រួមជាមួយមន្ទីរ-ស្ថាប័នពាក់ព័ន្ធ បានរៀបចំទីវត្តអារាម ដែលមានភាពលេចធ្លោជាងគេ ដើម្បីឲ្យទីអារាមនេះ ក្លាយទៅជាកន្លែងទេសចរណ៍ ដ៏ទាក់ទាញ សម្រាប់ចូលរួមគាំទ្រសក្តានុពលទេសចរណ៍ ក្នុងខេត្ត ឱ្យកាន់តែរីកចម្រើនឡើងថែមទៀត ពិសេសដើម្បីពង្រីកកិច្ចអភិរក្ស និងអភិវឌ្ឍន៍៕
អត្ថបទ និង រូបថត : លោក ទ្រា ពន្លឺ
កែសម្រួលអត្ថបទ : លោក សេង ផល្លី
