តាមរយៈរបាយការណ៍ ការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប ករណីគ្រោះថ្នាក់ចរាចរណ៍ ៩ខែ ក្នុងឆ្នាំ២០១៨ មាន៧១ករណី គឺមានចំនួនថយចុះ ប្រៀបធៀបទៅនឹងរយៈពេលដូចគ្នាក្នុងឆ្នាំ២០១៧ដែលមានចំនួន១០០ករណី។
នៅថ្ងៃទី២៥ ខែធ្នូ ឆ្នាំ២០១៨នេះ ក្នុងយុទ្ធនាការសុវត្ថិភាពចរាចរណ៍ ដើម្បីពញ្ញាក់ស្មារតីដល់អ្នកប្រើប្រាស់ផ្លូវឱ្យមានការប្រុងប្រយ័ត្ន លោក វរៈសេនីយ៍ឯក ជិម សុវណ្ណ នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានធ្វើសេចក្ដីរាយការណ៍ថា អាត្រាគ្រោះថ្នាក់ចរាចរណ៍ក្នុងខេត្ត បង្កដោយកត្តាមនុស្សគឺការបើកបរហួសល្បឿកំណត់ បើកវ៉ាជែងដោយមិនប្រុងប្រយ័ត្នមិនគោរពសិទ្ឋអាទិភាព បើកបរក្នុងស្ថានភាពស្រវឹងនិងងុយដេក ចំពោះកត្តាយានយន្តគឺយានយន្តខ្លះចាស់ទ្រុឌទ្រោម និងមិនបានទៅត្រួតពិនិត្យលក្ខណៈបច្ចេកទេសឱ្យបានត្រឹមត្រូវទៅតាមការកំណត់ ជាដើម។ល។
ថ្លែងនៅក្នុងឱកាសនោះ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោកក្រសួងសាធារណការនិងដឹកជញ្ជូន មានប្រសាសន៍ថា៖ ដើម្បីក្រើនរំលឹកដល់អ្នកបើកបរទាំងអស់នៅលើដងផ្លូវ ក្រសួង បានរៀបចំយុទ្ធនាការ ចែកមួកសុវត្ថិភាពចំនួន១០ម៉ឺនមួក ក្នុងក្របខ័ណ្ឌទូទាំងប្រទេស ខណៈគិតមកដល់ពេលនេះចែកបានប្រមាណជា៧ម៉ឺនមួកហើយ ចែកជូនដល់ប្រជាពលរដ្ឋដែលឆ្លើយត្រូវទៅនឹងសំនួរពាក់ព័ន្ឋទៅនឹងសុវត្ថិភាពចរាចរណ៍ ការបើកបរ និងការពាក់មួកសុវត្ថិភាព។
លោក បញ្ជាក់ថា៖ ការពាក់មួកសុវត្ថិភាពបានត្រឹមត្រូវ អាចជួយការពារនិងកាត់បន្ថយគ្រោះថ្នាក់ប៉ះទង្គិចធ្ងន់ធ្ងរដល់ក្បាល និងជួយការពារភ្នែកពីធុលីនិងសម្រាមផងដែរ។
លោកបានបន្ថែមថា៖ ឥរិយាបទនៃការបើកបរយានយន្តសព្វថ្ងៃ ភាគច្រើនបើកវ៉ាជែងក្នុងស្ថានភាពគ្រោះថ្នាក់ និងខ្វះការប្រុងប្រយ័ត្ន។ ករណីគ្រោះថ្នាក់ដោយបើកវ៉ាជែងនេះ បានឡើងមកនៅលំដាប់ទី៣ ឬទី២ហើយ ខណៈដែលការបើកបរលើសល្បឿនកំណត់ស្ថិតក្នុងលំដាប់ទី១នៅឡើយ ហេតុនេះសូមអ្នកបើកបរយានយន្តគ្រប់ប្រភេទចូលរួមគោរពច្បាប់ស្តីពីសុវត្ថិភាពចរាចរណ៍ផ្លូវគោកទាំងអស់គ្នា គោរពស្លាកសញ្ញា បើកបរតាមល្បឿនកំណត់ កុំបើកវ៉ាជែង បើស្រវឹងកុំបើកបរ ត្រូវនឹកឃើញ ជានិច្ចនូវ ប្រសាសន៍របស់សម្តេចតេជោ ហ៊ុន សែន នាយករដ្ឋមន្ត្រី ថ្ងៃនេះថ្ងៃស្អែកកុំឱ្យមានគ្រោះថ្នាក់ចរាចរណ៍។
សូមជម្រាបជូនថា យុទ្ធនាការសុវត្ថិភាពចរាចរណ៍ដើម្បីពញ្ញាក់ស្មារតីដល់អ្នកប្រើប្រាស់ផ្លូវឱ្យមានការប្រុងប្រយ័ត្ននេះ រៀបចំដោយ នាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន សហការជាមួយ អគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក និងមន្ទីរសាធារណការ និងដឹកជញ្ជូនខេត្តសៀមរាប ស្នងការដ្ឋាននគរបាលខេត្ត កងរាជអាវុធហត្ថខេត្ត បានចុះធ្វើយុទ្ធនាការសុវត្ថិភាពចរាចរណ៍ដើម្បីពញាក់ស្មារតីដល់អ្នកប្រើប្រាស់ផ្លូវឱ្យមានការប្រុងប្រយ័ត្ន នៅតាមបណ្តោយជាតិលេខ៦ ស្ថិតក្នុង ភូមិចុងកៅស៊ូ សង្កាត់ស្លរក្រាម ក្រុងសៀមរាប ខេត្តសៀមរាប។
យុទ្ធនាការអប់រំផ្សព្វផ្សាយនេះក៏ទទួលបានការចូលរួមជាអធិបតីភាពដោយ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ និង លោក ពិន ប្រាកដ អភិបាលរង ខេត្តសៀមរាបផងដែរ។
ក្នុងយុទ្ធនាការនេះ មានការចែកជូននូវឯកសារពាក់ព័ន្ធនឹងច្បាប់ស្តីពីសុវត្ថិភាពចរាចរណ៍ផ្លូវគោក និងការរៀបចំជាកម្មវិធីសួរឆ្លើយសំណួរស្តីពីច្បាប់ និងសុវត្ថិភាពចរាចរណ៍ផ្លូវគោក និងការរឹតបន្តឹងការអនុវត្តច្បាប់ចរាចរណ៍ផ្លូវគោក។
ជាលទ្ធផលនៅក្នុងយុទ្ធនាការនេះបានចែកជូននូវសម្ភារមួយចំនួនដូចជា៖
១.មួកសុវត្ថិភាព ២០០មួក (មួកសម្រាប់មនុស្សធំចំនួន ១៤០មួក មួកកុមារចំនួន ៦០មួក)
២.សៀវភៅច្បាប់ស្តីពីចរាចរណ៍ផ្លូវគោក ៥០០ក្បាល
៣.សៀវភៅណែនាំចរាចរណ៍ អ្វីដែលអ្នកបើកបរម៉ូតូត្រូវយល់ដឹង ៥០០ក្បាល
៤.ខិតបណ្ណជំនួយស្មារតីស្តីពីសុវត្ថិភាពចរាចរណ៍ផ្លូវគោក ១.០០០ ច្បាប់
៥.ផ្លិតសុវត្ថិភាព (ជំហ៊ានសុវត្ថិភាព) ២៥០ផ្លិត។
អត្ថបទ និង រូបថត : លោក យូ វង្ស
កែសម្រួលអត្ថបទ : លោក សេង ផល្លី
