ថ្លែងក្នុងឱកាសសម្ពោធបើកឱ្យដំណើរការជាផ្លូវការភោជនីយដ្ឋាន Cambo Beach នៅក្នុងក្រុងសៀមរាប នារាត្រីថ្ងៃទី២៤ខែធ្នូ ឆ្នាំ២០១៨ លោក ពិន ប្រាកដ អភិបាលរងខេត្តសៀមរាប បានមានប្រសាសន៍គាំទ្រនិងជំរុញបន្ថែមដោយបានផ្តល់អនុសាសន៍មួយចំនួនដល់ផ្នែកឯកជន ដែលកំពុងប្រកបអាជីវកម្ម និង មានការរីកដុះដាលជាបន្តបន្ទាប់ក្នុងខេត្តសៀមរាប ជាពិសេសជូនដល់ម្ចាស់ភោជនីយដ្ឋាន Cambo Beach ឱ្យពង្រឹងគុណភាពសេវាកម្ម បន្តចូលរួម ដល់កិច្ចការពារបរិស្ថាន ដើម្បីនិរន្តរភាពគោលដៅទេសចរណ៍ស្អាត និងបៃតង និងត្រូវចូលរួមដល់ការជម្រុញការប្រើប្រាស់ផលិតផលក្នុងស្រុកផងដែរ។
លោក អភិបាលរងខេត្តបានមានប្រសាសន៍ថា៖ ដោយមានគោលនយោបាយ និងយុទ្ធសាស្ត្រដ៏ត្រឹមត្រូវរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំដ៏ឆ្លើម ក្នុងនីតិកាលទី៥ នៃរដ្ឋសភា កន្លងទៅនេះ បានធ្វើការពុះពារជំនះលើឧបសគ្គធំៗ ដឹកនាំជោគវាសនាកម្ពុជាឈានទៅ សម្រេចបានសមិទ្ធផលធំធេង និងជោគជ័យយ៉ាងត្រចះត្រចង់ ក្នុងកិច្ចអភិវឌ្ឍសេដ្ឋកិច្ចសង្គម ដែលបានរួមចំណែកក្នុងការកាត់បន្ថយភាពក្រីក្ររបស់ប្រជាពលរដ្ឋជាបណ្តើរៗ។
លោក បញ្ជាក់ថា៖ នោះជាបុព្វហេតុនៃការរីកចម្រើនសម្រាប់ខេត្តសៀមរាប លើគ្រប់វិស័យ ដែលកំពុងរួមចំណែកកសាងសេដ្ឋកិច្ចសង្គមជាតិ លើកកម្ពស់ជីវភាពជូនប្រជាពលរដ្ឋយើងជាបន្តបន្ទាប់ តាមរយៈការ ជួយសម្របសម្រួល ការលើកទឹកចិត្ត និងកត្តាជម្រុញផ្សេងៗទៀត តាមការសង្កេតនូវសន្ទុះសេដ្ឋកិច្ចរបស់ខេត្ត ក្នុងរយៈពេល១០ ចុងក្រោយឃើញមានកំណើនប្រកបដោយសក្តានុពល ឈានឡើងយ៉ាងខ្លាំង ជីវភាពរស់នៅកាន់តែប្រសើរ និងសេវាកម្មផ្សេងៗកាន់តែមានប្រសិទ្ធភាព និងសកម្មភាពផុសផុលទ្វេឡើងជារៀងរាល់ឆ្នាំ។
ឯ.ឧបញ្ផាក់ថា ខេត្តសៀមរាប គឺជាប៉ូលសេដ្ឋកិច្ចដ៏សំខាន់របស់ប្រទេស ដោយផ្អែកលើសក្តានុពល នៃវិស័យទេសចរណ៍ ព្រោះតែភាពសម្បូរបែប នៃសម្បតិ្តវប្បធម៌ រមណីយដ្ឋានប្រវត្តិសាស្ត្រធម្មជាតិ ជាពិសេសប្រាសាទអង្គរវត្ត ដែលជាសម្បត្តិបេតិកភណ្ឌពិភពលោក ព្រមទាំងកេរ្តិ៍មរតក វប្បធម៌ដ៏សម្បូរបែបផ្សេងៗទៀត ដែលធ្វើឱ្យភ្ញៀវទេសចរមកទស្សនា ខេត្តសៀមរាប មានការកើនឡើងជាលំដាប់។
ជាក់ស្តែងក្នុងឆ្នាំ២០១៧ ខេត្តសៀមរាបទទួលបានភ្ញៀវទេសចរអន្តរជាតិ និងអន្តរជាតិ ចូលមកទស្សនាខេត្តសៀមរាប មានចំនួន ៥.៥៤៣.៤៣៤ (ប្រាំលានហាសិបបួនម៉ឺនបីពាន់បួនរយសាមសិប បួន)នាក់ មានការកើនឡើង៩,៩៣% បើប្រៀបធៀបទៅនឹងរយៈពេលដូចគ្នាក្នុងឆ្នាំ២០១៦។
ដោយឡែកសម្រាប់រយៈពេល ០៩ខែ ឆ្នាំ២០១៨នេះ ភ្ញៀវទេសចរជាតិ-អន្តរជាតិ ចូលមកទស្សនាខេត្ត សៀមរាប មាន ៤.៤៥០.៧៣២ (បួនលានបួនរយហាសិបពាន់ប្រាំពីររយសាមសិបពីរ)នាក់ កើនឡើង៨,៥៥% បើប្រៀបធៀបទៅនឹងរយៈពេលដូចគ្នាក្នុងឆ្នាំ២០១៧ ហើយតាមរយៈកំណើន នៃភ្ញៀវទេសចរទាំងនេះ យើងបានបង្កើនការងារជូនបងប្អូនប្រជាពលរដ្ឋក្នុងខេត្ត ប្រមាណ ២៨ម៉ឺននាក់ ដោយក្នុងនោះផ្តល់ការងារដោយផ្ទាល់ចំនួន ៨ម៉ឺននាក់ និងដោយប្រយោលប្រមាណជា២០ម៉ឺននាក់។ ទន្ទឹមនឹងការរីកចម្រើនលើវិស័យទេសចរណ៍ វិស័យផ្សេងៗទៀត ក៏មានសន្ទុះទៅមុខឥតឈប់ឈរដែរ។
ក្រៅពីនោះខេត្តបានធានាឱ្យមានសន្តិសុខ សុវត្ថិភាពល្អប្រសើរ និងពង្រឹងនីតិរដ្ឋសម្រាប់ការរស់នៅ ប្រចាំថ្ងៃ ការប្រកបអាជីវកម្ម ការធ្វើពាណិជ្ជកម្ម របស់ប្រជាពលរដ្ឋទូទៅ អ្នកវិនិយោគ ព្រមទាំងដំណើរកម្សាន្តសប្បាយរបស់ភ្ញៀវទេសចរជាតិ និងអន្តរជាតិទាំងឡាយផងដែរ។ មួយវិញទៀតអាជ្ញាធរខេត្ត បាននិងកំពុងរៀបចំ និងអនុវត្តនូវផែនការកែលម្អសោភ័ណភាពខេត្តឱ្យសក្តិសមជាទីក្រុងទេសចរណ៍ វប្បធម៌ប្រវត្តិសាស្ត្រធម្មជាតិ តាមរយៈការស្តារ និងកសាងហេដ្ឋារចនាសម្ព័ន្ធរូបវ័ន្តនានា ស្របគ្នានឹងការយកចិត្តទុកដាក់ខ្ពស់ដល់ភ្ញៀវទេសចរជាតិ និងអន្តរជាតិ ដែលមកទស្សនា នៅខេត្តសៀមរាប។
អត្ថបទ និង រូបថត : លោក អ៊ិន សីហរិទ្ធ
