ថ្ងៃរះ មិនមានអ្វីជាការចំឡែកទេសម្រាប់ប្រជាជនកម្ពុជាទេ ដោយសារប្រទេសកម្ពុជាមានស្ថានភាពអំណោយផលលើអាកាសធាតុ ប៉ុន្តែបច្ចុប្បន្នមនុស្សវ័យជំទង់ និងកណ្ដាលមួយចំនួន ក្នុងខេត្តសៀមរាប បានចាប់អារម្មណ៍ការទៅមើលថ្ងៃរះ ជាពិសេសពួកគេបានជ្រើសរើសកន្លែងមើលប្លែកៗ ដែលជាចំណីអារម្មណ៍មួយបែប ទៅតាមវ័យ និងការចូលរចិត្តរបស់ពួកគេ។
ដោយសារទឹកចិត្តស្រឡាញ់ទេសភាពធម្មជាតិ និងការថតរូប លោក ឃីម វិទូ បានបង្ហោះរូបភាព និងវីដេអូនៅលើបណ្ដាញសង្គមហ្វេសប៊ុករបស់លោក ដើម្បីបង្ហាញនិងផ្សព្វផ្សាយនូវទីកន្លែង ដែលលោកធ្លាប់បានទៅដល់។ តួយ៉ាងការស្វែងរកទីកន្លែងមើលថ្ងៃរះ នៅលើភ្នំគូលែន លោកបានមកដល់ពើងថ្មជ្រួញនេះជាច្រើនដងមកហើយ ប៉ុន្តែលោកនៅតែចង់មកមើល ទេសភាពនៅពេលថ្ងៃរះទីនេះម្ដងហើយម្ដងទៀត មិនជិនណាយឡើយ។ ដើម្បីមកឲ្យទាន់ថ្ងៃរះ លោកត្រូវក្រោកពីព្រលឹមស្រាងៗយ៉ាងហោចណាស់នៅម៉ោង ៣:៣០ នាទីព្រឹក និងជិះម៉ូតូ ដើម្បីឆ្ពោះទៅកាន់ពើងជ្រួញ ដែលជាទីកន្លែង សម្រាប់មើលថ្ងៃរះ ស្ថិតនៅក្នុងឧទ្យានជាតិព្រះជ័យវរ្ម័ន-នរោត្តមនៅលើភ្នំគូលេន ដែលមានចម្ងាយប្រហែល ៥៥ គីឡូម៉ែត្រពីទីរួមខេត្តសៀមរាប។
លោក វិទូ បានបញ្ជាក់ដោយក្ដីមោទកភាពថា លោកស្រលាញ់ និងពេញចិត្តនឹងអ្វីដែលខេត្តសៀមរាបមាន ដូចជាតំបន់ ប្រាង្គប្រាសាទ រមណីយដ្ឋានធម្មជាតិ សំណង់ទីក្រុងពីសង្គមចាស់ និងតំបន់ទេសចរណ៍បែបកែច្នៃជាដើម។ ហើយគោលបំណងធំរបស់លោក ធ្វើដំណើរទៅរមណីយដ្ឋានទាំងនោះ គឺដើម្បី ផ្សព្វផ្សាយដល់ពីសក្ដានុពលទេសចរណ៍របស់ខេត្តសៀមរាប។
លោកបានបញ្ជាក់បន្ថែមថា កន្លែងភាគច្រើនដែលលោកទៅដល់ មិនមែនលោកជាមនុស្សទីមួយទេ ដែលស្គាល់ ប៉ុន្ដែកន្លែងទាំងនោះ មានអ្នកស្គាល់មានចំនួនតិចជាក់ស្ដែងទីកន្លែងពើងជ្រួញនេះតែម្ដង។
ព្រមជាមួយនឹងទឹកចិត្តចង់ កន្លែងពើងជ្រួញនេះ ក៏ដូចជាតំបន់ទេសចរណ៍ក្នុងខេត្តសៀមរាប មានការចាប់អារម្មណ៍កាន់តែច្រើន លោកក៏មាន ការព្រួយបារម្ភយ៉ាងខ្លាំង នៅពេលមានកំណើនមនុស្ស បានស្គាល់កន្លែងទេសចរណ៍ មានទេសភាព និងបរិស្ថានស្រស់បំព្រង ត្រូវបានបំផ្លាញដោយមនុស្សគ្មានសីលធម៌ក្នុងការរស់នៅមួយចំនួន ដែលចោលសំរាមគ្មានសណ្ដាប់ធ្នាប់ និងបំផ្លាញសោភណ្ឌភាពបរិស្ថានផ្សេងៗជាដើម។
តាមរយៈទំព័រហ្វេសប៊ុក របស់លោក ឈ្មោះ ពនេចរថតរូប – Cambodia Wandering Photography ក្រុមរបស់លោកមានដំណើរកំសាន្តផ្សងព្រេងទៅតាមបណ្ដាខេត្តជាច្រើន មិនត្រឹមតែនៅក្នុងខេត្តសៀមរាបនោះឡើយ ប៉ុន្តែលោកមើលឃើញថាទេសភាព និងតំបន់ទេសចរណ៍នៅក្នុងខេត្តសៀមរាប មានភាពសំបូរបែប ហើយងាយស្រួលក្នុងការទៅទស្សនាជាងបណ្ដាខេត្តដទៃទៀត លោកចង់បង្ហាញអំពីសក្ដានុពលនៃតំបន់ទាំងនេះ ទៅដល់អង្គភាពពាក់ព័ន្ធ ក៏ដូចជាអ្នកទេសចរជាតិ និងអន្តរជាតិដទៃទៀតបានស្គាល់ ព្រមទាំងចូលរួមបំផុសទៅដល់ពួកគេឲ្យជួយអភិរក្ស ថែរក្សា ការពារបរិស្ថាន និងសម្បត្តិធម្មជាតិដែលយើងកំពុងមាន ឲ្យនៅមានភាពស្រស់ស្អាតយូរអង្វែង ដើម្បីទាក់ទាញភ្ញៀវទេសចរក្នុងនិងក្រៅប្រទេស មកទស្សនាប្រទេសកម្ពុជាឲ្យកាន់តែច្រើន និងទុកជាមរតកសម្រាប់មនុស្សជំនាន់ក្រោយ។
(រូបភាព និងវីដេអូមួយចំនួនផ្ដល់ដោយ ពនេចរថតរូប – Cambodia Wandering Photography)
