ប្រសិនបើសិស្សថ្នាក់ទី១ ពុំអាចមានចំណេះដឹងមូលដ្ឋាន ផ្នែកអាន និងសរសេរល្អទេនោះ ការសិក្សារបស់ពួកគេនឹងចុះខ្សោយ និងមិនងាយយល់មេរៀននៅពេលពួកគេឡើងទៅថ្នាក់បន្ទាប់ឡើយ។
ក្នុងអង្គសិក្ខាសាលាបំប៉នលើកទី២ ស្តីពីការអនុវត្តសាកល្បង កញ្ចប់សម្ភារៈអំណានថ្នាក់ដំបូងរយៈពេល៣ថ្ងៃនេះ ក្រសួងអប់រំ យុវជន និងកីឡា បានធ្វើការបណ្ដុះបណ្ដាលដល់ លោកគ្រូ អ្នកគ្រូ ថ្នាក់ទី១ មកពីស្រុកពួក ស្រុកស្រីស្នំ ក្រឡាញ់ និង ស្រុកវារិន សរុបចំនួន៤០៩នាក់។
នាព្រឹកថ្ងៃទី២២ ខែធ្នូ ឆ្នាំ២០១៨ ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡា មានប្រសាសន៍ថា ចាប់តាំងពីមានសេចក្តីប្រកាស ដាក់ឲ្យអនុវត្តជាផ្លូវការ គម្រោងជំនួយបច្ចេកទេសសម្រាប់អំណានថ្នាក់ដំបូងកាលពីចុងខែកក្កដាឆ្នាំ២០១៧នៅខេត្តកែប និង ផ្អែកតាមលទ្ធផលនៃការស្រាវជ្រាវនានា បានបង្ហាញថា ៖ បើសិនជាសិស្សថ្នាក់ទី១ មិនមានចំណេះដឹងមូលដ្ឋានផ្នែកអាននិងសរសេរទេនោះ ពួកគេនឹងមិនអាចរៀនបន្ត នៅកម្រឹតថ្នាក់បន្ទាប់បានឡើយ ។ ( បទសម្ភាសន៍ ឯឧ ហង់ ជួន ណារ៉ុន )(នៅក្នុងវីដេអូ)
ឯកឧត្តមបញ្ជាក់បន្ថែមថា ៖ ការជួយបន្ថែម លើការបង្រៀននិងរៀន នៅកម្រឹតថ្នាក់ដំបូង គឺជាអាទិភាពចម្បងបំផុត សម្រាប់ការត្រួសត្រាយផ្លូវក្នុងជីវិតសិក្សារបស់សិស្សានុសិស្ស ក៏ដូចជាការពង្រឹងគុណភាពនៃការបណ្តុះបណ្តាលធនធានមនុស្សផងដែរ ។ រាជរដ្ឋាភិបាលកម្ពុជាអណត្តិទី៦ នីតិកាលនៃរដ្ឋសភា បានដាក់ចេញនូវយុទ្ធសាស្ត្រចតុកោណដំណាក់កាលទី៤ ដោយបានចាត់ទុកការអភិវឌ្ឍធនធានមនុស្ស ជាអទិភាពទី ១ ។ ការធ្វើឲ្យប្រសើរឡើងនូវគុណវុឌ្ឍិរបស់គ្រូបង្រៀន ជាពិសេសបច្ចេកទេសក្នុងការបង្រៀននិងរៀន ជាកត្តាអទិភាពដែលក្រសួងកំពុងយកចិត្តទុកដាក់ ។
ឆ្លើយតបទៅនឹងសំណូមពរខាងលើ ក្រសួងបានធ្វើសមាហរណកម្មពីការអនុវត្តរបស់អង្គការដៃគូពាក់ព័ន្ធ ឈរលើមូលដ្ឋានបទពិសោធន៍ ដែលបានមកពីកិច្ចសហការអនុវត្តនៅក្នុងគម្រោងមូលនិធិភាពជាដៃគូសាកល សម្រាប់ការអប់រំ GPE2 បានផលិតសម្ភារៈ និងឯកសារបំប៉នប្រកបដោយគុណភាព មានឈ្មោះថា កញ្ចប់សម្ភារៈអំណានថ្នាក់ដំបូង ដែលរួមមានសៀវភៅណែនាំគ្រូ សៀវភៅជំនួយដល់ការសិក្សារបស់សិស្ស បណ្ណអក្សរនិងរូបភាព និងមានសៀវភៅរឿងខ្លីៗផងដែរ មានរហូតដល់ ៤១ ចំណងជើង ។
ឯកឧត្តមរដ្ឋមន្ត្រីក្រសួងអប់រំ មានប្រសាសន៍ថា ក្រុមគ្រូបង្វឹកនឹងចុះជួយលោកគ្រូអ្នកគ្រូយ៉ាងទៀងទាត់ដើម្បីធានាបានថា អ្វីដែលលោកគ្រូអ្នកគ្រូបានទទួលពីការបំប៉ននេះ អាចយកទៅអនុវត្តបានយ៉ាងត្រឹមត្រូវ និង ចុងក្រោយ គឺសិស្សថ្នាក់ទី១ ទទួលបានចំណេះដឹងជាមូលដ្ឋានផ្នែកអំណានតាមសមាសភាគទាំង៥ ( ការស្គាល់សូរ ស្គាល់តួអក្សរ ចេះអានពាក្យ អានបានស្ទាត់ និងអានយល់ន័យ ) និង ដំណាក់កាលមួយទៀត គឺចេះសរសេរបានត្រឹមត្រូវ ទាំងអស់គ្នា ៕
អត្ថបទ និង រូបថត : លោក ងិន គឹមឡេង
កែសម្រួលអត្ថបទ : លោក សេង ផល្លី
