និស្សិតសាកលវិទ្យាល័យនៃសាធារណៈរដ្ឋកូរ៉េ ធ្វើទស្សនៈកិច្ចសិក្សានៅសាលាបឋមសិក្សាគោកត្នោត ក្នុងក្រុងសៀមរាប ដើម្បីចែករំលែកការលើកកម្ពស់វិស័យអប់រំ និងអំពើមនុស្សធម៌។
លោកគ្រូសាស្រាចារ្យ ផាក ជូន ហ៊ូន (Park Joon Hoon) នាយកសាកលវិទ្យាល័យជាតិកូរ៉េ (Korea National University of Transportation) នៃសាធារណះរដ្ឋកូរ៉េ បានមានប្រសាសន៍ថា តាំងតែពីឆ្នាំ២០០៧ ដល់បច្ចុប្បន្នសាកលវិទ្យាល័យ បានចុះមកទស្សនៈកិច្ចសិក្សានៅក្នុងសាលាបឋមសិក្សាជាច្រើននៅក្នុងប្រទេសកម្ពុជា ដែលមានចំនួនជាច្រើនដងរួចមកហើយផងដែរ។
ប៉ុន្តែនៅក្នុង២០១៨នេះសាកលវិទ្យាល័យនេះបានចុះមកសាលាបឋមសិក្សា គោកត្នោត ដើម្បីស្វែងយល់បន្ថែមពីវិស័យអប់រំនៅកម្ពុជា ជាពិសេសការអប់រំក្នុងខេត្តសៀមរាប និងចូលរួមជួយធ្វើការងារសង្គម ក្នុងគោលដៅចូលរួមចំណែកជាមួយរាជរដ្ឋាភិបាលកម្ពុជា ក្នុងនាមជាគ្រួសារមនុស្សជាតិតែមួយ បើទោះបីជាមានសញ្ជាតិ និងជំនឿផ្សេងៗគ្នាក៏ដោយ ប៉ុន្តែធ្វើដើម្បីប្រយោជន៍រួម គឺដើម្បីបង្កើតនូវសន្ដិភាពជាសាកលនៅលើពិភពលោក និង រួមចំណែកសកម្មភាពជួយដល់សហគមន៍ក្រីក្រ ព្រមទាំងការចូលរួមអភិវឌ្ឍន៍វិស័យអប់រំនិងសេដ្ឋកិច្ចនៅក្នុងប្រទេសកម្ពុជា។
នៅក្នុងដំណើរទស្សនៈកិច្ចនេះដែរ ក្រុមនិស្សិត បានជួយបង្រៀនដល់សិស្សានុសិស្សនៅក្នុងសាលាបឋមសិក្សាគោកត្នោត ជួលជុលបន្ទប់ទឹក បង្គន់អនាម័យ បំពាក់សម្ភារះសិស្ស សម្រាប់ការិយាល័យ និងសំអាតទីធ្លារសាលា បំពាក់ឧបករណ៏ក្មេងលេង លាបថ្នាំថ្មីលើអាគារសិក្សា ជួសជុលអាគារសិក្សា ជួយប្រក់ដំបូលថ្មីអគាមួយខ្នងមាន៣បន្ចប់ និងបានជួយធ្វើសកម្មភាពមនុស្សធម៌ផ្សេងៗជាច្រើនទៀត ជាពិសេសបានជួយធ្វើម្ហូបអាហារចែកជូនដល់កុមារចំនួន៥០០នាក់នៅក្នុងអង្កការឌែល (DAIL ) បរិភោគផងដែរ។
លោក ពេជ្រ សារ៉ាត់ នាយកសាលាបឋមសិក្សាគោតត្នោត បានថ្លែងអំណរគុណចំពោះនិស្សិតនៃសកលវិទ្យាល័យនៃសាធារណៈរដ្ឋកូរ៉េ ដែលបានជួយជួលជុលសម្ភារ បរិក្ខារ អាគារ ដែលបម្រើឲ្យវិស័យអប់រំក្នុងសាលាគោកត្នោត ព្រមទាំងបានចែករំលែកចំណេះដឹង និងផ្ដល់ស្នាមញញឹមដល់កុមារកម្ពុជា តាមរយៈអំពើមនុស្សធម៌នានាក្នុងដំណើរទស្សនកិច្ចនាំពេលនេះ។
អត្ថបទ និង រូបថត : លោក អ៊ិន សីហរិទ្ធ
កែសម្រួលអត្ថបទ : លោក សេង ផល្លី
