នារសៀលថ្ងៃទី១៩ ខែធ្នូ ឆ្នាំ២០១៨ម្សិលមិញនេះ អាកាសយានដ្ឋានអន្តរជាតិទាំង៣នៅកម្ពុជា រួមមានអាកាសយានដ្ឋានអន្តរជាតិសៀមរាប , អាកាសយានដ្ឋានអន្តរជាតិភ្នំពេញ និង អាកាសយានដ្ឋានអន្តរជាតិក្រុងព្រះសីហនុ បានរៀបចំពិធីអបអរសាទរ កម្ពុជាទទួលបានអ្នកដំណើរឆ្លងកាត់អាកាសយានដ្ឋានអន្តរជាតិទាំង៣ ចំនួន១០លាននាក់ ក្នុងឆ្នាំ២០១៨ ក្នុងនោះអាកាសយានដ្ឋានអន្តរជាតិភ្នំពេញ ទទួលបាន ៥លាន ១សែននាក់ , អាកាសយានដ្ឋានអន្តរជាតិសៀមរាប ទទួលបាន ៤ លាន ៤សែននាក់ និង អាកាសយានដ្ឋានអន្តរជាតិ ក្រុងព្រះសីហនុ ទទួលបានប្រមាណជា ៦សែននាក់ ខណៈដែលឆ្នាំមុន អាកាសយានដ្ឋានអន្តរជាតិទាំង៣នេះ បានអបអរសាទរ ការឆ្លងកាត់នៃអ្នកដំណើរ ៨ លាននាក់ ជាប្រវត្តិសាស្ត្រ ។
នេះជាមោទនភាពមួយ ដែលមកទល់នឹងថ្ងៃនេះ កម្ពុជាបានបម្រើសេវាកម្មជូនអ្នកដំណើរដល់ទៅ១០លាននាក់ ដែលនេះគឺជាកំណត់អត្រាដំបូងបំផុត មិនធ្លាប់មានកន្លងមក ដោយសារតែការខិតខំប្រឹងប្រែងរបស់រាជរដ្ឋាភិបាល ក្រសួងទេសចរណ៍ , រដ្ឋលេខាធិការដ្ឋានអាកាសចរស៊ីវិលកម្ពុជា , អង្គភាពគយនិងរដ្ឋាករ , អគ្គនាយកដ្ឋានអន្តោប្រវេសន៍ និងភ្នាក់ងារឯកជន ក្នុងរយៈពេល៥ឆ្នាំចុងក្រោយនេះ ហើយកិច្ចស្វាគមន៍នៃកម្មវិធីនេះ វាជាពេលវេលាដ៏វិសេសវិសាល ដើម្បីអបអរចំពោះសករាជថ្មី ភាពជាដៃគូសហការការងាររបស់អាកាសយានដ្ឋានអន្តរជាតិទាំងបីនៅកម្ពុជា ។
លោក យ៉ាននិច អៃយើរី នាយកគ្រប់គ្រងទូទៅ អាកាសយានដ្ឋានអន្តរជាតិសៀមរាប បានបញ្ជាក់ថា ជាយុទ្ធសាស្ត្រ ការតភ្ជាប់រវាងអាកាសយានដ្ឋានទាំង៣ក្រោមដំបូលតែមួយ បាននាំមកនូវភាពជោគជ័យដ៏ធំនេះ ព្រោះជាយុទ្ធសាស្ត្រ បានរួមចំណែកដល់ការនាំអ្នកដំណើរកាន់តែច្រើនមកកម្ពុជា ដែលកាលក្នុងអំឡុងឆ្នាំ ១៩៩៥ នៅពេលដែលក្រុមហ៊ុន Cambodia AIRPORTS បានទទួលការទុកចិត្តពីរាជរដ្ឋាភិបាលកម្ពុជា ឲ្យអភិវឌ្ឍន៍អាកាសយានដ្ឋានអន្តរជាតិភ្នំពេញ ឆ្នាំនោះគឺមានអ្នកដំណើរឆ្លងកាត់តែ ៥០ម៉ឺននាក់ប៉ុណ្ណោះ គឺតិចជាង២០ដងបើធៀបនឹងបច្ចុប្បន្ន ហើយពេលនោះគឺមានតែអាកាសយានដ្ឋានតែមួយគត់នៅកម្ពុជា ខណៈបច្ចុប្បន្ននេះ អាកាសយានដ្ឋានអន្តរជាតិទាំង៣នៅកម្ពុជា កំពុងបានបម្រើសេវាកម្មជាង ៦០គោលដៅ និង បានជួយដល់ដំណើរលូតលាស់នៃសេដ្ឋកិច្ចជាតិ ។
ព័ត៌មានជាតិ ថ្មីៗ
លោក ម៉ៅ សុភាព នាយករងអាកាសយានដ្ឋានអន្តរជាតិសៀមរាប លើកឡើងថា ការទទួលភ្ញៀវ១០លាននាក់របស់អាកាសយានដ្ឋានអន្តរជាតិទាំង៣ ក្នុងឆ្នាំ២០១៨នេះ គឺជាការបង្ហាញឲ្យឃើញអំពីការអភិវឌ្ឍន៍មួយដ៏ធំ ក្រោមការអនុវត្តគោលនយោបាយបើកចំហរជើងមេឃរបស់រាជរដ្ឋាភិបាលកម្ពុជា និង ការចូលរួមពីវិស័យឯកជន ហើយតាមរយៈនៃកំណើនភ្ញៀវធ្វើដំណើរឆ្លងកាត់នេះដែរ ប្រព័ន្ធការងារវានឹងទាមទាររកធនធានមនុស្សដើម្បីបំរើសេវាកម្មនៃផ្នែកពាក់ព័ន្ធផងដែរ ដែលនោះគឺជាឱកាសការងារធ្វើ សម្រាប់ប្រជាពលរដ្ឋ ពិសេសគឺយុវជន ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
