លោក ស៊ុ សំអន នាយកសាខាកាកបាទក្រហមកម្ពុជាខេត្តសៀមរាប បានមានប្រសាសន៍ថា ការផ្សារភ្ជាប់សុវត្ថិភាពចរាចរណ៍ពិតជាមានសារៈសំខាន់ណាស់ សម្រាប់ប្រទេសកំពុងអភិវឌ្ឍន៍ដូចកម្ពុជាយើងខណៈពេលដែលមធ្យោបាយយានយន្តមានការកើនឡើង គ្រោះថ្នាក់ចរាចរណ៍កើតឡើងស្ទើររាល់ថ្ងៃ ព្រោះថា គ្រាន់តែរយៈពេល១០ខែក្នុងឆ្នាំ២០១៨នេះ មានករណីគ្រោះថ្នាក់ចរាចរណ៍បានកើតឡើងចំនួន៦៨ករណី ដែលមានជនរងគ្រោះសរុប១៦៥នាក់ ក្នុងនោះស្លាប់ចំនួន៧១នាក់ , របួសធ្ងន់ចំនួន៤៣នាក់ និង រងរបួសស្រាលចំនួន៥១នាក់ ដែលបញ្ហានេះ គឺជាក្តីកង្វល់របស់យើងទាំងអស់គ្នា ។
លោក ស៊ុ សំអន មានប្រសាសន៍ទៀតថា ទាក់ទងទៅនឹងសកម្មភាពអនុវត្តន៍គម្រោងសុវត្ថិភាពចរាចរណ៍ និងពិការភាព ក្នុងពេលកន្លងមក សាខាកាកបាទក្រហមកម្ពុជាខេត្តសៀមរាប បានសហការជាមួយយុវជននិងបណ្តាញសហគមន៍អ្នកស្ម័គ្រចិត្ត ជាពិសេសសហការជាមួយមន្ត្រីចរាចរណ៍ បានដឹកនាំធ្វើការអប់រំ ស្តីពីសុវត្ថិភាពចរាចរណ៍ ដោយការចែកខិតប័ណ្ណនៅតាមដងផ្លូវសាធារណៈ ចូលរួមជួយសម្រួលសុវត្ថិភាពចរាចរណ៍តាមភ្លើងសញ្ញាក្នុងក្រុង ចូលរួមក្នុងយុទ្ឋនាការពាក់មួកនិងខ្សែក្រវ៉ាត់សុវត្ថិភាពឱ្យបានត្រឹមត្រូវ និងចាត់មន្ត្រីចូលរួមធ្វើវាគ្មិនតាមវិទ្យុក្នុងខេត្ត។ល។
លោក ស៊ុ សំអន បានប្រសាសន៍យ៉ាងនេះ នៅក្នុងសិក្ខាសាលាបូកសរុបលទ្ឋផលគម្រោងសុវត្ថិភាពចរាចរណ៍និងពិការភាពសម្រាប់ឆ្នាំ២០១៨ របស់សាខាកាកបាទក្រហមកម្ពុជាខេត្តសៀមរាប នាថ្ងៃទី២០ ខែធ្នូ ឆ្នាំ២០១៨នេះ ក្រោមអធិបតីភាពឯកឧត្តម សម កុសល នាយក នៃនាយកដ្ឋានធនធានមនុស្សកាកបាទក្រហមកម្ពុជា និង វត្តមានមន្ត្រីមកពីស្នាក់ការកណ្តាល ចំនួន៤ខេត្ត នៃគម្រោងសុវត្ថិភាពចរាចរណ៍និងពិការភាព រួមមាន ខេត្តកំពត , ខេត្តពោធិសាត់ , ខេត្តតាកែវ និងខេត្តសៀមរាប ព្រមទាំងយុវជនកាកបាទក្រហមមកពីវិទ្យាល័យមួយចំនួន និងបណ្តាញអ្នកស្ម័គ្រចិត្តក្នុងខេត្តសៀមរាបសរុបចំនួន៤០នាក់ ។
ឯកឧត្តម សម កុសល មានប្រសាសន៍ថា កាកបាទក្រហមកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចគតិព្រឹទ្ឋបណ្ឌិត ប៉ុន រ៉ានី ហ៊ុនសែន ប្រធានកាកបាទក្រហមកម្ពុជា បានបង្កើតឱ្យមានគម្រោងយុវជនកាកបាទ និងការងារចរាចរណ៍តាំងពីឆ្នាំ២០០៥ ក្រោមទស្សនវិស័យ យុវជនកាកបាទក្រហមកម្ពុជា ធ្វើជាគំរូគេក្នុងការងារសុវត្ថិភាពចរាចរណ៍ ដូច្នេះតាមរយៈនេះ សំណូមពរសូមក្មួយៗយុវជនកាកបាទក្រហម ត្រូវប្រកាន់ខ្ជាប់នូវទស្សនៈវិស័យនេះ ដើម្បីធ្វើជាគំរូនៅក្នុងសហគមន៍ តាមរយៈតួនាទីជំនាញសំខាន់មួយ គឺ មិត្តអប់រំមិត្ត ធ្វើយ៉ាងណាជំរុញឱ្យយុទ្ឋសាស្ត្ររបស់កាកបាទក្រហមកម្ពុជាអនុវត្តបានគ្រប់ជ្រុងជ្រោយ និងសម្រេចតាមគោលដៅនៅឆ្នាំ២០២០ ។
ឯកឧត្តម មានប្រសាសន៍ទៀតថា រាជរដ្ឋាភិបាលកម្ពុជាក្រោមការដឹកនាំប្រកបដោយភាពឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រី បានយកចិត្តទុកដាក់ និងគិតគូរខ្ពស់តាមរយៈពង្រឹងការអនុវត្តច្បាប់ ស្តីពីចរាចរណ៍ផ្លូវគោក រួមជាមួយយន្តការជាច្រើនដែលបានអនុវត្តជាង១០ឆ្នាំមកហើយ ហើយនៅតែបន្តពង្រឹង និងអនុវត្តន៍ជាបន្តទៅទៀត ដោយសារអត្រានៃការគ្រោះថ្នាក់ចរាចរណ៍មានសន្ទុះទៅមុខកាន់តែខ្លាំងឡើង ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
