កាលពីថ្ងៃទី១៧ ខែធ្នូ ម្សិលមិញនេះ សិស្សានុសិស្សដែលកំពុងរៀនថ្នាក់ទី៤,៥ និងទី៦ នៅក្នុងរមណីយដ្ឋានអង្គរ ត្រូវបានទទួលការបណ្ដុះបណ្តាលក្នុងគម្រោងអប់រំបរិស្ថាន ដែលជាគម្រោងដែលមានការសហការ ដោយអាជ្ញាធរជាតិអប្សរា ស្ថាប័នធានាគុណភាពជប៉ុន (JQA) មន្ទីរអប់រំ យុវជន និងកីឡា និងសាកលវិទ្យាល័យ សូហ្វីយ៉ា។ សិស្សានុសិស្សទាំងនោះ ត្រូវបានអប់រំឱ្យស្គាល់សំរាម ប្រភពដែលបណ្ដាលឱ្យមានសំរាម របៀបកាត់បន្ថយសំរាម រួមនិងដំណោះស្រាយជាដើម។ល។
ការអប់រំបរិស្ថានចំពោះកុមារតូចៗ ត្រូវបានមើលឃើញថាមានប្រសិទ្ធភាពខ្ពស់ ព្រោះវាជាគ្រឹះសម្រាប់ការអប់រំនៅពេលពួកគេរៀនថ្នាក់ខ្ពស់ និងក្លាយជាពលរដ្ឋដ៏ល្អមួយរូបនាពេលអនាគត។ សាលាបឋមសិក្សាគំរូ៣ ត្រូវបានគម្រោងជ្រើសរើសដើម្បីអនុវត្តន៍កម្មវិធីអប់រំបរិស្ថាន នៅក្នុងតំបន់រមណីយដ្ឋានអង្គរ។
លោក ឡៅ គឹមលាង តំណាងសាកលវិទ្យាល័យ សូហ្វីយ៉ា និងជាគ្រូបង្គោលក្នុងវគ្គបណ្ដុះបណ្តាលខាងលើបានឱ្យដឹងថា មេរៀនស្នូលសំខាន់សម្រាប់ការអប់រំកុមារទាក់ទងនឹងបរិស្ថាននេះ ដំបូងឱ្យក្មេងទាំងនោះយល់ដឹងតើអ្វីជាសំរាមជាមុនសិន ។ លោកបន្ថែមថា នៅពេលពួកគេចាប់ផ្តើមយល់ពីបញ្ហាទាំងអស់ នោះពួកគេនឹងងាយចាប់អារម្មណ៍ ហើយនឹងយល់ពីផលប៉ះពាល់បរិស្ថាន។ លោក គឹមលាង បន្តថា ប្លង់មេរៀនដែលដាក់បង្រៀន គឺអនុវត្តន៍តាមកង PDCA គឺPlan (ដាក់គោលដៅ រៀបចំផែនការដើម្បីកាត់បន្ថយសំរាម) Do (ចាប់ធ្វើទៅតាមផែនការដែលបានគិត) Check (តាមដានមើលថា តើបានសម្រេចគោលដៅប៉ុណ្ណា)? និង Act ( តើត្រូវធ្វើយ៉ាងណាទើបរឹតតែប្រសើរ)?
លោក ឡៅ គឹមលាង បន្តទៀតថា សាលាបឋមសិក្សាចំនួន៣ ដែលត្រូវបានជ្រើសរើសជាសាលាគំរូសម្រាប់អនុវត្តន៍គម្រោងលើកនេះមានសាលាបឋមសិក្សាគោកគ្រើល សាលាបឋមសិក្សាដូនឳ និងសាលាបឋមសិក្សាត្រពាំងស្វាយ។ ហើយគម្រោងនេះបានប្រមូលសិស្សទាំង៣ថ្នាក់បញ្ចូលគ្នាមានសិស្សថ្នាក់ទី៤,៥ និងទី៦ ដើម្បីបង្រៀនពីមេរៀនបរិស្ថានផ្សេងៗចំនួនមួយព្រឹក ហើយពួកគេនឹងឆ្លងកាត់ការអនុវត្តផ្ទាល់ជាមួយគ្រូបន្ទុកថ្នាក់ចំនួន ៣ខែបន្ថែមទៀត។
លោក សាតុរុ តំណាងស្ថាប័នធានាគុណភាពជប៉ុន បានឱ្យដឹងថា ការអប់រំនេះពិតជាសំខាន់ណាស់ ដើម្បីឱ្យពួកគេម្នាក់ៗមានទឹកចិត្តចង់ចូលរួមសម្អាតបរិស្ថាន ហើយមិនមែនតែរឿងសំរាមតែមួយមុខទេ បើនិយាយពីសំរាមគឺចាប់ផ្តើមពីការមិនចោលសំរាមពាសវាលពាសកាល ចេះគ្រប់គ្រង ការកាត់បន្ថយ និងការមិនប្រើហួសតម្រូវការជាដើម។ លោក សាតុរុ បន្តថា ការអប់រំឱ្យមនុស្សចូលរួមសម្អាតបរិស្ថាននេះ គឺត្រូវការការចូលរួម ដូច្នេះហើយទើបគម្រោងចាប់យកកូនសិស្សថ្នាក់បឋម ដោយរំពឹងថា ពួកគេនឹងចាប់ផ្តើមយល់ពីបញ្ហានេះតាំងពីពេលនេះទៅ និងរហូតដល់ពួកគេក្លាយជាពលរដ្ឋល្អមួយរូបក្នុងសង្គម។
គួររម្លឹកថា នេះជាលើកទី១១ ហើយ ដែលកម្មវិធីអប់រំបរិស្ថានត្រូវបានរៀបចំនៅតាមសាលាបឋមសិក្សាក្នុងតំបន់រមណីយដ្ឋានអង្គរ ក្រោយគម្រោងនេះចាប់ផ្តើមដំណើរការតាំងពីឆ្នាំ ២០០៤មក។ គម្រោងនេះបានចូលមកក្នុងតំបន់អង្គរ ពីព្រោះស្ថាប័នធានាគុណភាពជប៉ុន បានធ្វើការបញ្ចូលប្រព័ន្ធគ្រប់គ្រងបរិស្ថាន ISO 14001 នៅក្នុងអាជ្ញាធរជាតិអប្សរា ហើយដើម្បីធ្វើសកម្មភាពផ្ទាល់ ស្ថាប័នធានាគុណភាពជប៉ុន ក៏បានដំណើរការគម្រោងរបស់ខ្លួន ដើម្បីជាចំណេះដឹងចំពោះក្មេងៗឱ្យមានទម្លាប់ល្អទាក់ទងនឹងបរិស្ថានចាប់ពីតូចៗតទៅ៕ អត្តបទ: ហានី
