ព្រះគ្រូចៅអធិការវត្តស្វាយរមៀតមានគម្រោងបង្កើតសហគមន៍ទេសចរណ៍វត្តអារាមមួយ ដើម្បីទាញយកចំណូលពីវិស័យទេសចរណ៍ឱ្យមកដល់ប្រជាពលរដ្ឋក្នុងសហគមន៍ក្នុងគោលដៅចូលរួមកាត់បន្ថយភាពក្រីក្ររបស់ប្រជាពលរដ្ឋ។ព្រះតេជគុណ នឿម វុទ្ឋី ព្រះគ្រូចៅអធិការ វត្តបារាយណ៍មហានទីរតនារាម ហៅវត្តស្វាយរមៀត បានមានសង្ឃដីកាឱ្យដឹងថា កន្លងមកនេះក្រសួងទេសចរណ៍សហការជាមួយក្រសួងធម្មការ និងសាសនាសមាគមទីភ្នាក់ងារទេសចរណ៍កម្ពុជា(CATA)រួមជាមួយមន្ទីរ-ស្ថាប័នពាក់ព័ន្ធគ្រោងរៀបចំទីវត្តអារាម ដែលមានភាពលេចធ្លោជាងគេ ពិសេសនៅតាមតំបន់គោលដៅទេសចរណ៍សំខាន់ៗ ឱ្យក្លាយទៅជាវត្តទេសចរណ៍ ដ៏ទាក់ទាញ ដើម្បីចូលរួមលើកកម្ពស់ សក្តានុពលទេសចរណ៍ ឱ្យកាន់តែរីកចម្រើនឡើងថែមទៀត ពិសេសដើម្បីពង្រីកកិច្ចអភិរក្ស និងអភិវឌ្ឍន៍។
ព្រះតេជគុណ នឿម វុទ្ឋី បានមានសង្ឃដីការបន្តថា វត្តស្វាយរមៀតមានគម្រោងបង្កើតសហគមន៍ទេសចរណ៍វត្តអារាមមួយ ដើម្បីទាញយកចំណូលពីវិស័យទេសចរណ៍ឱ្យមកដល់ប្រជាពលរដ្ឋក្នុងសហគមន៍ក្នុងគោលដៅចូលរួមកាត់បន្ថយភាពក្រីក្ររបស់ប្រជាពលរដ្ឋ ដោយបច្ចុប្បន្ននេះ មានអ្នកទេសចរបរទេសដែលគោរពព្រះពុទ្ធសាសនាបានមកទស្សនា និងធ្វើការឈ្វេងយល់ពីវិស័យព្រះពុទ្ធសាសនានៅក្នុងវត្តនេះប្រមាណពី១៥០ទៅ២០០នាក់ក្នុង១ខែ ហើយភ្ញៀវទេសចរទាំងនោះមានភាគច្រើនជាភ្ញៀវជិះកង់ និងម៉ូតូជាលក្ខណៈគ្រួសារ និងជាក្រុមៗតូចៗ។
ព្រះអង្គបន្តថា ដើម្បីទាញយកចំណូលពីវិស័យទេសចរណ៍ឱ្យមកដល់ប្រជាពលរដ្ឋក្នុងសហគមន៍ក្នុងគោលដៅចូលរួមកាត់បន្ថយភាពក្រីក្ររបស់ប្រជាពលរដ្ឋ ព្រះអង្គមានគម្រោងបង្កើតសហគមន៍ទេសចរណ៍វត្តអារាមមួយ ដើម្បីផ្តល់សេវាទេសចរណ៍ដូចជា ការជិះរទេះគោទស្សនាភូមិឋាន និងវប្បធម៌ទំនៀមទំលាប់ការរស់នៅរបស់ប្រជាពលរដ្ឋ ការជិះទូកទស្សនាព្រៃឈើ លិចទឹកនិងការផ្តល់សេវាម្ហូបអាហារជាដើម។ហើយសេវាកម្មទាំងនេះ គឺអនុវត្ត និងទទួលបានប្រាក់ចំណូលផ្ទាល់ដោយប្រជាពលរដ្ឋនៅក្នុងសហគមន៍នេះ។
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបបានឱ្យដឹងថា សម្រាប់នៅខេត្តសៀមរាបបច្ចុប្បន្ននេះ មានវត្តព្រះព្រហ្មរត្ន័មួយហើយត្រូវបានដាក់ជាវត្តអារាមទេសចរណ៍ និងមានវត្តចំណាស់ៗមួយចំនួនទៀតមន្ត្រីជំនាញកំពុងតែពិនិត្យមើលថា មានលក្ខណៈគ្រប់គ្រាន់ដែលអាចស្នើទៅគណៈកម្មាការសុំដាក់ជាវត្តទេសចរណ៍បានឬអត់ ក្នុងនោះក៍មានវត្តស្វាយរមៀតមួយផងដែរ៕
ព្រះអង្គបានបញ្ជាក់ថាវត្តស្វាយរមៀតបច្ចុប្បន្ននេះ បានក្លាយជាវត្តអារាមមួយជាទីចាប់អារម្មណ៍របស់អ្នកទេសចរបរទេស បន្ទាប់ពីបានទស្សនាប្រាសាទបុរាណ និងរមណីយដ្ឋានធម្មជាតិនានានៅក្នុងខេត្តសៀមរាប ដោយសារវត្តនេះ ជាវត្តបុរាណមួយដែលបានក៍កើតឡើងទាំងពីយូលង់ណាស់មកហើយធ្វើឱ្យអ្នកទេសចរបរទេសចង់ឈ្វេងយល់ ជាពិសេសនៅក្នុងតំបន់ជុំវិញវត្តនេះមានសកត្តានុពលទេសចរណ៍ជាច្រើនទៀតដែលអាចឱ្យអ្នកទេសចរបន្តទៅកំម្សាន្តបានទៀត។
អត្តបទ៖ទ្រា ពន្លឺ
