ទស្សនកិច្ចជាផ្លូវការនៅខេត្តសៀមរាប របស់គណៈប្រតិភូជាន់ខ្ពស់សភាបារាំង ដឹកនាំដោយឯកឧត្តម ស៊ីលវាន វាសែម៉ាន់ (Sylvain Waserman) អនុប្រធានរដ្ឋសភាប្រទេសបារាំង គឺជាសក្ខីភាព ឆ្លុះបញ្ចាំងឲ្យឃើញអំពីចំណងមិត្តភាព សាមគ្គីភាព និង កិច្ចសហប្រតិបត្តិការ រវាងរដ្ឋសភា រដ្ឋាភិបាលនិងប្រជាជនប្រទេសទាំងពីរ ព្រះរាជាណាចក្រកម្ពុជា និង សាធារណរដ្ឋបារាំង កាន់តែរឹងមាំទ្វេឡើងថែមទៀត។
ឯកឧត្តម ទៀ សីហា អភិបាលខេត្តសៀមរាបបានបានថ្លែងអំណរគុណ ចំពោះរដ្ឋាភិបាល និង ប្រជាជនបារាំង ដែលបានផ្តល់ និង ចូលរួមស្តារ អភិវឌ្ឍន៍មាតុភូមិកម្ពុជា ឲ្យមានការរីកចម្រើនលើគ្រប់វិស័យ និង គាំទ្រទាំងនយោបាយ ការទូត ចំពោះឯករាជ្យភាព សន្តិភាព អធិបតេយ្យភាពជាតិ ការបង្រួបបង្រួមជាតិនៅកម្ពុជា។
តាមរយៈនៃកិច្ចសហប្រតិបត្តិការរវាងខេត្តសៀមរាប និង ខេត្ត ក្រុង សម្ព័ន្ធមេត្រីភាព នៃសាធារណរដ្ឋបារាំង បានរួមគ្នាសម្រេចបានលទ្ធផលល្អ លើបណ្តាញចែកចាយទឹកស្អាត រោងចក្រផលិតទឹកស្អាត , ការបង្កើតសាលាសណ្ឋាគារ និង ទេសចរណ៍ ប៉ូលឌឺប្រ៊ូល សាលាបាយ , ការសាងសង់ស្ពានឈើឆ្លងស្ទឹង និង ជួសជុលឡើងវិញ្ប្រព័ន្ធរំដោះទឹកក្នុងក្រុងសៀមរាប ។ ក្នុងនោះឯកឧត្តមក៏បានលើកផងដែរ អំពីស្ថានភាពភ្ញៀវទេសចរដែលចូលមកទស្សនា កម្សាន្តនៅខេត្តសៀមរាប ពីមួយឆ្នាំទៅមួយឆ្នាំមានការកើនឡើង ។
មានប្រសាសន៍ប្រកបដោយក្ដីរីករាយ ក្នុងឱកាសនោះ ឯកឧត្តម ឯកឧត្តម ស៊ីលវាន វាសែម៉ាន់ ក៏បានថ្លែងអំណរគុណ ចំពោះការទទួលបដិសណ្ឋារយ៉ាងកក់ក្ដៅ ពីគណៈប្រតិភូ របស់ខេត្តសៀមរាប ព្រមទាំងបានបញ្ជាក់ថា ដំណើរទស្សនកិច្ចផ្លូវការនៅលើទឹកដីព្រះរាជាណាចក្រកម្ពុជានេះ គឺជាការពង្រឹងពីចំណងមិត្តភាព សាមគ្គីភាពរវាងប្រទេសទាំងពីរ , ហើយប្រទេសបារាំងគឺជាប្រទេសមួយមានតួនាទីយ៉ាងសំខាន់ នៅក្នុងសហភាពសហគមអឺរ៉ុប និងមានទំនាក់ទំនងគ្នាយ៉ាងល្អរវាងប្រទេស និយាយភាសាបារាំងផងដែរ ។ ក្នុងនោះដែរឯកឧត្តម ក៏បានធ្វើការសាទរផងដែរ នូវរាល់សមទ្ធិផលនៃកិច្ចសហប្រតិបត្តិការល្អនឹងគ្នា រវាងខេត្ត ក្រុង នៃសាធារណរដ្ឋបារាំង ជាមួយខេត្តសៀមរាប ដែលឯកឧត្តមអភិបាលខេត្តបានជម្រាបជូន។
អត្ថបទ និង រូបថត : លោក គឿន វ៉េត
សម្រួលអត្ថបទៈ លោក សេង ផល្លី
