តាមរយៈរបាយការណ៍សមាគមមីក្រូហិរញ្ញវត្ថុកម្ពុជា បានបង្ហាញថា រហូតមកដល់ត្រីមាសទីបី នៅឆ្នាំ២០១៨ នេះ ប្រជាពលរដ្ឋប្រមាណជិត២លានគ្រួសារ បានទទួលសេវាហិរញ្ញវត្ថុពីគ្រឹះស្ថានមីក្រូហិរញ្ញវត្ថុមានដូចជា សេវាសន្សំ សេវាផ្ទេរប្រាក់ និងទូទាត់ ក្នុងនោះសេវាប្រាក់កម្ចីបានផ្ដល់ឲ្យប្រជាពលរដ្ឋ ប្រមាណ ៥,០០០លានដុល្លារសហរដ្ឋអាមេរិក។
នៅព្រឹកថ្ងៃទី ១៤ ខែធ្នូ ឆ្នាំ ២០១៨ សមាគមមីក្រូហិរញ្ញវត្ថុកម្ពុជា បានរៀបចំសន្និសីទមីក្រូហិរញ្ញវត្ថុប្រចាំឆ្នាំ នៅខេត្តសៀមរាប ស្តីពី ការគ្រប់គ្រងបម្រែបម្រួល ដើម្បីអនាគតប្រកបដោយនិរន្តភាព ក្រោមប្រធានបទ៖ បន្តផ្ដល់សេវាហិរញ្ញវត្ថុដែលមានឥទ្ធិពលជាវិជ្ជមាន។ ការប្រារព្ធសន្និសីទប្រចាំឆ្នាំនេះឡើង ដើម្បីរំលឹកពីសមិទ្ធិផល ដែលសម្រេចបាន នាពេលកន្លងមក និងចែករំលែកនូវបទពិសោធន៍ ព័ត៌មានផ្សេងៗ ដែលពាក់ព័ន្ធនឹងវិស័យហិរញ្ញវត្ថុទាំងក្នុងប្រទេស និងអន្តរជាតិ ក៍ដូចជា បង្កើនបរិយាកាសរីករាយ និងភាពស្និទ្ធស្នាលរវាងស្ថាប័នរាជរដ្ឋាភិបាល ប្រតិបតិ្តករ វិនិយោគិន និងម្ចាស់ជំនួយនានា បានជួបប្រាស្រ័យទាក់ទងគ្នា ហើយនេះក៏ជាឱកាស ផ្តល់នូវធាតុចូលសំខាន់ៗទាំងទ្បាយ ដើម្បីឱ្យវិស័យហិរញ្ញវត្ថុ បានត្រៀមលក្ខណៈសម្បត្តិគ្រប់គ្រាន់ និងទាន់ពេលវេលាសម្រាប់ឆ្លើយតបទៅនឹងការប្រឈម និងបម្រែបម្រួលនានា នាពេលអនាគត។
ឯកឧត្តម រ័ត្ន សុវណ្ណនរៈ ឧបការីទេសាភិបាល និងជាអគ្គនាយកត្រួតពិនិត្យ នៃធនាគារជាតិនៃកម្ពុជា មានប្រសាសន៍ថា៖ វិស័យមីក្រូហិរញ្ញវត្ថុកម្ពុជាឆ្នាំ២០១៨ បន្តមានការរីកចម្រើនទាំងវិសាលភាព និងផ្តល់នូវផលិតផលមីក្រូហិរញ្ញវត្ថុថ្មីៗ និងសំបូរបែប ជាពិសេសការប្រើប្រាស់បច្ចេកវិទ្យាហិរញ្ញវត្ថុទំនើបៗ ទន្ទឹមនឹងនោះពួកគេ ក៏បានប្រកាន់ខ្ជាប់នូវតួនាទីរបស់ខ្លួន ក្នុងការលើកកម្ពស់ហិរញ្ញប្បទានជនបទគួរជាទីមោទនៈផងដែរ។
ឯកឧត្តម រ័ត្ន សុវណ្ណនរៈ បន្តថា៖ ក្នុងនាមអាជ្ញាធរត្រួតពិនិត្យ ធនាគារជាតិនៃកម្ពុជាចាំបាច់ត្រូវតែថ្លឺងថ្លែងរវាងការដាក់ចេញនូវក្របខ័ណ្ឌបទបញ្ញតិប្រុងប្រយ័ត្ន ដែលគាំទ្រដល់ស្ថេរភាពហិរញ្ញវត្ថុក្នុងការប្រកួតប្រជែង ភាពបត់បែន នៃបច្ចេកវិទ្យា និងការជម្រុញបរិយាប័ន្នហិរញ្ញវត្ថុ។ ជាមួយនឹងគោលបំណងលើកកម្ពស់បរិយាប័ន្នហិរញ្ញវត្ថុ ធនាគារជាតិនៃកម្ពុជា ក៍បានចូលរួមជាសមាជិកពេញលេញ របស់សហព័ន្ឋបរិយាប័ន្នហិរញ្ញវត្ថុ ហៅកាត់ថា AFI ជាអង្គភាពអន្តរជាតិមិនស្វែងរកប្រាក់ចំណេញ និងមានសមាជិកអ្នករៀបចំគោលនយោបាយអនុវត្តជាស្តង់ដាររួម និងវេទិកាចែករំលែកបទពិសោធនិងចំណេះដឹងផ្សេងៗ លើការលើកកម្ពស់បរិយាប័ន្នហិរញ្ញប្បទាន ទន្ទឹមនឹងនេះ ធនាគារជាតិនៃកម្ពុជា ក៍ជាសមាជិកនៃគណៈកម្មាធិការជាន់ខ្ពស់ នៃការលើកកម្ពស់បរិយាប័ន្នហិរញ្ញវត្ថុ សម្រាប់ស្ត្រីរបស់សហព័ន្ឋAFIផងដែរ ។
អត្ថបទ និង រូបថត : លោក យូ វង្ស
សម្រួលអត្ថបទៈ លោក សេង ផល្លី
