បច្ចុប្បន្ន ការជួញដូរមនុស្សពុំមែន មានតែតាមរយៈការប្រាស្រ័យទាក់ទងគ្នារវាងមនុស្សក្នុងភូមិស្រុកដូចសម័យ មិនទាន់មានបច្ចេកវិទ្យាទំនើបឡើយ។ បច្ចេកវិទ្យាទំនើប បានធ្វើឲ្យការជួញដូរមនុស្ស មានសភាពស្មុគស្មាញ និងប្រទាក់ក្រឡាពីមួយទៅមួយ។
ថ្លែងនៅថ្ងៃទី១៧ខែធ្នូឆ្នាំ២០១៨ ក្នុងឱកាសអបអរសាទរទិវាជាតិលើកទី១២ ប្រយុទ្ធប្រឆាំងអំពើជួញដូរមនុស្ស ១២ធ្នូ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ ជាអនុប្រធានអចិន្ត្រៃយ៍ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស មានប្រសាសន៍ថា ជនល្មើស ឬមេខ្យល់ តែងតែព្យាយាមរិះរកល្បិចកលគ្រប់រូបភាព និងមានបណ្តាញមេខ្យល់ប្រទាក់ក្រឡាគ្នា ដើម្បីគេចវេសពីសំណាញ់ច្បាប់ និងសមត្ថកិច្ច សំដៅសម្រេចបំណងរបស់ពួកគេក្នុងការជួញដូរមនុស្សឆ្លងដែនពីប្រទេសមួយទៅប្រទេសមួយ តាមរយៈបណ្តាញទំនាក់ទំនងកាន់តែទំនើប។
លោកជំទាវ ជូ ប៊ុនអេង សម្តែងនូវក្តីបារម្ភផងដែរថា៖ ថ្មីៗនេះ នៅកម្ពុជាយើងបានកើតមាននូវអំពើជួញដូរមនុស្សមួយបែបទៀត ក្នុងរូបភាពការជួលពពោះជំនួស ដើម្បីជួញដូរទារក និងការនាំចេញទៅក្រៅប្រទេស។
លោកជំទាវបញ្ជាក់ថា៖ សកម្មភាពបែបនេះមិនត្រឹមតែជាអំពើខុសច្បាប់ប៉ុណ្ណោះទេ តែក៍បានជះឥទ្ឋិពលមិនល្អដល់វប្បធម៌ ប្រពៃណីជាតិ សិលធម៌រស់នៅ ក៍ដូចជាប៉ះពាល់ដល់សុខភាព និងអាយុជីវិតស្ត្រីដែលជាមាតានិងទារកថែមទៀតផង ហេតុនេះសូមបងប្អូនប្រជាពលរដ្ឋកុំចាប់យកការពពោះជំនួសជាមធ្យោបាយក្នុងការដោះស្រាយជីវភាព ព្រោះថាវាជាអំពើអមនុស្សធម៌ ជាអំពើបាប និងជាបទល្មើសដែលច្បាប់ដាក់ទោសទណ្ឌ។
លោកជំទាវ បានបញ្ជាក់ទៀតថា ជាគោលការណ៍ រាជរដ្ឋាភិបាលកម្ពុជាគាំទ្រការធ្វើទេសន្តរប្រវេសន៍ ការងារស្របច្បាប់សម្រាប់ ជាជម្រើសក្នុងការលើកកម្ពស់សេដ្ឋកិច្ចគ្រួសារប្រជាពលរដ្ឋ និងសង្គម ដោយចំពោះការដោះស្រាយបញ្ហាការជួញដូរមនុស្ស កន្លងមករាជរដ្ឋាភិបាលកម្ពុជា និងគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បាននិងកំពុងបន្តខិតខំរិះរកគ្រប់វិធានការ តាមរយៈការជម្រុញអនុវត្តនូវយុទ្ឋសាស្ត្រទាំងបួន របស់ផែនការជាតិ ដែលមានជាអាទិ៍៖
• ការងារបង្ការទប់ស្កាត់
• កិច្ចការពារជនរងគ្រោះ
• ការពង្រឹងការអនុវត្តន៍ច្បាប់
• និងការពង្រឹងកិច្ចសហការទាំងក្នុងក្របខ័ណ្ឌជាតិ តំបន់និងសាកល។
គោលបំណងនៃការប្រារព្ឋទិវាជាតិលើកទី១២ប្រយុទ្ធប្រឆាំងអំពើជួញដូរមនុស្ស ១២ធ្នូជារៀងរាល់ឆ្នាំនេះ គឺដើម្បីបញ្ជាក់ជូនជនរួមជាតិ និងសហគមន៍អន្តរជាតិឲ្យបានជ្រាបថា រាជរដ្ឋាភិបាលនៃព្រះរាជាណាចក្រកម្ពុជា នៅតែយកចិត្តទុកដាក់កាន់តែខ្លាំងក្លាក្នុងការការពារប្រជាពលរដ្ឋ និងប្រទេសជាតិ ពីភាពរងគ្រោះទាំងឡាយ ដោយឧក្រឹដ្ឋកម្មជួញដូរមនុស្ស ដែលបង្កឲ្យមានវិនាសកម្ម ជាថ្មីដល់មនុស្សជាតិ ហើយបាននិងកំពុងក្លាយជាទាសភាពសម័យទំនើប គួរឲ្យភ័យខ្លាចនិងស្អប់ខ្ពើម។
អត្ថបទ និង រូបថត : លោក យូ វង្ស
សម្រួលអត្ថបទៈ លោក សេង ផល្លី
