កាលពីចុងសប្ដាហ៍ថ្មីៗនេះ ក្រុមអ្នកស្រឡាញ់បរិស្ថានធម្មជាតិប្រមាណជាង២០០នាក់ នៅតំបន់ក្បាលជ្រោយវាលចាក់ស្រា ស្ថិតក្នុងភូមិសាស្ត្របឹងទន្លេសាប ភូមិចុងឃ្នៀស សង្កាត់ចុងឃ្នៀស ក្រុងសៀមរាប និងមានការគាំទ្រសហការពីអាជ្ញាធរសង្កាត់ចុងឃ្នៀស បានស្ម័គ្រចិត្តដើររើសសំរាម ដើម្បីជាសារអប់រំដល់អ្នកទេសចរមកកំសាន្តនៅក្នុងតំបន់នេះ ចូលរួមទាំងអស់គ្នា សម្អាតកាកសំណល់ចំណីអាហារ និងប្លាស្ទិក ដែលពួកគេបាននាំយកមក។
យុទ្ធនាការ “នាំខ្ញុំទៅវិញផង” បានបង្ហាញពីការចូលរួមថែរក្សាបរិស្ថាន ជាពិសេសបឹងទន្លេសាប ដែលជាបឹងធំជាងគេនៅអាស៊ីអាគ្នេយ៍ ពីសំណាក់យុវជនស័្មគ្រចិត្ត ជាពិសេសយុវជន មកពីក្រុងសៀមរាប ប្រជាសហគមន៍ចុងឃ្នៀស ប្រជាការពារ មន្រ្តីបរិស្ថាន រួមនិងអាជ្ញាធរសង្កាត់ចុងឃ្នាស។ នេះយុទ្ធនាការ គ្រោងនឹងធ្វើ២ដងក្នុង១ឆ្នាំ គឺនៅមុនរដូវទឹកបឹងទន្លេសាបឡើង និងពេលរដូវទឹកសម្រក សម្រាប់រយៈពេល២ឆ្នាំ។
លោក អ៊ុ ណារី ចៅសង្កាត់ចុងឃ្នៀស លើកឡើងថា ក្រៅពីយុទ្ធនាការស្ម័គ្រចិត្តរបស់យុវជននាពេលនេះ លោកតែងតែចាត់ឲ្យមានក្រុមតូចៗចុះអប់រំដល់ភ្ញៀវទេសចរ ដែលបានមកកម្សាន្តនៅតំបន់នេះ នៅរៀងរាល់ថ្ងៃសៅរ៏-អាទិត្យ ចូលរួមថែរក្សាបរិស្ថានទាំងអស់គ្នា ព្រោះតំបន់នេះ ក្រៅពីជាតំបន់ទេសចរ វាក៏ជាប្រភពទឹក និងជម្រកត្រី នៅរដូវវស្សាផងដែរ។
លោក ស៊ា សុផល ក៏មានសំណូមពរផងដែរថា បើស្រឡាញ់ធម្មជាតិ សូមឲ្យមានការចូលរួមទាំងអស់គ្នា ដោយនឹកឃើញការអង្វរករនៃសំបកញ្ចប់អាហារ ដែលថា ( សូមយកខ្ញុំទៅវិញផង កុំចោលខ្ញុំ ឲ្យនៅរំខានបរិស្ថាន និងធម្មជាតិ )។
គួរជម្រាបថា យុទ្ធនាការ “នាំខ្ញុំទៅវិញផង!” គឺជាផ្នែកមួយនៃ គម្រោងលើកកម្ពស់ជីវភាពសហគមន៍ អប់រំសុខភាព អនាម័យ និងបរិស្ថាន ដែលជាប្រធានបទរួម សម្រាប់ការអនុវត្តនៅគោលដៅចំនួន៣ នៃតំបន់ទេសចរណ៍ធម្មជាតិនៅក្នុងតំបន់បឹងទន្លេសាបនៃខេត្តសៀមរាប ដែលគាំទ្រដោយមូនិធិអង្គការ ទំពាំងស្នងឬស្សី ក្នុងនោះរួមមាន សហគមន៍កំពង់ឃ្លាំងនៃស្រុកសូទ្រនិគម សហគមន៍ចុងឃ្នៀសនៃក្រុងសៀមរាប និង សហគមន៍មេជ្រៃ នៃស្រុកពួក គម្រោងនេះដែរត្រូវបានអនុវត្តជាច្រើនឆ្នាំកន្លងមកហើយ និងកំពុងអនុវត្តបន្តទៀត៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
