កាលពីថ្ងៃទី២៣ ខែមិថុនា ឆ្នាំ២០២០ ឯកឧត្តម ទៀ សីហា អភិបាលខេត្តសៀមរាប បានចាត់ ក្រុមការងារគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប និងក្រុមការងារទទួល និងដឹកជញ្ជូនប្រជាពលរដ្ឋខ្មែរ ខេត្តសៀមរាប ទៅទទួល និងដឹកជញ្ជូន ប្រជាពលរដ្ឋរស់នៅក្នុងខេត្តសៀមរាប ដែលបានលួចឆ្លងដែនខុសច្បាប់ចំនួន២២នាក់ តាមច្រកព្រំដែនអូរបីជាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ត្រឡប់មកកាន់ខេត្តសៀមរាបវិញ។
តាមការឲ្យដឹងពីកម្លាំងសមត្ថកិច្ចប្រចាំច្រកអូរបីជាន់ បង្ហាញថា ប្រជាពលរដ្ឋទាំង២២នាក់នោះ ក្នុងនោះស្រ្តី១០នាក់ និងមេខ្យល់ម្នាក់ផងដែរ បានលួចឆ្លងដែនតាមច្រករបៀងក្នុងភូមិសាស្ត្រស្រុកម៉ាឡៃកាលពីយប់ថ្ងៃទី២២ ខែមិថុនា ហើយត្រូវបានកម្លាំងសមត្ថកិច្ចការពារព្រំដែនថៃ ឃាត់ខ្លួនបាន និងចាត់បញ្ជូនអ្នកឆ្លងដែនទាំងនោះ មកពីខេត្តស្រះកែវ និងបានប្រគល់ឲ្យកម្លាំងសមត្ថកិច្ចកម្ពុជាប្រចាំការច្រកអូរបីជាន់ ស្រុកអូរជ្រៅ នៅព្រឹកថ្ងៃទី២៣ ខែមិថុនា ឆ្នាំ២០២០។
ដោយឡែក នៅថ្ងៃដដែលនោះ សិក្ខាកាមខ្មែរ នៃវិទ្យាស្ថានពហុបច្ចេកទេសភូមិភាគតេជោ សែន សៀមរាប ចំនួន១៦នាក់ ដែលបានទៅបំពេញកម្មសិក្សានៅប្រទេសថៃ កាលពីខែកុម្ភៈ ឆ្នាំ២០២០កន្លងទៅ ក៏បានវិលត្រឡប់មកប្រទេសកម្ពុជាវិញដែរ តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យវីញផងដែរ។
លោកស្រី យូ សុភា អភិបាលរងខេត្ត និងជាប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានថ្លែងអំណរគុណកងកម្លាំងការពារប្រចាំច្រកព្រំដែននៃព្រះរាជាណាចក្រកម្ពុជា និងព្រះរាជាណាចក្រថៃ ដែលបានជួយសម្របសម្រួល និងទប់ស្កាត់ការលួចឆ្លងដែនដោយខុសច្បាប់នេះ។
លោកស្រី ក៏បានអំពាវនាវដល់ ប្រជាពលរដ្ឋខ្មែរទាំងអស់ សូមមានការអត់ធ្មត់មួយរយៈសិន រង់ចាំសភាពការណ៍នៃជំងឺកូវីដ១៩ បានធូរស្រាល ឬត្រូវបានបញ្ចប់ និងត្រូវរងចាំការប្រកាសជាផ្លូវការណាមួយ អំពីការបើកឲ្យដំណើរការឡើងវិញនៃច្រកព្រំដែនរវាងប្រទេសទាំងពីរ។
គួរជម្រាបថា ប្រជាពលរដ្ឋលួចឆ្លងដែនខុសច្បាប់ ចំនួន២២នាក់ រួមនិងសិក្ខាកាមខ្មែរត្រឡប់ពីប្រទេសថៃចំនួន១៦នាក់ ត្រូវបានទទួល និងដឹកជញ្ជូនមកកាន់ខេត្តសៀមរាប តាមរថយន្ត មកកាន់មណ្ឌលចត្តាឡីស័ក ក្នុងក្រុងសៀមរាប ដើមី្បធ្វើការត្រួតពិនិត្យសុខភាព និង ដាក់ឲ្យនៅដាច់ដោយឡែក ក្នុងរយៈពេល១៤ថ្ងៃ មុននឹងអនុញ្ញាត ឲ្យទៅដល់លំនៅដ្ឋានជួបជុំក្រុមគ្រួសារខ្លួនវិញ ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
