នៅព្រឹកថ្ងៃទី៣០ ខែមិថុនា ឆ្នាំ២០២០នេះ គណៈកម្មាធិការសម្របសម្រួលបច្ចេកទេស (គសប)របស់ក្រុមប្រឹក្សាខេត្តសៀមរាប បានរៀបចំកិច្ចប្រជុំរបស់ខ្លួន ក្រោមអធិបតីភាពលោក ង៉ាន់ ភិរុណ អភិបាលរងខេត្ដសៀមរាប និងមានការអញ្ជើញចូលរួម ពីស្ថាប័នអាជ្ញាធរជាតិអប្សរា លោក លោកស្រី ប្រធាន អនុប្រធានមន្ទីរ ដែលជាសមាជិកគណៈកម្មាធិការសម្របសម្រួលបច្ចេកទេស។
កិច្ចប្រជុំ គ ស ប នេះមានរបៀបវារៈរួមមាន ពិនិត្យ និងពិភាក្សា អនុម័តលើសេចក្ដីព្រៀងប្រតិទិនកិច្ចប្រជុំគណកម្មាធិការសម្របសម្រួលបច្ចេកទេសរបស់ក្រុមប្រឹក្សាខេត្ដអាណត្ដិទី៣ ចាប់ពីខែសីហាឆ្នាំ២០២០ដល់ខែមិថុនាឆ្នាំ២០២១។ ពិនិត្យនិងធ្វើបច្ចុប្បន្នភាព នៃការដោះស្រាយលើសំណួរ សំណូមពរ ដែលបានលើកឡើងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្ដិទី២ឆ្នាំ២០១៨។ ពិនិត្យនិងធ្វើបច្ចុប្បន្នភាព នៃការដោះស្រាយលើសំណួរ សំណូមពរ ដែលបានលើកឡើងក្នុងវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តអាណត្ដិទី៣ឆ្នាំ២០១៩។និងបញ្ហាផ្សេងៗផងដែរ។
លោក ង៉ាន់ ភិរុណ អភិបាលរងខេត្ដសៀមរាប និងជាប្រធានអង្គប្រជុំ បានផ្សព្វផ្សាយ និងណែនាំដល់អាជ្ញាធរក្រុង ស្រុក និងអ្នកពាក់ព័ន្ធទាំងអស់ត្រូវពិនិត្យលើពាក្យស្នើសុំធ្វើផ្លូវ និងអណ្តូង ធ្វើស្ពាន នៅតាមបណ្ដាស្រុកក្រុងដែលប្រជាពលរដ្ឋ និងអាជ្ញាមូលដ្ឋានបានស្នើសុំដើម្បីជួយសម្រួលដល់ការរស់នៅរបស់ប្រជាពលរដ្ឋ នៅតាមមូលដ្ឋាននោះ។ លោកប្រធានអង្គប្រជុំក៏បានជំរុញឱ្យក្រុង ស្រុក និងអាជ្ញាធរពាក់ព័ន្ធទាំងអស់ត្រូវជំរុញដោះស្រាយបញ្ហាដែលប្រជាពលរដ្ឋបានលើកឡើងកន្លងមក។ ដោយឡែក អាជ្ញាធរស្រុកក្រុង និងស្ថាប័នផ្សេងៗទៀត ក៍ផ្ដល់ការប្រឹក្សានិងចំលើយមួយចំនួនដែលដល់អង្គប្រជុំ ដែលមានប្រជាពលរដ្ឋបានស្នើសុំនាពេលកន្លងទាក់ទងនឹងភូមិឃុំមានសុវត្ថិភាព ការលំបាករបស់ពលរដ្ឋ និងការរាំងស្ទះនៃការអភិវឌ្ឍន៍ខ្លះៗផងដែរ៕
អត្ថបទ និង រូបភាព ៖ លោក បូ សាវី
