រសៀលថ្ងៃទី៣០ ខែមិថុនា ឆ្នាំ២០២០ សហការីសាលាគណខេត្ត មន្ត្រីមន្ទីរធម្មការនិងសាសនាខេត្តសៀមរាប ក្រោមកិច្ចដឹកនាំពីសំណាក់ ព្រះធម្មសិរី ជុំ គឹមឡេង ព្រះរាជាគណៈថ្នាក់កិត្តិយស និងជាព្រះសុមង្គលសិលាចារ្យ មេគណខេត្តសៀមរាប បាននិមន្តនិងអញ្ជើញចុះសួរសុខទុក្ខជាមួយព្រះចៅអធិការទាំង១២វត្ត របស់ស្រុកអង្គរធំខេត្តសៀមរាប ដើម្បីបានដឹងពីភាពជាក់ស្តែងពីការលំបាកនិងបញ្ហាផ្សេងៗក្នុងទីគ្រាលំបាក ដោយសារតែមេរោកូវីដ-១៩ ដែលបានបណ្តាលឱ្យប៉ះពាល់ដល់ជីវភាពប្រជាពុទ្ធបរិស័ទទូទៅ និងមួយផ្នែកដល់សហគមន៍វត្តអារាមព្រះពុទ្ធសាសនាផងដែរ ។
ព្រះសាសនសត្ថា តង់ តន ព្រះបាឡាត់គណខេត្តសៀមរាប និងជាព្រះគ្រូចៅអធិការវត្តព្រះព្រហ្មរ័ត្នមានសង្ឃដីកាថា នេះជាស្រុកទី៧ហើយដែលសាលាគណនិងមន្ត្រីសង្ឃខេត្តបានចុះសួរសុខទុក្ខ ហើយដំណើរសួរសុខទុក្ខដល់ព្រះសង្ឃ នៅតាមទីអារាមនានា ក្នុងទូទាំងខេត្ត គឺអនុវត្តទៅតាមសេចក្តីជូនដំណឹងនិងការណែនាំរបស់ គណៈសង្ឃនាយកដែលបានជូនដំណឹងឱ្យគណៈសង្ឃខេត្តចុះសួរសុខទុក្ខព្រះសង្ឃតាមមូលដ្ឋានក្នុងពេលជំងឺកូវីដ១៩កំពុងរាតត្បាតជុំវិញសកលលោក ខណៈដែលប្រជាពុទ្ឋបរិស័ទជិតឆ្ងាយ មិនបានជួបជុំប្រារព្ឋពិធីផ្សេងៗ តាមប្រពៃណីទំនៀមទំលាប់ ដោយសារខ្លាចឆ្លងវីរុសកូវីដ១៩ និងដោយការអនុវត្តតាមការណែនាំរបស់រាជរដ្ឋាភិបាល ក្រសួងសុខាភិបាល និងគណៈសង្ឃនាយក នៃព្រះរាជាណាចក្រកម្ពុជា អំពីវិធានការ ការពារ បង្ការទប់ស្កាត់ការរីករាលដាលជំងឺកូវីដ១៩ទៅក្នុងគ្រួសារនិងសហគមន៍ ។
មានថេរៈដីការ ក្នុងឱកាសនោះ ព្រះធម្មសិរី ជុំ គឹមឡេង ណែនាំឱ្យព្រះចៅអធិការគ្រប់វត្តក្នុងខេត្ត ត្រូវពិនិត្យមើលវត្តរស់ខ្លួនបើមានការខ្វះខាតផ្នែកចង្ហាន់សូមរាយការណ៍ជាបន្ទាន់ ចៀសវាងការបង្ហោះរូបភាពមិនសមរម្យ តាមបណ្តាញសង្គមដែលមិនបានរាយការណ៍និងមិនបានពិនិត្យឱ្យបានច្បាស់លាស់ជាមុន អាចឱ្យជនមួយចំនួនយល់ច្រឡំនិងបំប៉ោងព័ត៌មានទៅជាព័ត៌មានមិនពិត ជាហេតុនាំឱ្យកើតចលាចលក្នុងប្រទេស ថារាជរដ្ឋាភិបាលមិនបានគិតគូរដល់ព្រះសង្ឃនិងនាំឱ្យប៉ះពាល់ដល់នយោបាយដ៍ត្រឹមត្រូវរបស់រាជរដ្ឋាភិបាល យើងទៀតផង ។
ព្រះធម្មសិរី ជុំ គឹមឡេងមានថេរៈដីការទៀតថាលោកគ្រូចៅអធិការគ្រប់វត្តទាំងអស់ ត្រូវប្រុងប្រយ័ត្នឱ្យបានខ្ពស់ ជាពិសេសត្រូវអនុវត្តឱ្យបានល្អនូវវិធានការការពារកុំឱ្យឆ្លងមេរោគកូវីដ-១៩ ទាំងព្រះសង្ឃ និងពុទ្ធបរិស័ទទូទៅ ព្រោះមេរោគនេះវាកាចសារហាវនិងធ្វើឱ្យមនុស្សរាប់ម៉ឺននាក់បានស្លាប់នៅទូទាំងពិភពលោក ទាំងព្រះសង្ឃ ទាំងគ្រហស្ថគ្រប់អង្គ គ្រប់រូប សូមរួមគ្នាប្រយុទ្ធប្រឆាំងជំងឺកូវីដ១៩ និងបង្កើនស្មារតីការពារតាមវិធាននានា ដែលក្រសួង សុខាភិបាលបានណែនាំ នេះជាពេលវេលាដែលយើងត្រូវរួមគ្នា ទប់ស្កាត់ និងកម្ចាត់ជំងឺនេះ យើងមិនត្រូវមើលស្រាលឬធ្វេសប្រហែសនិងប្រមាថជាដាច់ខាត។ បើមានបងប្អូនញាតិមិត្តចំណូលមកពីប្រទេសជិតខាងសូមជួយណែនាំគាត់ឱ្យស្នាក់នៅដាច់ដោយឡែករយៈពេល១៤ថ្ងៃ តាមវិធានការបង្ការរបស់ក្រសួងសុខាភិបាល។ព្រះមេគណបានដាស់តឿនក្រើនរំលឹកដល់ភិក្ខុសាមណេរទាំងអស់ ក្នុងរដូវចូលព្រះវស្សាខាងមុខនេះ គប្បីសំអាតទីអារាមឱ្យសមរម្យ ត្រៀមព្រះកាយដើម្បីបវរណាចូលព្រះវស្សាទៅតាមព្រះវិន័យ ចៀសវាងគោចររហេតរហូតមិនដឹងវស្សាមិនដឹងប្រាំង ដែលជាបច្ច័យមិនល្អនាំឱ្យពុទ្ឋបរិស័ទអស់សទ្ឋាលើព្រះពុទ្ឋសាសនា ជាពិសេសស្នើដល់ព្រះគ្រូអនុគណតាមស្រុកនិងព្រះគ្រូចៅអធិការតាមបណ្តាវត្តទាំងអស់ ត្រូវរៀបចំបទបញ្ជាផ្ទៃក្នុងដើម្បីឃុំគ្រងព្រះសង្ឃក្នុងអារាមរបស់ខ្លួនឱ្យបានច្បាស់លាស់ ជាពិសេសក្នុងរដូវចូលវស្សានេះ ត្រូវពិនិត្យឱ្យបានហ្មត់ចត់ផងដែរចៀសវាងនូវការនិមន្តចេញក្រៅវត្តរហេតរហូតដោយភិក្ខុផងគ្នាពុំបានដឹងាហេតុនាំឱ្យខុសទៅនឹងធម៌វិន័យនាំឱ្យសៅហ្មងដល់សទ្ឋារបស់ប្រជាពុទ្ឋបរិស័ទចំពោះព្រះសង្ឃ និងត្រូវតាមដានផងដែរព្រះសង្ឃអង្គខ្លះឬបុគ្គលខ្លះបន្លំភេទ បួសមិនស្របច្បាប់ ដែលនិមន្តគោចរ ដើរបិណ្ឌបាត្រ ឃោសនារៃអង្គាស តាមទីប្រជុំជននានាជាដើម ។
ក្នុងដំណើរសួរសុខទុក្ខនេះ ព្រះមេគណខេត្ត បានសម្ដែងការសាទរ ចំពោះក្រុមការងារដែលបានរៀបចំ ការងារនេះ និងផ្ដាំផ្ញើព្រះគ្រូអនុគណ និងព្រះចៅអធិការគ្រប់វត្ត បន្តពង្រឹងនូវការការពារ ជំងឺកូវីដ១៩ នេះបន្ថែមទៀត។ព្រះមេគណខេត្តក៍បានថ្លែងអំណរគុណដល់សប្បុរសជន ទាំងឡាយ ដែលជាការរួមចំណែកយ៉ាងសំខាន់ ជាមួយព្រះសង្ឃក្នុងឪកាសដ៍លំបាកនេះ ។ វត្ថុទានសម្រាប់វត្តទាំ១២ សរុបមាន អង្ករ ១,២៣៤គ.ក មី ៤៤កែស ចានស្រាក់ ១០ឈុត ទឹកត្រី ៥៧យួរ ទឹកស៊ីអ៊ីវ ៥៧យួរ ស្ករស ៦៥កញ្ចប់ សាប៊ូ២៤កញ្ចប់ អំបិល ៥៣ថង់ ប្រេងឆា ៤៨គ.ក ប៊ីចេង ២៤ថង់ ទៀនវស្សា ១២គូ ទឹកសុទ្ធិ ៧២យួរ ទឹកដោះគោ ៣២កំប៉ុង និង ថវិកា ៤,លាន ៤សែន១០, ០០០រៀល។ ក្នុងនោះមួយវត្តៗរួមទទួលបានៈ អង្ករ ២៣គ.ក មី២កែស ចានស្រាក់១ឈុត ទឹកត្រី៤យួរ ទឹកស៊ីអ៊ីវ៤យួរ ស្ករស៥កញ្ចប់អំបិល៤ថង់ សាប៊ូ២០កញ្ចប់ ទៀនវស្សា១គូ ទឹកសុទ្ធិ៤កែស និង ថវិកាចំនួន ៣២ម៉ឺនរៀល ព្រមទាំងមានថវិកាតម្កល់ក្នុងសាលាអនុគណចំនួន ៥៧០,០០០រៀលផងដែរ ៕
