នៅព្រឹកថ្ងៃទី០២ ខែកក្កដា ឆ្នាំ២០២០ ប្រជាពលរដ្ឋរងគ្រោះ និងងាយរងគ្រោះ ចំនួន៤០គ្រួសារ មកពីឃុំចំនួន០៤ ក្នុងស្រុកស្វាយលើ ខេត្តសៀមរាប បានទទួលអំណោយសប្បុរសធម៌ពីកាកបាទក្រហមកម្ពុជា តាមរយៈសាខាកាកបាទក្រហមខេត្តសៀមរាប ដឹកនាំដោយដោយ ឯកឧត្តម គុជ លីណា អនុប្រធានគណៈកម្មាធិការសាខា ស្ថិតនៅទីស្នាក់ការអនុសាខាកាកបាទក្រហមកម្ពុជាស្រុកស្វាយលើ។
តាមការបង្ហាញពី លោក អៀង ពិសិដ្ឋ ប្រធានអនុសាខាស្រុកស្វាយលើ ប្រជាពលរដ្ឋដែលមានវត្តមាននាពេលនេះ គឺជា ចាស់ជរាគ្មានទីពឹង កុមារកំព្រា ស្ត្រីមេម៉ាយក្រីក្រមានកូនច្រើន អ្នកផ្ទុកមេរោគអេដស៍ និង ជនពិការទីទ័លក្រ ដែលបាននិងកំពុងរងផលប៉ះពាល់នៃវិបត្តិជំងឺកូវិដ១៩។
មានប្រសាសន៍ក្នុងឱកាសនោះ ឯកឧត្តម គុជ លីណា លើកឡើថា កាកបាទក្រហមកម្ពុជា ក្រោមការដឹកនាំ របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចិត្តទុកដាក់គិតគូរខ្ពស់បំផុតចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ។ អំឡុងវិបត្តិជាសកលនៃជំងឺកូវីដ១៩ បានធ្វើឲ្យប៉ះពាល់យ៉ាងខ្លាំងដល់សេដ្ឋកិច្ច និង ជីវភាពរបស់ប្រជាពលរដ្ឋប្រចាំថ្ងៃ ជាពិសេសប្រជាពលរដ្ឋទីទ័លក្រ។
ទន្ទឹមនោះ ឯកឧត្តម ក៏បានអំពាវនាវដល់ ប្រជាពលរដ្ឋទាំងអស់ ត្រូវណែនាំដល់សមាជិកគ្រួសាររបស់ខ្លួន កុំឲ្យចាញ់បោកមេខ្យល់ នាំទៅធ្វើការនៅក្រៅប្រទេសដោយខុសច្បាប់ ដែលវានឹងបង្កឲ្យមានគ្រោះថ្នាក់បណ្ដាលពីការឆ្លងជំងឺកូវីដ១៩ និងប្រឈមការចាប់ឃាត់ខ្លួនពីអាជ្ញាធរនៃប្រទេសទាំងនោះ។ ជាមួយនោះ ប្រជាពលរដ្ឋក្នុងស្រុក គួរងាកមកធ្វើការដាំដុះ ចិញ្ចឹមសត្វនៅតាមមូលដ្ឋានវិញ ដើម្បីស្ដារជីវភាពអំឡុងវិបត្តិជំងឺកូវីដ១៩នេះ។
អំណោយមនុស្សធម៌ ដែលបានចែកជូននាពេលនោះ ក្នុង១គ្រួសារទទួលបាន អង្ករ២៥គីឡូក្រាម មី១កេស ត្រីខ១យួរ អាវយឺត២ និងថវិកា៤ម៉ឺនរៀល ។ ដោយឡែក ក្រុមហ៊ុនចំការកៅស៊ូ ខេន ដឹកនាំដោយលោក លាយ រ៉ាយ ជានាយកក្រុមហ៊ុន បាននាំយកនូវជាគ្រឿងឧបភោគបរិភោគ នូវមី១០កេសតូច, ត្រីខ០៥យូរ ទឹកត្រី១៤យូរ ,ទឹកស៊ីអ៊ីវ១៥យូរ និង ថវិកា ១លាន២សែនរៀល ប្រគល់ជូន ដល់អនុសាខាកាកបាទក្រហមស្រុកស្វាយលើ ដើមី្បយកទៅប្រើប្រាស់ជួយដល់ប្រជាពលរងគ្រោះ និង ងាយរងគ្រោះក្នុងស្រុកស្វាយលើផងដែរ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
