កាលពីថ្ងៃទី០២ ខែកក្កដា ឆ្នាំ២០២០ ឯកឧត្តម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា លើកឡើងថា ក្រសួង បានចាត់វិធានការ លើមន្ដ្រី ឃុំ-សង្កាត់មួយចំនួន ដែលមានភាពមិនប្រក្រតី ក្នុងការចែកបណ្ណសមធម៌ជូនគ្រួសារក្រីក្រ ដើម្បីធានាតម្លាភាពក្នុងការផ្តល់ការជួយសង្គ្រោះ ជូនប្រជាពលរដ្ឋក្រីក្រពិតប្រាកដ ស្របតាមគោលដៅរបស់ប្រមុខរាជរដ្ឋាភិបាល។
ឯកឧត្តមរដ្ឋមន្រ្តី បានទទួល ស្គាល់ថា មន្ដ្រីឃុំ-សង្កាត់ មួយចំនួនបានបំពេញការងារ មិនប្រក្រតីក្នុងការ ចែកបណ្ណជូនចំពោះគ្រួសារក្រីក្រ ទន្ទឹមនោះក្រសួងសង្គមកិច្ច អតីតយុទ្ធជន និងយុវនីតិសម្បទា ក៏បានធ្វើការណែនាំពួកគាត់ ជាពិសេសក្រសួងក៏បានធ្វើលិខិតទៅក្រសួងមហាផ្ទៃរួចរាល់ផងដែរ។
ឯកឧត្តមរដ្ឋមន្រ្តី បញ្ជាក់ថា ចំពោះការអនុវត្តផ្លូវច្បាប់ វាជាសមត្ថកិច្ចរបស់ស្ថាប័នដែលជាខ្សែបណ្ដោយរបស់គាត់ចាប់ការតាមផ្លូវច្បាប់ ដើម្បីតម្លាភាព ប្រសិទ្ធភាព និងក្រុមគោលដៅរបស់យើង ទទួលផលពិតប្រាកដ ដោយអត់មានបង់សេវាក្រៅពីអ្វីដែលរដ្ឋបានទទួលខុសត្រូវ។
គួររំលឹកថា កាលពីថ្ងៃទី៣០ ខែមិថុនា ឆ្នាំ២០២០នេះ សម្តេចតេជោ ហ៊ុន សែន បានព្រមានចាត់វិធានការក្តៅដោយគ្មានការលើកលែងនោះឡើយ ប្រសិនបើរកឃើញភាពមិនប្រក្រតីលើការអនុវត្តន៍កម្មវិធីឧបត្ថម្ភសាច់ប្រាក់ជូនប្រជាពលរដ្ឋក្រីក្រ និងងាយរងគ្រោះដោយសារជំងឺកូវីដ១៩។ ជាពិសេសការឃុបឃិតគ្នាដាក់សាច់ញាតិខ្លួន ដើម្បីទទួលបានប្រាក់ឧបត្ថម្ភ។
សូមបញ្ជាក់ថា ដើម្បីទទួលបានប្រាក់ឧបត្ថម្ភពីកម្មវិធីឧបត្ថម្ភសាច់ប្រាក់ ជូនប្រជាពលរដ្ឋដែលមានជីវភាពក្រីក្រ និងងាយរងគ្រោះក្នុងអំឡុងពេលជំងឺ កូវីដ-១៩ គ្រួសារក្រីក្រ និងងាយរងគ្រោះ ត្រូវមានបណ្ណសមធម៌ ដែលមានសុពលភាព ដោយឈរលើកម្រិតភាពក្រីក្រ៖ ក្រកម្រិត១ (ទីទ័លក្រ) ឬ ក្រកម្រិត២ (ក្រ) ព្រមទាំងបានទៅផ្ទៀងផ្ទាត់បញ្ជីឈ្មោះ នៃកម្មវិធីនេះ នៅសាលាឃុំ-សង្កាត់ក្នុងមូលដ្ឋានរបស់ខ្លួន។
អត្ថបទ និង រូបថត ៖ មន្ទីរព័ត៌មានខេត្តសៀមរាប
