នៅថ្ងៃទី០៥ ខែកក្កដា ឆ្នាំ២០២០ ក្រុមការងារថ្នាក់កណ្ដាលចុះជួយស្រុកស្រីស្នំ បាននាំយកទេយ្យវត្ថុ បច្ច័យ និងទៀនចំណាំព្រះវស្សា ទៅវេរប្រគេនដល់ព្រះសង្ឃគង់ចាំព្រះវស្សានៃវត្តចំនួន ៩ ក្នុងបរិវេណវត្តជ្រោយនាងងួន ស្រុកស្រីស្នំ ខេត្តសៀមរាប ក្រោមអធិបតីភាព ឯកឧត្តម លន់ សុធី ប្រធានក្រុមការងារថ្នាក់កណ្ដាលចុះជួយស្រុកស្រីស្នំខេត្តសៀមរាប និងលោកជំទាវ, ឯកឧត្តម ស៊ិន រុន អនុប្រធានក្រុមការងារថ្នាក់កណ្ដាលចុះជួយស្រុកស្រីស្នំ និងជាប្រធានក្រុមការងារថ្នាក់ខេត្តចុះជួយស្រុកស្រីស្នំ ព្រមទាំងឯកឧត្ដម លោកជំទាវ លោក លោកស្រី អនុប្រធានក្រុមការងារ សមាជិក សមាជិកាក្រុមការងារថ្នាក់កណ្តាល ថ្នាក់ខេត្ត ថ្នាក់ស្រុក ឃុំ កងកម្លាំងប្រដាប់អាវុធ មន្ត្រីរាជការក្នុងស្រុក និងប្រជាពុទ្ធបរិស័ទជាច្រើននាក់។
លើកឡើងក្នុងឱកាសនោះ ឯកឧត្តម លន់ សុធី បញ្ជាក់ថា បច្ចុប្បន្ន ក្រោមការដឹកនាំរបស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខ បាននាំមកនូវសន្តិភាព ជូនជាតិ និងប្រជាជនកម្ពុជា រយៈពេល ២១ឆ្នាំមកហើយ ព្រមជាមួយការអភិវឌ្ឍលើគ្រប់វិស័យ។ ជាមួយនោះ វិស័យអាណាចក្រនិងពុទ្ឋចក្រ តែងតែដើរទន្ទឹមគ្នាពុំអាចខ្វះមួយណាបានឡើយ ក្នុងការចូលរួមជួយស្តារនិងអភិវឌ្ឍន័សង្គមជាតិឱ្យមានរីកចំរើន។ ដូច្នេះ ក្នុងនាមប្រជាពលរដ្ឋខ្មែរ យើងត្រូវរួបរួមគ្នាជាធ្លុងមួយ ដើម្បីថែរក្សាការពារសន្តិភាព ជាមួយរាជរដ្ឋាភិបាលបន្តទៅមុខឲ្យបានយូរអង្វែង សម្រាប់មនុស្សជំនាន់។
ឯកឧត្តមប្រធានក្រុមការងារថ្នាក់កណ្ដាលចុះជួយស្រុកស្រីស្នំ ក៏បានអំពាវនាវដល់ប្រជាពលរដ្ឋទាំងអស់ ត្រូវបន្តប្រុងប្រយ័ត្នចំពោះជំងឺកូវីដ១៩ ទោះបីរាជរដ្ឋាភិបាលបានទប់ស្កាត់ជំងឺនេះប្រកបដោយប្រសិទ្ធភាព និងពុំមានការរីករាលក្នុងសហគមន៍យ៉ាងណាក៏ដោយ ក៏ប្រជាពលរដ្ឋគ្រប់រូបត្រូវបន្តរក្សាអនាម័យដៃជាប់ជានិច្ច និងចៀសវាងការធ្វើចំណាកស្រុកទៅធ្វើការក្រៅប្រទេសដោយខុសច្បាប់ តាមការលួងលោមរបស់ជនខិលខូចមួយចំនួន។
សូមជម្រាបថា ទេយ្យវត្ថុ ដែលបានប្រគេនដល់វត្តចំនួន០៩ ក្នុងស្រុកស្រីស្នំនាពេលនោះ ក្នុងមួយវត្តទទួលបាន ទៀនចំណាំវស្សាចំនួន ០១គូ, សាដក ០១, អង្ករលេខ១ ៥០គ.ក, ទឹកដោះគោ ១០កំប៉ុង, តែ ១ថង់ធំ, មី ២កេសតូច, ទឹកភេសជ្ជៈ ២យូរ, ទឹកបរិសុទ្ធ ៥យូរ, អំបិល ១០គ.ក, ត្រីខកំប៉ុង ១យូរ, ទឹកស៊ីអីវ ១យួរ, ទឹកត្រី ១យួរ, ប៊ីចេង ១គ.ក, ស្ករស ១គ.ក ប្រេងម៉ាស៊ូត ១០លីត្រ និងបច្ច័យ ៣០ម៉ឺន ៥ពាន់រៀល។ ដោយឡែក លោកចារ្យម្នាក់ ទទួលបានថវិកា ៦ម៉ឺនរៀល ចុងភៅទទួលបានថវិកា ១០ម៉ឹនរៀល និងតាជីយាយជី៨៥នាក់ ម្នាក់ៗទទួលបានថវិការ១ម៉ឺន៥ពាន់រៀល។ បន្ថែមពីនោះ ក្រុមការងារថ្នាក់កណ្ដាលចុះជួយស្រុកស្រីស្នំ ក៏បានប្រគេន ដល់វត្តសុវណ្ណគិរីកេសរត្រោះ និង វត្តសុវណ្ណគិរីកេសរធ្លក នូវបច្ច័យក្នុងមួយវត្ត ២០ម៉ឺនរៀល និងឧបត្ថម្ភថវិកាដល់សាលាបឋមសិក្សាល្វា ចំនួន៤០ម៉ឺនរៀល។ សរុបជាទឺកប្រាក់ ចំនួន ១០លាន៧០ម៉ឺនរៀល។
បន្ទាប់ពីបញ្ចប់ពិធីប្រគេនទានចំណាំវស្សាដល់វត្តចំនួន០៩ នៅព្រឹកថ្ងៃដដែល ឯកឧត្តម លន់ សុធី ប្រធានក្រុមការងារថ្នាក់កណ្ដាលចុះជួយស្រុកស្រីស្នំខេត្តសៀមរាប និងលោកជំទាវ ព្រមទាំងក្រុមការងារ ក៏បានអញ្ជើញយកទេយ្យវត្ថុមួយចំនួនប្រគេនដល់ វត្តកោះអារញ្ញបុរីដូនសុខ និងចុះទៅពិនិត្យការដ្ឋានសាងសង់ព្រះវិហារមួយកន្លែង នៅវត្តសុវណ្ណគិរីកេសរធ្លក ស្ថិតក្នុងឃុំស្លែងស្ពាន ស្រុកស្រីស្នំ ដែលជាការផ្ដើមគំនិតដោយឯកឧត្តមប្រធានក្រុមការងារ និងគៀងគរបច្ច័យ សាងសង់ ដែលគិតមកដល់ពេលនេះ ដំណើរការបាន៤០ភាគរយហើយ។
អត្ថបទ៖ សេង ផល្លី
