ក្នុងឆមាសដំបូងនៃឆ្នាំ២០២០ ដែលគេកត់សម្គាល់ថា គឺជារយៈពេលដែលកំពុងឆ្លងកាត់វិបត្តិកូវីដ១៩ មន្ទីរពេទ្យកុមារគន្ធបុប្ផាទី៣នៅខេត្តសៀមរាប ឬ មន្ទីរពេទ្យជ័យវរ័្មនទី៧ បានបង្ហាញរបាយការណ៍ថា ក្នុងរយៈពេល៦ខែនេះ មានតែសេវាពិនិត្យស្រ្តីមានផ្ទៃពោះ និងសេវាសម្រាលកូនប៉ុណ្ណោះ ដែលត្រូវបានរក្សាអត្រាខ្ពស់ប្រហាក់ប្រហែលនឹងរយៈពេលដូចគ្នាក្នុងឆ្នាំ២០១៩ ក៏ប៉ុន្តែចំនួនកុមារដែលចូលមកទទួលសេវាពិនិត្យព្យាបាលជម្ងឺឆ្លងផ្សេងៗមានការថយចុះ ដូចជាជម្ងឺគ្រុនឈាមជាដើម គឺមានការថយចុះរហូតដល់១៦ដង តិចជាងពាក់កណ្តាល នាឆ្នាំ២០១៩កន្លងទៅ។
លោកសាស្ត្រាចារ្យ យ៉ៃ ចន្ទនា ប្រធានមន្ទីរពេទ្យជ័យវរ័្មនទី៧ បានបង្ហាញរបាយការណ៍នេះ នៅក្នុងបទសម្ភាសន៍មួយនាព្រឹកថ្ងៃសៅរ៍ ទី០៤ ខែកក្កដា ឆ្នាំ២០២០នេះ ហើយអ្វីដែលលោកបានបញ្ជាក់នៅក្នុងបទសម្ភាសន៍នោះ គឺការវាយតម្លៃចំពោះការអនុវត្តរបស់ប្រជាពលរដ្ឋ លើវិធានការអនាម័យទប់ស្កាត់ការឆ្លង និងការចម្លងវីរុសកូវីដ១៩ ក្រោមការណែនាំរបស់ក្រសួងសុខាភិបាល និងការចូលរួមគោរព តាមការអំពាវនាវរបស់ប្រមុខនៃរាជរដ្ឋភិបាលផងដែរ។ លោកថា វិធានការអនាម័យទាំងនោះ បានក្លាយជាទម្លាប់ថ្មីសម្រាប់ការរស់នៅរបស់ប្រជាពលរដ្ឋ ហើយក៏ត្រូវបានទប់ស្កាត់ជម្ងឺឆ្លងផ្សេងៗក្រៅពីកូវីដ១៩ផងដែរ ក៏ជាការវាយតម្លៃក្រោមការវិភាគមួយចំណែកដែរថា ការធ្វើអនាម័យ លាងដៃ ពាក់ម៉ាស់ និងការធ្វើចត្តាឡីស័កដោយក្រុមការងារ និងអាជ្ញាធរមូលដ្ឋាន ទៅលើប្រជាពលរដ្ឋចំណូលស្រុកមកពីក្រៅប្រទេស ដែលជាវិធានការទប់ស្កាត់រលកទី២នៅក្នុងសហគមន៍ ក៏ជាកត្តាសំខាន់ផងដែរ ដល់ការកាត់បន្ថយជម្ងឺឆ្លងដល់ទារក និងកុមារ។ ពាក់កណ្តាលឆ្នាំ២០២០នេះបានកន្លងផុតទៅ ជម្ងឺរលាកទងសួត ឬរលាកផ្លូវដង្ហើមកុមារ ត្រូវបានថយចុះ ៕
លោកសាស្ត្រាចារ្យ យ៉ៃ ចន្ទនា មានប្រសាសន៍យ៉ាងដូច្នេះថា៖
អត្ថបទ និងរូបភាព៖ ងិន គឹមឡេង
