នាព្រឹកថ្ងៃទី០៤ ខែកក្កដា ឆ្នាំ២០២០ លោក ង៉ាន់ ភិរុណ អភិបាលរងខេត្តសៀមរាប និងជាប្រធានក្រុមការងារថ្នាក់កណ្តាលចុះជួយស្រុកបន្ទាយស្រី បាននាំយកទៀនវស្សា ទេយ្យវត្ថុ និងបច្ច័យមួយចំនួនទៅវេរប្រគេនដល់ព្រះសង្ឃ ដែលគង់ចាំព្រះវស្សា ចំនួន ១០វត្ត ទៅតាមគន្លងប្រពៃណីព្រះពុទ្ធសាសនាដែលជាសាសនារបស់រដ្ឋ ស្របពេលនេះគឺជារដូវកាលដែលបងប្អូនពុទ្ធបរិស័ទកាន់សាសនាព្រះពុទ្ធ ត្រូវធ្វើវដ្តប្រតិបត្តិ ក្នុងកំឡុងដែលព្រះសង្ឃចូលព្រះវស្សា អស់កាលត្រីមាស ហើយក៏ជាតម្រូវការរបស់ព្រះភិក្ខុសង្ឃគ្រប់អង្គ ត្រូវការចាំបាច់នូវការប្រើប្រាស់ទេយ្យវត្ថុនិង ចតុបច្ច័យសម្រាប់ស្វាធ្យាយសិក្សារៀនសូត្រព្រះធម៌គុម្ពីរក្បួនខ្នាតផ្សេងៗ។
ការនាំយកទៀនវស្សាមកវេរប្រគេនព្រះសង្ឃនេះ គឺដើម្បីជាប្រទីបសម្រាប់ព្រះសង្ឃសិក្សារៀនសូត្រ បំភ្លឺនៅពេលយប់ ក្នុងពេលចូលវស្សាមានរយៈពេល៣ខែ ដូច្នេះហើយចំពោះទេយ្យទាន ដែលបាននាំយកមកវេរប្រគេនគឺ ដើមី្បគ្រប់ភិក្ខុសង្ឃទាំងអស់ ទុកប្រើប្រាស់នៅក្នុងទីវត្ត។
លោក ង៉ាន់ ភិរុណ មានប្រសាសន៍ថា៖នៅកម្ពុជាវិស័យអាណាចក្រ និងពុទ្ឋចក្រតែងតែដើរទន្ទឹមគ្នាពុំអាចខ្វះមួយណាបានឡើយ ក្នុងការចូលរួមជួយស្តារ និងអភិវឌ្ឍន៍សង្គមជាតិឲ្យរីកចំរើន ខណៈដែល រាជរដ្ឋាភិបាលកម្ពុជា បានចែងក្នុងរដ្ឋធម្មនុញ្ញថា ព្រះពុទ្ឋសាសនាជាសាសនារបស់រដ្ឋ។
លោកបញ្ជាក់ថា វិស័យព្រះពុទ្ឋសាសនានៅកម្ពុជា អាចរីកចំរើនទៅបាន គឺអាស្រ័យ ដោយប្រទេសជាតិមានសុខសន្តិភាព ហើយដោយសារសុខសន្តិភាពនេះហើយ ប្រជាពុទ្ឋបរិស័ទមានឱកាសប្រកបកិច្ចការរកស៊ីជួញដូរដោយមិនមានការភ័យខ្លាច ហើយពួកគាត់រីករាយ និងជ្រះថ្លាក្នុងការមកធ្វើបុណ្យទានផ្សេងៗ ប្រទេសយើងមានសុខសន្តិភាពទើបយើងមានឱកាសបានបំពេញបុណ្យតាមទៅកាលវេលា តាមគន្លងប្រពៃណីពីជីដូនជីតាបានពេញលេញដោយគ្មានក្តីបារម្ភ។ ពិធីចូលព្រះវស្សា គឺជាព្រះវិន័យដែលព្រះសម្មាសម្ពុទ្ធទ្រង់បញ្ញត្តិឡើង ដើម្បីឲ្យព្រះសង្ឃសាវ័កគ្រប់អង្គប្រតិបត្តិតាម ដែលមានរយៈពេល៣ខែ គឺចាប់ថ្ងៃ១រោច ខែអាសាឍ ដល់ទី១៥ កើត ខែអស្សុជ។ ការបញ្ញត្តិឲ្យមានការកាន់ព្រះវស្សា គឺព្រះពុទ្ធជាម្ចាស់ទ្រង់មានព្រះបំណងចង់ឲ្យព្រះសង្ឃមានភាពងាយស្រួលក្នុងរដូវវស្សារយៈពេលបីខែនេះ ដែលជារដូវភ្លៀងធ្លាក់ជោកជាំ។ ពិធីចូលព្រះវស្សា គឺជាពិធីបុណ្យមួយ ដែលមានសារៈសំខាន់ក្នុងព្រះពុទ្ធសាសនា និងជាពេលវេលាដ៏សំខាន់សម្រាប់ភិក្ខុសង្ឃ និងសាមណេបានរៀនធម៌ និងវិន័យយ៉ាងខ្ជាប់ខ្ជួនតាមពុទ្ធឱវាទ។
ក្រុមការងារចុះជួយស្រុកបន្ទាយស្រី ប្រគេនទេយ្យវត្ថុចំនួន១០វត្ត ក្នុងនោះរួមមាន៖ វត្តបន្ទាយស្រី វត្តត្បែង វត្តធ្លកវារ៍ វត្តសសី វត្តជប់ពពេល វត្តម្រាក្សវារ៍ វត្តស្រះដូនរីក អាស្រមវត្តភ្នំហប់ អាស្រមវត្តព្រៃជាំ និងអាស្រមពើងព្រួតដោយក្នុងមួយវត្តៗទទួលបាន៖ ទៀនចំណាំវស្សាចំនួន ០១គូ ,សាដក ០១, ទឹកផ្លែឈើ ០២កេស, ទឹកដោះគោខាប់ ០១កេស, ទឹកបរិសុទ្ធ ១០យួរ, ត្រីខ ០១កេស, មី ០១កេសធំ, អង្ករ ០២ការ៉ុង, ប៊ីចេង ០២គីឡូក្រាម, ប្រហុក ០៥គីឡូក្រាម, ទឹកស៊ីអ៊ីវ ០២យួរ, ទឹកត្រី ០២យួរ, ស្ករស ០៥គីឡូក្រាម, តែ ០១កញ្ចប់, ប្រេងម៉ាស៊ូត ៣០លីត្រ, បច្ច័យសម្រាប់៩វត្ត ក្នុងមួយវត្ត ៨សែន ៦ម៉ឺនរៀល ។ដោយឡែកនៅវត្តបន្ទាយស្រីបានចំនួន ១លាន ២សែនរៀល និងជូនថវិកាដល់គណកម្មការអាចារ្យចំនួន ៦នាក់ ម្នាក់ៗ ៥០០០០រៀល ជូនថវិកាដល់លោកតា លោកយាយជីចំនួន ៩៤នាក់ ម្នាក់ៗ ១០០០០រៀល និង ឧបត្ថម្ភដល់ក្រុមឆៃយ៉ាំចំនួន ២០០០០០រៀល សរុបជាទឹកប្រាក់ចំនួន ២០០៩៩២០០រៀល ៕
អត្ថបទ និងរូបភាព ៖ យូ វង្ស
