ភោជនីយដ្ឋាន និងតូបលក់ដូរខាងមុខប្រាសាទអង្គរវត្ត ជាង១០៥កន្លែង នឹងត្រូវដាក់បញ្ចូលទៅក្នុង ទីលានបដិសណ្ឋារកិច្ច ដែលគ្រោងនឹងដាក់ឲ្យដំណើរការអំឡុងខែកញ្ញា ឆ្នាំ២០២០ នេះបើតាមការឲ្យដឹងពី លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរាទទួលបន្ទុកកិច្ចការរៀបចំកែលម្អបរិវេណមុខប្រាសាទអង្គរវត្ត នៅព្រឹកថ្ងៃទី៦ ខែកក្កដា ឆ្នាំ២០២០ ។
លោក អគ្គនាយករង បញ្ជាក់ថា អាជ្ញាធរជាតិអប្សរាគ្រោងនឹងបញ្ចប់ការរុះរើសំណង់ទាំងស្រុងនៅជុំវិញបរិវេណខាងមុខប្រាសាទអង្គរវត្ត និងត្រពាំងសេស សរុបជាង១៥០តូប ឲ្យបាននៅត្រឹមចុងខែសីហាខាងមុខនេះ ខណៈបច្ចុប្បន្ន គម្រោងកែលម្អសោភណ្ឌភាពខាងមុខប្រាសាទអង្គរវត្ដ ដំណើរការបានប្រហែល៧០ភាករយ និងគ្រោងបញ្ចប់នៅចុងឆ្នាំ២០២០នេះ។
គិតមកត្រឹមថ្ងៃទី០៦ ខែកក្កដានេះ មានភោជនីយ៍ដ្ឋានខាងមុខប្រាសាទអង្គរវត្ត ចំនួន១៥កន្លែងហើយ ដែលបានស្ម័គ្រចិត្តរុះរើដោយខ្លួនឯង ដែលភោជនីយ៍ដ្ឋាននីមួយៗ មានអាយុកាលប្រហែលជាង២០ឆ្នាំមកហើយ។ ប៉ុន្តែពួកគាត់ហាក់នៅតែបង្ហាញពីភាពសោកស្តាយ ចំពោះទីតាំងចាស់។ ទោះជាយ៉ាងណាក៏ដោយ ពួកគាត់រំពឹងថា អាជ្ញាធរអប្សរា នឹង អនុវត្តគោលការណ៍ រុះរើ និងផ្ដល់ទីតាំងថ្មី មានភាពស្មើៗគ្នា។
អត្ថបទ និងរូបភាព៖ លោក បូ សាវី
កែសម្រួលអត្ថបទ៖ លោក សេង ផល្លី
