គិតត្រឹមថ្ងៃទី០៧ ខែកក្កដា ឆ្នាំ២០២០ ប្រជាពលរដ្ឋ មានបណ្ណក្រីក្រជិត៣ម៉ឺនគ្រួសារ ក្នុងខេត្តសៀមរាប ទទួលបានប្រាក់ឧបត្ថម្ភពីរាជរដ្ឋាភិបាល អំឡុងវិបត្តិជំងឺកូវីដ១៩ ក្នុងដំណាក់កាលទី១ ដែលមានរយៈពេល២ខែ ចាប់ពីខែមិថុនា និងខែកក្កដា ឆ្នាំ២០២០ នេះបើតាមការបញ្ជាក់ពីលោក អ៊ួន អ៊ាត ប្រធានការិយាល័យសុខុមាលភាពសង្គម នៃមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប។
លោកប្រធានការិយាល័យ បញ្ជាក់បន្ថែមថា គិតមកដល់ពេលនេះ ការឧបត្ថម្ភសាច់ប្រាក់របស់រាជរដ្ឋាភិបាល អំឡុងវិបត្តិជំងឺកូវីដ១៩ ជូនដល់ប្រជាពលរដ្ឋមានបណ្ណក្រីក្រ ឬហៅថាបណ្ណសមធម៌ ក្នុងខេត្តសៀមរាបក្នុងដំណាក់កាលទី១ មានចំនួនជាង៥ពាន់លានរៀលហើយ។ ក្នុងការឧបត្ថម្ភនេះដែរ គ្រួសារនីមួយៗ ទទួលបានថវិកាមិនដូចគ្នាទេ គឺអាស្រ័យទៅលើស្ថានភាពសមាជិកគ្រួសារ ដូចជាជនពិការ ជនមានផ្ទុកមេរោគអេដស៍ និងចាស់ជរាចាប់ពីអាយុ៦០ឆ្នាំឡើងជាដើម ដែលមានការស្រង់ព័ត៌មានពីមន្ត្រីធ្វើអត្តសញ្ញាណ និងបានកំណត់ការឧបត្ថម្ភតាមរយៈប្រព័ន្ធអនឡាញរបស់រាជរដ្ឋាភិបាល។
បើតាមការឲ្យដឹងពី លោកស្រី ស្រី សុគុណ អនុប្រធានមន្ទីរផែនការខេត្តសៀមរាប បង្ហាញថា ការផ្សព្វផ្សាយ អំពីការឧបត្ថម្ភសាច់ប្រាក់របស់រាជរដ្ឋាភិបាល អំឡុងវិបត្តិជំងឺកូវីដ១៩ ជូនដល់ប្រជាពលរដ្ឋមានបណ្ណក្រីក្រ បានចាប់ផ្ដើមតាំងពីថ្ងៃទី២៥ ខែឧសភា ឆ្នាំ២០២០មកម្ល៉េះ នៅតាមឃុំ-សង្កាត់ នៅទូទាំងក្រុង-ស្រុកទាំង១២ ក្នុងខេត្តសៀមរាប។
លោកស្រីអនុប្រធានមន្ទិរ បញ្ជាក់ថា ការឧបត្ថម្ភសាច់ប្រាក់របស់រាជរដ្ឋាភិបាល អំឡុងវិបត្តិជំងឺកូវីដ១៩ នេះ គឺផ្ដល់ជូនសម្រាប់គ្រួសារក្រីក្រដែលមានបណ្ណក្រីក្រ ក្រ១ និងក្រ២ ពុំមែនផ្ដល់ជូនជាលក្ខណៈបុគ្គលឡើយ។ ចំពោះការស្នើសុំធ្វើបណ្ណក្រីក្រនេះ ប្រជាពលរដ្ឋក្រីក្រ អាចទៅស្នើសុំពាក្យពីសាលាឃុំ សាលាសង្កាត់ ក្នុងមូលដ្ឋានរបស់ខ្លួន និងសម្ភាសន៍រហូតដល់ដំណាច់ខែធ្នូ ឆ្នាំ២០២០នេះ។
គួររំលឹកថា កាលពីថ្ងៃទី៣០ ខែមិថុនា ឆ្នាំ២០២០កន្លងមកនេះ សម្តេចតេជោ ហ៊ុន សែន នាយករដ្ឋមន្ត្រី បានព្រមានចាត់វិធានការក្តៅ ដោយគ្មានការលើកលែងនោះឡើយ ប្រសិនបើរកឃើញភាពមិនប្រក្រតីលើការអនុវត្តន៍កម្មវិធីឧបត្ថម្ភសាច់ប្រាក់ជូនប្រជាពលរដ្ឋក្រីក្រ និងងាយរងគ្រោះដោយសារជំងឺកូវីដ១៩។ ជាពិសេសការឃុបឃិតគ្នាដាក់សាច់ញាតិខ្លួន ដើម្បីទទួលបានប្រាក់ឧបត្ថម្ភ។
អត្ថបទ និងរូបភាព៖ មន្ទីរព័ត៌មានខេត្តសៀមរាប
