កុមារកម្ពុជា ងាយនឹងក្លាយជាជនរងគ្រោះ ដោយសារការរំលោភបំពាន និងកេងប្រវ័ញ្ចផ្លូវភេទតាមរយៈការប្រើប្រាស់ទូរស័ព្ទដៃវៃឆ្លាត នេះបើតាមប្រសាសន៍ លោកជំទាវ ញ៉េប សុភាព អគ្គលេខាធិការ នៃអគ្គលេខាធិការដ្ឋានក្រុមប្រឹក្សាជាតិកម្ពុជា ដើម្បីកុមារ នៅក្នុងវគ្គបណ្តុះបណ្តាលស្តីពីការឆ្លើយតបការកេងប្រវ័ញ្ចផ្លូវភេទលើកុមារតាមប្រព័ន្ធអ៊ីនធឺណិត ដែលធ្វើឡើងនៅខេត្តសៀមរាប នៅថ្ងៃទី០៧ខែកក្កដា ឆ្នាំ២០២០នេះ។
លោកជំទាវអគ្គលេខាធិការ បញ្ជាក់ថា ការរំលោភបំពាន និងការកេងប្រវ័ញ្ចផ្លូវភេទ តាមប្រព័ន្ធអ៊ិនធើណិត កាន់តែមានភាពស្មុគស្មាញ និងកាន់តែអាក្រក់ទៅៗ ដូចជា ការចាប់ជម្រិត ការជួញដូរមនុស្ស និងពេស្សាចាជាដើម។ លើសពីនោះ កុមាររងគ្រោះពីការកេងប្រវ័ញ្ចផ្លូវភេទ បានបន្សល់នូវផលប៉ះពាល់ធ្ងន់ធ្ងរទាំងផ្លូវកាយ និងផ្លូវ កុមាររងគ្រោះទាំងនោះភាគច្រើន មានអារម្មណ៍ពិបាកក្នុងការទុកចិត្តអ្នកដទៃ អស់សង្ឈឹម បាក់ទឹកចិត្ត ឯកា ច្របូកច្របល់ ខកចិត្ត ស្តីបន្ទោសខ្លួនឯង និងឆាប់ភ័យខ្លាចជាដើម។
នាពេលកន្លងមក ដើម្បីការពារឧត្តមប្រយោជន៍កុមារ ប្រទេសកម្ពុជាបានផ្តល់សច្ចាប័នលើអនុសញ្ញាស្តីពីសិទ្ធិកុមារ នៅថ្ងៃទី១៥ ខែតុលា ឆ្នាំ១៩៩២ និងពិធីសារបន្ថែមនៃអនុសញ្ញាស្តីពីសិទ្ធិកុមារមួយចំនួនទៀត។ ក្នុងនោះ រាជរដ្ឋាភិបាល បានយកចិត្តទុកដាក់ខ្ពស់ចំពោះការអនុវត្តច្បាប់អន្តរជាតិនានា និងបានដាក់ចេញនូវវិធានការជាច្រើន រួមមាន ការរៀបចំច្បាប់ គោលនយោបាយ ផែនការយុទ្ធសាស្រ្ត និងលិខិតបទដ្ឋាននានាជាច្រើន។ ការលើកកម្ពស់ និងការការពារកុមារ គឺជាបញ្ហាអាទិភាពរបស់រាជរដ្ឋាភិបាល ដោយបានដាក់បញ្ចូលទៅក្នុងកម្មវិធីគោលនយោបាយ ជាពិសេស យុទ្ធសាស្រ្តចតុកោណដំណាក់កាលទី៤ ក្នុងយុទ្ធសាស្រ្តទី១ “ការអភិវឌ្ឍធនធានមនុស្ស” និងផែនការ មួយចំនួនដែលពាក់ព័ន្ធកិច្ចការពារ និងលើកម្ពស់សិទ្ធិកុមារ។
ថ្លែងក្នុងឱកាសនោះ លោក នាក់ ណេរ៉ុន អភិបាលរងខេត្តសៀមរាប លើកឡើងថា ដោយសារមានការខ្វះខាតក្នុងជីវភាពប្រចាំថ្ងៃ រួមនិងវិបត្តិនៃជំងឺកូវីដ១៩ ប្រជាពលរដ្ឋក្នុងខេត្តសៀមរាប បានចាញ់បោកការឃោសនារបស់ជនខិលខូច គ្រប់រូបភាព ជាពិសេសការទំនាក់ទំនងតាមបណ្ដាញសង្គម ដែលផ្ដល់ផលអវិជ្ជមានដល់ប្រជាពលរដ្ឋខ្វះចំណេះដឹង ជឿជាក់ថា ការផ្សព្វផ្សាយទាំងនោះពិតជាមានភាពស្របច្បាប់ រហូតដល់ការហ៊ានធ្វើចំណាកស្រុកទៅធ្វើការនៅក្រៅប្រទេស ដោយខុសច្បាប់។
លោកអភិបាលរងខេត្ត បង្ហាញថា ក្នុងអំឡុងវិបត្តិជំងឺកូវីដ១៩ ក្រុមការងារទទួល និងដឹកជញ្ជូន ប្រជាពលរដ្ឋខ្មែរត្រឡប់មកពីបរទេសខេត្តសៀមរាប សង្កេតឃើញថា ក្នុងមួយថ្ងៃ មានប្រជាពលរដ្ឋខ្មែរប្រមាណ៨០ ទៅ១០០នាក់ បានត្រឡប់មកពីប្រទេសថៃ តាមច្រកព្រំដែនអន្តរជាតិ កម្ពុជា-ថៃ ក្នុងនោះក៏មានកុមារផងដែរ។
លោកអភិបាលរងខេត្ត ក៏បានអំពាវនាវ ដល់ក្រសួង ស្ថាប័ន្ថពាក់ព័ន្ធទាំងអស់ សូមជួយចាត់វិធានការបន្ថែមទៀត ដើម្បីទប់ស្កាត់ពលកម្មកុមារ ជាពិសេសការកុមារដែលធ្វើចំណាកស្រុកទៅបរទេស។ ក្នុងនោះ លោកក៏បានអំពាវនាវ ដល់ប្រជាពលរដ្ឋខ្មែរទាំងអស់ សូមមានការអត់ធ្មត់ ក្នុងការធ្វើចំណាកស្រុកទៅធ្វើការនៅបរទេស ព្រោះបច្ចុប្បន្នជំងឺកូវីដ១៩ នៅមិនទាន់មានភាពល្អប្រសើរនៅឡើយទេ នៅតាមបណ្ដាប្រទេសមួយចំនួនក្នុងតំបន់។ សូមរង់ចាំសេចក្ដីណែនាំផ្លូវណាមួយពីរាជរដ្ឋាភិបាលកម្ពុជា អំពីការបើកច្រកព្រំដែនរវាងប្រទេសកម្ពុជា ជាមួយបណ្ដាប្រទេសនានា មុននឹងសម្រេចចិត្តទៅធ្វើការនៅក្រៅប្រទេស។
អត្ថបទ និងរូបភាព៖ លោក បូ សាវី
កែសម្រួលអត្ថបទ៖ លោក សេង ផល្លី
