កាលពីថ្ងៃទី០៧ ខែកក្កដា ឆ្នាំ២០២០នេះ ប្រជាពលរដ្ឋដែលរស់នៅក្នុងភូមិត្រពាំងថ្ម ឃុំឃុនរាម ស្រុកបន្ទាយស្រី បានទទួលអណ្ដូងទឹកខ្នាតធំចំនួន៤ ដែលជាដំណោះស្រាយចំគោលដៅនៃតម្រូវការដ៏ចាំបាច់ នៅក្នុងភូមិដែលតែងតែជួបបញ្ហាខ្សត់ទឹកប្រើប្រាស់ធ្ងន់ធ្ងររៀងរាល់រដូវប្រាំងមួយនេះ ដែលអំណោយនេះដែរជារបស់សប្បុរសជនដែលរស់នៅក្នុងខេត្តសៀមរាប ។
បើតាមលោក ឃឹម ហ្វីណង់ អភិបាលស្រុកបន្ទាយស្រី បានបញ្ជាក់ថា នៅក្នុងស្រុកបន្ទាយស្រីក្រៅពីអណ្តូងស្នប់ជ្រៅ ភូមិត្រពាំងថ្មក៏ទទួលបានការជួយដោះស្រាយការលំបាកជាច្រើនផ្សេងទៀតពីសំណាក់អាជ្ញាធរមូលដ្ឋាន និងសប្បុរសជននានា រួមមាន៖ ផ្លូវក្រាលគ្រួសក្រហម៣ខ្សែ ការចាប់ផ្តើមតភ្ជាប់បណ្តាញអគ្គីសនីចូលមកក្នុងភូមិ ស្រះទឹកធំចំនួន២ បញ្ចប់ការបោសសម្អាតគ្រាប់មីនទាំងស្រុងនៅក្នុងភូមិ បំពាក់អំពូលសូឡាជូនគ្រប់ៗផ្ទះ និងទទួលការចែកអំណោយទ្រង់ទ្រាយធំចំនួន៣ដងដែលសមិទ្ធិផលទាំងអស់នេះសុទ្ធតែកើតមានឡើងក្នុងឆ្នាំ២០២០នេះទាំងអស់ ។
លោក ឃឹម ហ្វីណង់ បន្ថែមថា ថ្ងៃខាងមុខ នៅពេលដែលតម្រូវការជាមូលដ្ឋានគ្រឹះត្រូវបានបំពេញរួចហើយ រដ្ឋបាលស្រុកនឹងបង្វែរអាទិភាពមកផ្តោតលើការបង្កើតការងារ និងមុខរបរដល់ភូមិក្រីក្រនេះវិញ ដោយសង្ឃឹមថាជំនាន់ក្រោយនៃអ្នកត្រពាំងថ្មនឹងអាចផ្លាស់ប្តូរជោគវាសនារបស់ខ្លួនបាន ។ ក្នុងឱកាសនោះដែរលោកអភិបាលស្រុកបន្ទាយស្រី ជំនួសមុខអោយប្រជាពលរដ្ឋទាំង ២៤៥គ្រួសារនៅក្នុងភូមិទីទ័លក្រជាងគេមួយនៅក្នុងស្រុកបន្ទាយស្រី បានថ្លែងអំណរគុណយ៉ាងជ្រាលជ្រៅ ចំពោះសប្បុរសជនក្នុងខេត្តសៀមរាប ដែលបានចូលរួមជាមួយរដ្ឋបាលស្រុកបន្ទាយស្រី ក្នុងគម្រោងជួយដោះស្រាយវិបត្តិខ្វះខាតទឹកប្រើប្រាស់នៅក្នុងភូមិត្រពាំងថ្ម ដោយបានចូលរួមឧបត្ថម្ភជាអណ្តូងធំស្នប់ជ្រៅចំនួន៤នេះឡើង ។
លោក ចាន់ ឃុង មានប្រសាសន៍ថា អណ្តូង៤នេះមិនទាន់អាចដោះស្រាយបានបញ្ហាខ្វះខាតទឹកទាំងស្រុងបានមែន តែសង្ឃឹមថាវានឹងជួយសម្រាលដល់ការលំបាកខ្លះៗរបស់អ្នកភូមិបានមួយកម្រិតថែមទៀត ទុកគ្រាន់ចែកគ្នាប្រើប្រាស់ទឹក ក្នុងចន្លោះពី១០ ទៅ ២០គ្រួសារក្នុងមួយអណ្តូង ។ ក្នុងនោះដែររហូតមកដល់ពេលនេះ ភូមិត្រពាំងថ្មបានទទួលអំណោយជាអណ្តូងធំស្នប់ជ្រៅដែលមានតម្លៃខ្ពស់ចំនួន ១២រួចមកហើយ ហើយរដ្ឋបាលស្រុកនឹងបន្តស្វែងរកជំនួយឧបត្ថម្ភផ្សេងៗបន្ថែមទៀត ដែលបន្តិចម្តងៗនឹងឈានទៅដល់ការរកបាននូវដំណោះស្រាយអចិន្ត្រៃយ៍ និងបញ្ចប់ទាំងស្រុងនូវបញ្ហាប្រឈមនឹងការខ្វះខាតទឹកក្នុងភូមិមួយនេះ។
នៅក្នុងឱកាសនោះ លោក ចាន់ ឃុង ក៏បានរៀបចំជាអំណោយជូនដល់ក្រុមគ្រួសារ ដែលមានជីវភាពលំបាកជាងគេនៅក្នុងភូមិចំនួន ១០០គ្រួសារ ដោយគិតជាទឹកប្រាក់ឧបត្ថម្ភសរុបទាំងអណ្តូង និងអំណោយស្មើនឹង ៨០០០ដុល្លារអាមេរិក ៕
អត្ថបទ និង រូបភាព ៖ គឿន វ៉េត
