របៀបវារៈចំនួន២ គឺការពិនិត្យ ពិភាក្សា និងអនុម័តសេចក្តីព្រាងកំណត់ហេតុកិច្ចប្រជុំសាមញ្ញលើកទី១៣ របស់ក្រុមប្រឹក្សាខេត្តសៀមរាប អាណត្តិទី៣ និងការពិនិត្យ ពិភាក្សា អនុម័ត លើសេចក្តីព្រាងរបាយការណ៍ប្រចាំឆមាសទី១ ឆ្នាំ២០២០ ស្តីពីការអនុវត្តការងាររបស់រដ្ឋបាលខេត្តសៀមរាប គឺជារបៀបវារៈសំខាន់នៅក្នុងកិច្ចប្រជុំសាមញ្ញលើកទី១៤ របស់ក្រុមប្រឹក្សាខេត្តសៀមរាប អាណត្តិទី៣ ដែលបានធ្វើឡើងនៅសាលប្រជុំធំសាលាខេត្តសៀមរាប នារសៀលថ្ងៃទី០៨ ខែកក្កដា ឆ្នាំ២០២០នេះ ក្រោមអធិបតីភាព ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និង ឯកឧត្តម ទៀ សីហា អភិបាលខេត្តសៀមរាប រួមនិងវត្តមាន ថ្នាក់ដឹកនាំមន្ទីរ មន្រ្តីជំនាញសំខាន់ៗជុំវិញខេត្ត ដែលពាក់ព័ន្ធទៅនឹងកិច្ចប្រជុំនេះ។
នៅក្នុងសេចក្តីព្រាងរបាយការណ៍អនុវត្តការងាររបស់រដ្ឋបាលខេត្ត ប្រចាំឆមាសទី១ ឆ្នាំ២០២០ កិច្ចប្រជុំបានកត់សម្គាល់ទៅលើការបង្ហាញថ្មី ស្តីពីការអនុវត្តវិធានការ ការពារទប់ស្កាត់ ការឆ្លងនិងការចម្លងវារុសកូវីត១៩ ដែលជាការអំពាវនាវប្រកបដោយប្រសិទ្ធភាពរបស់ប្រមុខរាជរដ្ឋាភិបាល និងការណែនាំរបស់ក្រសួងសុខាភិបាល។ ជាមួយគ្នានេះ អ្វីដែលជារនាំងទប់ស្កាត់រលកទី២ចូលក្នុងសហគមន៍ ខេត្តបានចាត់តាំងក្រុមការងារទៅទទួលបងប្អូនប្រជាពលរដ្ឋ តាមច្រកព្រំដែនកម្ពុជា-ថៃ ដើម្បីធ្វើចត្តាឡីស័ក ដាក់ឲ្យនៅដាច់ដោយឡែក១៤ថ្ងៃ មុនមានការអនុញ្ញាតឲ្យជួបជុំក្រុមគ្រួសារវិញ ក្នុងនោះបើគិតចាប់ពីថ្ងៃទី១០ខែមីនា ដល់ថ្ងៃទី២៨ ខែមិថុនា ឆ្នាំ២០២០ ប្រមាណជាជិត ១ម៉ឺន ៥ពាន់នាក់។
កិច្ចពិភាក្សាក្នុងឱកាសនោះ ក៏បានយកចិត្តទុកដាក់ទៅលើការស្រង់ស្ថិតិប្រជាពលរដ្ឋក្រីក្រ ដែលកំពុងទទួលរងផលប៉ះពាល់ដោយវិបត្តិកូវីត១៩ផងដែរ។ តាមរយៈសេចក្តីរាយការណ៍របស់មន្ទីរជំនាញ បានបញ្ជាក់ឲ្យដឹងថា ស្ថិតិជនក្រីក្រមុនមានវិបត្តិកូវីត១៩ រួមមានចំនួន ជាង២ម៉ឺ៨ពាន់នាក់ ក្នុងនេះប្រភេទ ក្រ១ ចំនួនជាង១ម៉ឺននាក់ និងប្រភេទ ក្រ២ មានចំនួនជាង១ម៉ឺន៨ពាន់នាក់។ ក្នុងវិបត្តិកូវីត១៩ ការស្រង់ស្ថិតិប្រជាពលរដ្ឋដែលរងផលប៉ះពាល់ មានចំនួនសរុបជាង៧,១៣១នាក់ ក្នុងនេះប្រភេទក្រី១ មានចំនួន ២,៩៣២នាក់ ប្រភេទក្រ២ មានចំនួន ៤,១៩៩នាក់ និងកំពុងធ្វើបច្ចុប្បន្នភាពបន្តទៀត។ ប្រជាពលរដ្ឋក្រីក្រដែលមានឈ្មោះនៅក្នុងស្ថិតិនេះ ត្រូវបានទទួលជំនួយសង្គម ឧបត្ថម្ភជាសាច់ប្រាក់ពីរាជរដ្ឋាភិបាល ជាគ្រួសារផង និងជាបុគ្គលផងដែរ។
ព័ត៌មានជាតិ ថ្មីៗ
ជាមួយនោះ កិច្ចប្រជុំសាមញ្ញលើកទី១៤ របស់ក្រុមប្រឹក្សាខេត្តសៀមរាប អាណត្តិទី៣ នេះ ក៏បានចាប់អារម្មណ៍ពិភាក្សាទៅលើការកំណត់របបប្រជុំប្រចាំខែ ត្រីមាស និងឆមាស របស់បណ្តាស្រុក-ក្រុងផងដែរ ដោយមានការកំណត់ឯកភាពលើថ្ងៃណាមួយ ដើម្បីធ្វើការបូកសរុបលទ្ធផលការងាររបស់ខ្លួន បញ្ជូនមករដ្ឋបាលខេត្តបានទាន់ពេលវេលា។
អត្ថបទ និងរូបភាព៖ លោក ងិន គឹមឡេង
កែសម្រួលអត្ថបទ៖ លោក សេង ផល្លី
