បន្ទប់សង្គ្រោះបន្ទាន់កុមារ និងបន្ទប់សង្គ្រោះបន្ទាន់ទារកក្រោយពេលសម្រាល នៅមន្ទីរពេទ្យជ័យវរ្ម័នទី៧សៀមរាប ឬមន្ទីរពេទ្យគន្ធបុប្ផាទី៣ គឺជាសមិទ្ធផលថ្មីមួយទៀត ក្រោមជំនួយរបស់មូលនិធិគន្ធបុប្ផាកម្ពុជា ដើម្បីជួយសង្គ្រោះជីវិតកុមារ និងទារកនៅកម្ពុជា ដោយមិនគិតថ្លៃ។
តាមការឲ្យដឹងពីលោកសាស្ត្រាចារ្យ យ៉ៃ ចន្ទនា ប្រធានមន្ទីពេទ្យជ័យវរ័្មនទី៧ នៅព្រឹកថ្ងៃទី០៦ ខែកក្កដា ឆ្នាំ២០២០នេះ បន្ទប់សង្គ្រោះបន្ទាន់ថ្មីទាំងពីរនេះ ពិតជាមានសារសំខាន់ណាស់ ដើម្បីសម្រួលដល់ការជួយសង្គ្រោះជីវិតកុមារ និងទារកទើបនឹងសម្រាល មកពីគ្រប់តំបន់នៃប្រទេសកម្ពុជា។
លោកសាស្ត្រាចារ្យ ក៏បានលើកឡើងផងដែរថា នៅឆ្នាំ២០២០នេះ ស្រ្តីដែលបានមកទទួលសេវាពិនិត្យផ្ទៃពោះនៅមន្ទីរពេទ្យជ័យវរ័្មនទី៧ ខេត្តសៀមរាប នៅតែមានអត្រាខ្ពស់ដដែល គឺប្រមាណពី ៤០០ទៅ៦០០នាក់ក្នុងមួយថ្ងៃ ស្រ្តីសម្រាលកូនមានពី៧០ ដល់១០០នាក់ក្នុងមួយថ្ងៃ ក្នុងនេះមានការវះកាត់ពី១០ទៅ១៥ករណី ដោយឡែកមានការវះកាត់ទូទៅកុមារ មានជាមធ្យម៣០នាក់ក្នុងមួយថ្ងៃ។
មានប្រសាសន៍ក្នុងឱកាសចុះពិនិត្យ ការដាក់ឲ្យដំណើរការបន្ទប់សង្គ្រោះបន្ទាន់កុមារ និងបន្ទប់សង្គ្រោះបន្ទាន់ទារកក្រោយពេលសម្រាក នៅមន្ទីរពេទ្យជ័យវរ្ម័នទី៧សៀមរាប ឯកឧត្តមបណ្ឌិត ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានលេខាធិការដ្ឋានមូលនិធិគន្ធបុប្ផាកម្ពុជា បង្ហាញថា បន្ទប់សង្គ្រោះបន្ទាន់ថ្មីទាំងពីរនេះ ទទួលបានវិភាគទានពីមូលនិធិគន្ធបុប្ផាកម្ពុជាជាទឹកប្រាក់១លានដុល្លារអាមេរិច ដើម្បីដំណើរការសាងសង់អាគារ និងបំពាក់ឧបករណ៍វេជ្ជសាស្ត្រទំនើបៗ។
ឯកឧត្តមបញ្ជាក់ថា នេះក៏ជាលើកទី២ហើយ សម្រាប់មូលនិធិគន្ធបុប្ផាកម្ពុជា ក្នុងការចូលរួមវិភាគទានសាងសង់ និងបំពាក់ឧបករណ៍វេជ្ជសាស្ត្រទំនើបនៅក្នុងបន្ទប់សង្គ្រោះបន្ទាន់កុមារនិងទារក ដែលលើក០១ ធ្វើឡើងនៅមន្ទីរពេទ្យគន្ធបុប្ផាភ្នំពេញនៃអគារគន្ធបុប្ផា មុនីនាថ សីហមុនី កាលពីខែមិថុនា ឆ្នាំ២០១៩កន្លងទៅនេះ ដោយបន្ថែមពីលើការចូលរួមគាំទ្រផ្នែកហិរញ្ញវត្ថុជាប្រចាំ ដល់កិច្ចដំណើរការរបស់មន្ទីពេទ្យគន្ធបុប្ផា។
សូមជម្រាបថា៖ បន្ទប់សង្គ្រោះបន្ទាន់ទារកក្រោយពេលសម្រាល នៃមន្ទីរពេទ្យជ័យវរ័្មនទី៧ ខេត្តសៀមរាប ចាប់ផ្ដើមដំណើរការផ្ដល់សេវា នៅថ្ងៃទី២០ ខែមេសា ឆ្នាំ២០២០ និងបន្ទប់សង្គ្រោះបន្ទាន់កុមារ ចាប់ផ្ដើមដំណើរការផ្ដល់សេវា នៅថ្ងៃទី០១ ខែមិថុនា ឆ្នាំ២០២០។
គួរបញ្ជាក់ដែរថា៖ មន្ទីរពេទ្យគន្ធបុប្ផាទាំង០៥ទីតាំង បានផ្ដល់សេវាពិនិត្យ ព្យាបាល និងសង្គ្រោះជីវិតកុមាររាប់ម៉ឺននាក់ដោយឥតគិតថ្លៃ ជាមួយនឹងការចំណាយថវិកាប្រមាណពី ៤៥លាន ទៅ ៥០លានដុល្លារ ក្នុងមួយឆ្នាំៗ។ ថវិកាចំណាយទាំងនេះ ទទួលបានមកពីការចូលរួមបរិច្ចាគពីសំណាក់សប្បុរសជនទាំងក្នុងវិស័យឯកជន និងវិស័យសាធារណៈ រួមមាន មូលនិធិគន្ធបុប្ផាស្វីស ឬមូលនិធិគន្ធបុប្ផា Dr. Beat Richner, និងមូលនិធិគន្ធបុប្ផាកម្ពុជា ព្រមទាំងរាជរដ្ឋាភិបាលកម្ពុជា ដើម្បីនាំមកនូវស្នាមញញឹមដល់កុមារ ក្នុងស្មារតីជួយគ្នាទៅវិញទៅមក ក្រោមពាក្យស្លោក “ខ្មែរជួយខ្មែរ” និងដើម្បីលើកកម្ពស់សុខុមាលភាពរបស់កុមាររាប់លាននាក់នៅកម្ពុជា ដែលជាអាទិភាពមួយនៃក្របខណ្ឌគោលនយោបាយជាតិគាំពារសង្គម របស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ៕
អត្ថបទ និងរូបភាព៖ លោក ងិន គឹមឡេង
កែសម្រួលអត្ថបទ៖ លោក សេង ផល្លី
