នៅថ្ងៃទី០៦ ខែកក្កដា ឆ្នាំ២០២០ នេះ លោកអៀង ពិសិដ្ឋ អភិបាលស្រុកស្វាយលើ បង្ហាញថា ការសម្រេចលទ្ធផលនៃការសាងសង់ ឬជួសជុលអាស្រមពើងតាអេវ លើកំពូលភ្នំ ស្ថិតក្នុងភូមិសង្កែឡាក់ ឃុំខ្នងភ្នំ ស្រុកស្វាយលើ ខេត្តសៀមរាប គឺត្រូវមានលិខិតអនុញ្ញាតពីអាជ្ញាធរជាតិអប្សរាជាមុន ដោយសារទីតាំងនោះ ជាទីតាំងបុរាណដ្ឋានកំពុងអភិរក្ស។
លោកអភិបាលស្រុក បញ្ជាក់ថា ចំពោះសំណើ ដែលបានដាក់មកអាជ្ញាធរស្រុក លោកបានបង្កើតគណៈកម្មការថ្នាក់ស្រុកមួយ តាមសេចក្ដីណែនាំរបស់រដ្ឋបាលខេត្ត ដើម្បីសហការជាមួយអាជ្ញាធរជាតិអប្សរា ធ្វើការសិក្សាបន្ថែម សម្រាប់ពិនិត្យលទ្ធភាពផ្លូវច្បាប់ ក្នុងការសាងសង់ ឬជួសជុលអាស្រមពើងតាអេវនេះ។
ពាក់ព័ន្ធនឹងបញ្ហានេះលោក ឡុង កុសល ប្រធាននាយកដ្ឋានផ្សព្វផ្សាយ និងជាអ្នកនាំពាក្យអាជ្ញាធរជាតិអប្សរា បានឲ្យដឹងថា ក្រុមការងារជំនាញ នៃអាជ្ញាធរជាតិអប្សរា បានទទួលលិខិតស្នើសុំរបស់គណកម្មការអាស្រមពើងតាអេវរួចរាល់ហើយកាលពីអំឡុងខែឧសភា។ ជាក់ស្ដែងកាលពីខែមិថុនា ក្រុមការងារជំនាញ បានចុះពិនិត្យដល់ទីតាំងផ្ទាល់ ប៉ុន្តែលទ្ធផលយ៉ាងណា នៅមិនទាន់អាចឆ្លើយតបភ្លាមៗបាននោះទេ គឺត្រូវរង់ចាំពិនិត្យឯកសារផ្លូវច្បាប់នៃការបង្កើតអាស្រមនោះជាមុនសិន។
លោកឡុង កុសល បញ្ជាក់ថា នៅសប្តាហ៍ក្រោយនេះ មន្ត្រីជំនាញអាជ្ញាធរជាតិអប្សរា និងអាជ្ញាធរស្រុកស្វាយលើ នឹងបន្តចុះពិនិត្យទីតាំងនោះម្តងទៀត ដើម្បីប្រមូលឯកសារឲ្យបានគ្រប់គ្រាន់។ តាមគោលការណ៍ របស់អាជ្ញាធរជាតិអប្សរា ពុំបដិសេដ ចំពោះសំណង់មានច្បាប់ត្រឹមត្រូវ និងបម្រើផលប្រយោជន៍សាធារណៈឡើយ។
សូមជម្រាបផងដែរថាអាស្រមពើងតាអេវនេះ ត្រូវបានអគ្គីភ័យឆាបឆេះកាលពីអំឡុងខែឧសភាឆ្នាំ២០២០កន្លងទៅ ដោយសារមូលហេតុ ការអុចធូបទៀនមិនបានប្រុងប្រយ័ត្ន។ អាស្រមនេះមានទំហំប្រហែល២០ម៉ែត្រគុណនិង២០ម៉ែត្រ ជាកន្លែងសម្រាប់ធ្វើពិធីសក្ការៈបូជាផ្សេងៗ និងជាទីតាំងសាលាឆាន់របស់ព្រះសង្ឈផងដែរ។ដោយកាលពីសាងសង់ដំបូងគឺមិនមានច្បាប់អនុញ្ញាតពីអាជ្ញាធរឡើយ។ប៉ុន្តែក្រោយពីអគ្គិភ័យឆាបឆេះរួច គណៈកម្មការនៅទីតាំងបានដាក់ពាក្យស្នើសុំសាងសង់ថ្មីតាមរយៈអាជ្ញាធរស្រុករួចហើយ៕
អត្ថបទ និងរូបភាព៖ មន្ទីរព័ត៌មានខេត្តសៀមរាប
