ទៀនព្រះវស្សា ចំនួន៤៥គូ និង ទេយ្យទានមួយចំនួនទៀត ត្រូវបានឯកឧត្តម អ៊ឹង ហឿន ប្រធានក្រុមប្រឹក្សាខេត្ត និងឯកឧត្តម ទៀ សីហា អភិបាលខេត្តសៀមរាប និងលោកជំទាវ អមដំណើរដោយឯកឧត្តម លោកឧកញ៉ា លោកជំទាវ គណៈអភិបាលខេត្ត សមាជិកក្រុមប្រឹក្សាខេត្ត និង ថ្នក់ដឹកនាំមន្ទីរ អង្គភាព មន្ត្រីរាជការ បានដង្ហែនាំយកទៅវេរប្រគេនព្រះសង្ឃគង់ចាំព្រះវស្សាចំនួន៤៥វត្ត នៅក្នុងក្រុងសៀមរាប នាព្រឹកថ្ងៃទី០៤ ខែកក្កដា ឆ្នាំ២០២០។ ពិធីនេះប្រារព្វធ្វើនៅវត្តរាជបូព៌ នៃខេត្តសៀមរាប បន្ទាប់ពីព្រះសង្ឃចម្រើនព្រះបរឹត្តធ្វើកិច្ចទៅកម្មវិធីរបស់លោកតាអាចារ្យ បានប្រារព្វធ្វើពិធីវេរប្រគេនទៀនព្រះវស្សា ទៅតាមគន្លងប្រពៃណីព្រះពុទ្ធសាសនានៃយើង ដើមី្បឧទ្ទិសកុសលផលបុណ្យដល់បុព្វការីជន សាច់សាលោកហិត កម្មាភិបាល យុទ្ធជន យុទ្ធនារី ដែលបានពលី មរណៈ ក្នុងបុព្វហេតុជាតិមាតុភូមិ ក្នុងការអភិវឌ្ឍន៍ប្រទេស ឲ្យមានការរីកចម្រើន ដែលបានចែកឋានទៅកាន់ លោកខាងមុខផងដែរ ។
សម្ភារៈបរិក្ខាដែលបានប្រគេនព្រះសង្ឃទាំង៤៥វត្តនោះ ដោយក្នុងមួយៗវត្ត ទទួលបានទៀនវស្សាធំ០១គូ, ទឹកបរិសុទ្ធ ៥កេស, អង្ករ១០០គីឡូក្រាម, មី ១កេសធំ, ទឹកក្រូច ៣កេស, ទឹកត្រី៥យួរ, ទឹកស៊ីអ៊ីវ ៥យួរ, ត្រីខ ១កេស, ទឹកដោះគោ ១កេស, ស្កសរ ៥គីឡូក្រាម, អំបិល១០គីឡូក្រាម, តែ ២,៥គីឡូក្រាម, ធូប១ដុំធំ និងបច្ច័យ ចំនួន១.៤៦៣.០០០រៀល។ ។ ម៉្យាងទៀតការប្រគេនទៀនព្រះវស្សានេះ គឺជាការប្រារឰធ្វើទៅតាមទំនៀមទំលាប់ប្រពៃណីព្រះពុទ្ធសាសនា ដែលមាននាសម័យកាលយូរលង់មកហើយ និងដើម្បីប្រគេនព្រះសង្ឃដែលគង់ចាំព្រះវស្សាក្នុងរយៈពេលមួយត្រីមាស ដែលចាប់ចូលពីថ្ងៃ១រោច ខែអាសាឍ រហូតដល់ថ្ងៃពេញបូរមី ខែអស្សុជ។
ក្នុងឱកាសនោះ ឯកឧត្តម ទៀ សីហា ក៏បានសម្តែងនូវការគោរព និងជឿជាក់ ក្នុងនាមជាពុទ្ឋសាសនិក និងបានបញ្ចាក់ថា៖ ចូលវស្សាឆ្នាំនេះ គឺស្ថិតក្នុងស្ថានភាពនៃវបត្តិកូវីដ១៩ ប្រជាពុទ្ឋបរិស័ទជិតឆ្ងាយមិនបានជួបជុំ រៀបចំប្រារព្ឋពិធីបុណ្យផ្សេងៗ តាមប្រពៃណីទំនៀមទម្លាប់សាសនានោះទេ ។ ឯកឧត្តមក៏មានប្រសាសន៍បន្ថែមទៀតថា ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន ទើបប្រទេសជាតិយើងមានការអភិវឌ្ឍន៍ រីកចម្រើននៅគ្រប់ទីកន្លែងទូទាំងប្រទេស ដូចជាផ្លូវថ្នល់ ស្ពាន ប្រឡាយទឹក សាលារៀន មន្ទីរពេទ្យ វត្តអារាមមាននៅគ្រប់ក្រុង-ស្រុក ឃុំ-សង្កាត់ ទូទាំងប្រទេសដែលផ្តល់នូវទំនុកចិត្តពីប្រជាពលរដ្ឋផងដែរ ៕
អត្ថបទ និងរូបភាព ៖ ទ្រា ពន្លឺ និង ស៊ាន សុផាត
