នៅព្រឹកថ្ងៃទី០៥ ខែកក្កដា ឆ្នាំ២០២០ដដែលនោះ ឯកឧត្តម លន់ សុធី ប្រធានក្រុមការងារថ្នាក់កណ្ដាលចុះជួយស្រុកស្រីស្នំ ខេត្តសៀមរាប និងលោកជំទាវ អមដំណើរដោយលោកអភិបាលស្រុកស្រីស្នំ និងក្រុមការក្រុមការងារថ្នាក់កណ្ដាលចុះជួយស្រុក បានចុះពិនិត្យការដ្ឋានសាងសង់ព្រះវិហារមួយ ស្ថិតក្នុងវត្តសុវណ្ណគិរីកេសរធ្លក ក្នុងភូមិធ្លក ឃុំស្លែងស្ពាន ស្រុកស្រីស្នំ ខេត្តសៀមរាប។
ឯកឧត្តម លន់ សុធី ប្រធានក្រុមការងារ បានមានប្រសាសន៍ថា ទីអារាមនេះ នៅតំបន់ដាច់ស្រយាលមានសុភាពចាស់ទ្រុឌទ្រមហើយពុំសូវមានការអភិវឌ្ឍឱ្យមានការរីកចម្រើនដូចទីអារាមដទៃ ដូចនេះទើបឯកឧត្តមមានការផ្ដួចផ្ដើមគំនិត គៀងគរប្រមូលថវិកាយកមកធ្វើការសាងសង់ ដើម្បីបំរើប្រយោជន៍វិស័យសាសនា ពុទ្ធបរិស័ទមនិងសាធារណៈជននៅក្នុងឃុំស្លែងនេះ ។ ម្យ៉ាងទៀតទីអារាម គឺជាកន្លែងដែលព្រះសង្ឃ និងពុទ្ធបរិស័ទប្រតិបត្តិសាសនាទៅតាមគន្លងប្រពៃណីទំនៀមទំលាប់ដែលជាសាសនារបស់រដ្ឋ សម្រាប់ជនគ្រប់រូបបានបដិបត្តិ និងសិក្សារៀនសូត្រពីសំណាក់ប្រជាពលរដ្ឋទូទៅផងដែរ ។
តាមការឲ្យដឹងពីគណៈកម្មការវត្ត ព្រះវិហារមួយនេះ ចាប់ផ្ដើមសាងសង់កាលពីខែមករា ឆ្នាំ២០២០ ក្រោមគំនិតផ្ដួចផ្ដើម និងថវិកាផ្ទាល់របស់ ឯកឧត្តម លន់ សុធី និងការគៀងគរថវិកាពីសប្បុរសជន រួម និងថវិកាបានពីពិធីបុណ្យកឋិនទានផងដែរ។ គិតមកដល់ពេលនេះ ព្រះវិហារមួយនេះ សាងសង់បាន៤៥ភាគរយហើយ តាមការប៉ាន់ស្មានរបស់ក្រុមជាងម៉ៅការសាសង់ ប្រសិនបើពុំមានការខ្វះខាតថវិកាក្នុងសាងសង់ ឬឧបសគ្គអ្វីនោះទេ ការសាងសង់ព្រះវិហារនេះអាចនឹងរួចរាល់នៅក្នុងឆ្នាំ២០២៣ ខាងមុខ ។
ជាមួយគ្នានោះ ឯកឧត្តម ក៏បានអំពាវនាវដល់សប្បុរសជន សាធារណ:ជនទាំងអស់មានការចូលរួមទាំងកម្លាំងកាយ កម្លាំងចិត្ត និងថវិកា ដើម្បីសាងសង់ឱ្យរួចរាល់ជាស្ថាពរ ទុកជាប្រយោជន៍សាធារណៈជូនកូនចៅជំនាន់ក្រោយបានប្រើប្រាស់ និងជាការចូលរួមអភិវឌ្ឍន៍ជាមួយរាជរដ្ឋាភិបាលដែលមានសម្ដេចតេជោ ហ៊ុន សែន ជានាយករដ្ឋមន្ត្រី ។
អត្ថបទ និងរូបភាព៖ មន្ទីរព័ត៌មានខេត្តសៀមរាប
