កូនឈើចម្រុះរួមមាន ប្រភេទកូនដើមក្ងោក , ដើមលឿងរាជ , ដើមឥន្ទនេល , ដើមរាំង និង ដើមឈើទាល ចំនួន៥ពាន់៥០០ដើម ដែលទទួលបានការជួយឧបត្ថម្ភពីអាជ្ញាធរជាតិអប្សរា និងរដ្ឋបាលព្រៃឈើក្រឡាញ់ ត្រូវបានរដ្ឋបាលស្រុកក្រឡាញ់ រៀបចំដាំតាមដងផ្លូវសំខាន់ៗក្នុងស្រុក ចំនួន៤គោលដៅ សរុបប្រវែងផ្លូវទាំងអស់ជាង២០គីឡូម៉ែត្រ នាព្រឹកថ្ងៃទី១៣ខែកក្កដាឆ្នាំ២០២០ តាមរយៈការបើកយុទ្ឋនាការ ដាំដើមឈើចំនួន៥៥០០ដើម ក្រោមប្រធានបទ « ក្រឡាញ់ស្រុកខ្ញុំពណ៌បៃតង » ដោយមានការចូលរួមពីសំណាក់លោក លោកស្រី ជាអភិបាលនៃគណៈអភិបាលស្រុក , មន្ត្រីរដ្ឋបាលសាលាស្រុក , អាជ្ញាធរភូមិឃុំ កងកម្លាំងប្រដាប់អាវុធទាំងបីប្រភេទ , លោកគ្រូអ្នកគ្រូ , សិស្សានុសិស្ស , សហភាពយុវជនកម្ពុជាស្រុក , យុវជនកាកបាទក្រហមយុវជនកាយរិទ្ឋ និងបងប្អូនប្រជាពលរដ្ឋ សរុបចំនួន១.២០០នាក់ ។
លោកស្រី ម៉ននី រង្សី អភិបាលស្រុកក្រឡាញ់ មានប្រសាសន៍ថា យុទ្ឋនាការដាំកូនឈើនេះ ជាយុទ្ឋនាការលើកដំបូង អាចនិយាយបានថាជាដំណាក់កាលទី១ ដែលរដ្ឋបាលស្រុកបានរៀបចំឡើងដើម្បីដាំឈើនៅតាមដងផ្លូវចំនួន៤ខ្សែ និងដាំព្រៃលិចទឹកនៅឃុំស្រណាលនិងឃុំសំបួរ ហើយសម្រាប់ដំណាក់កាលទី២ នឹងធ្វើឡើងនៅឆ្នាំ២០២១ ដែលនឹងដាំតាមព្រំប្រទល់ជុំវិញស្រុក និងដំណាក់កាលទី៣នឹងរៀបចំនៅឆ្នាំ២០២២ដែល នឹងដាំតាមដងផ្លូវក្នុងឃុំទាំង១០ព្រមទាំងព្រៃលិចទឹកនៃស្រុកក្រឡាញ់ផងដែរ ។
លោកស្រី អភិបាលស្រុក មានប្រសាសន៍ទៀតថា ព្រៃឈើមានតួនាទីសំខាន់ណាស់ ក្នុងការជួយថែរក្សាដំណើរការប្រព័ន្ធអេកូឡូស៊ី និង ជួយកាត់បន្ថយឥទ្ធិពលអវិជ្ជមាន នៃការប្រែប្រួលអាកាសធាតុ ដូចជាទឹកជំនន់ ខ្យល់ព្យុះ និងស្រូបយកឧស្ម័នកាបូនិចពីបរិយាកាស ហើយដើមឈើនេះ ជាសម្បត្តិធម្មជាតិដ៏មានតម្លៃបំផុត ជាអាយុជីវិតមនុស្ស សត្វ ដែលបានផ្តល់នូវពហុប្រយោជន៍ មិនអាចប៉ាន់ប្រមាណបានដល់មនុស្សជាតិ មានតម្លៃខាងសេដ្ឋកិច្ច និង សង្គមជាតិ ជាពិសេសជួយរក្សានូវលំនឹងបរិស្ថានធម្មជាតិ ធ្វើឲ្យធាតុអាកាសមានភាពកាន់តែល្អប្រសើរ រក្សានិយ័តភាពប្រភពទឹក ការពារទីជម្រាល និង ជីវចម្រុះ សំខាន់ទៀតនោះព្រៃឈើមានការទំនាក់ទំនងច្រើនទៅនឹងវិស័យកសិកម្ម ។
តាមរយៈការបើកយុទ្ឋនាការ ដាំដើមឈើចំនួន៥៥០០ដើមនាថ្ងៃនេះ លោកស្រី ម៉ននី រង្សី បានសំណូមពរដល់អាជ្ញាធរមូលដ្ឋាន , កងកម្លាំងប្រដាប់អាវុធ , មន្ត្រីរាជការ , សិស្សានុសិស្ស និង ប្រជាពលរដ្ឋទាំងអស់ ត្រូវចូលរួមថែទាំកូនឈើដែលបានដាំហើយនាពេលនេះ ព្រោះថា នៅក្នុងរយៈពេលពី៤ទៅ៥ឆ្នាំខាងមុខទៀត សង្ឃឹមថា តាមដងផ្លូវនៃស្រុកក្រឡាញ់ពេញទៅដោយដើឈើ នឹងទទួលបានពណ៌បៃតងស្រស់ ដែលគេហៅថារុក្ខវិថី អមទៅដោយរុក្ខជាតិចម្រុះពណ៌ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
