លោក សេង លន នាយសង្កាត់រដ្ឋបាលព្រៃឈើកន្ទួតខ្នារក្រៅ បានឲ្យដឹងថា ផ្កាចំហួយ ឬអ្នកខ្លះហៅថាផ្កាចាហួយ គឺជាផ្កាមួយប្រភេទដែលមានពណ៌ផ្កាឈូក ស៊ីជម្ពូរស្រស់ស្អាត ដុះនៅក្នុងព្រៃដែលមនុស្សភាគច្រើនបានស្គាល់ ដូច្នេះក្នុងឱកាសនេះ សូមអំពាវនាវដល់ប្រជាពលរដ្ឋដែលនិយមទស្សនាផ្កាព្រៃ សូមមកទស្សនាផ្កាចំហួយ ខណៈបច្ចុប្បន្ននេះ ផ្កាប្រភេទនេះ កំពុងចាប់ផ្តើមរីកស្រស់បំព្រងពាសពេញដីប្រកបដោយភាពស្រស់ស្អាត អមដោយទេសភាពជុំវិញធម្មជាតិខៀវស្រងាត់ធ្វើឱ្យអារម្មណ៍របស់យើងមានភាពស្រស់ស្រាយប្លែកតែម្តងនៅពេលបានទស្សនា នៅក្នុងដីព្រៃនៃចម្ការពូជឈើគ្រញូង ស្ថិតនៅភូមិត្រពាំងថ្ម ឃុំឃុនរាម ស្រុកបន្ទាយស្រី ខេត្តសៀមរាប ដែលមានចម្ងាយប្រមាណ៦០គីឡូម៉ែត្រពីទីរួមខេត្តសៀមរាប ។
លោក សេង លន បានឲ្យដឹងទៀតថា ជារៀងរាល់ឆ្នាំឱ្យតែដល់ខែផ្កាចំហួយនេះរីក អ្នកទេសចរតែងតែនាំគ្នាមកកម្សាន្តសប្បាយ ប៉ុន្តែសម្រាប់ឆ្នាំនេះ មិនទាន់មានអ្នកទេសចរមកកម្សាន្តច្រើននៅឡើយទេ ដោយសារតែបញ្ហាមេរោគឆ្លងកូវីដ១៩ ដូច្នេះ ចាប់ពីពេលនេះរហូតដល់ចុងខែសីហា ឬដើមខែកញ្ញា អ្នកទេសចរអាចមកទស្សនាផ្កាចំហួយនៅក្នុងចម្កាពូជឈើគ្រញូងនេះបានហើយ ដោយគ្រាន់ធ្វើដំណើរទៅដល់ចម្ការពូជឈើគ្រញូង ហើយទុករថយន្តនៅទីនោះ និងបន្តដំណើរតាមកង់ ឬគោយន្តបន្តប្រមាណជា២គីឡូម៉ែត្រ នឹងទៅដល់វាលផ្កាចំហួយដ៏ស្រស់ស្អាត ហើយផ្កាចំហួយនេះ ក្រៅពីជាផ្កាដ៏ស្រស់ស្អាតនោះ ផ្កានេះ អាចយកវាធ្វើជាអន្លក់ និង កែឆ្នៃធ្វើម្សៅសម្រាប់ទទួលទានផងដែរ ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
