នៅក្នុងស្ថានភាពសេដ្ឋកិច្ចបច្ចុប្បន្ន វិស័យកសិកម្មនៅកម្ពុជា មានសក្តានុពលខ្ពស់ ក្នុងការទ្រទ្រង់ជីវភាពរស់នៅរបស់ប្រជាជន បើយោងតាមរបាយការណ៍របស់រដ្ឋបាលខេត្តសៀមរាប វិស័យកសិកម្មនៅក្នុងរដូវវស្សាឆ្នាំ២០២០នេះ អនុវត្តបានជាង៩៩ភាគរយ នៃផែនការ នេះបើតាមប្រសាសន៍ ឯកឧត្តម ឡូយ សុផាត ប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក ដែលជាគណៈកម្មការទី៣ នៃរដ្ឋសភា ក្នុងកិច្ចប្រជុំការងារត្រួតពិនិត្យអំពីវឌ្ឍនភាពលើវិស័យសំខាន់ៗមួយចំនួន ជាមួយរដ្ឋបាលខេត្តសៀមរាប នាព្រឹកថ្ងៃទី២៩ ខែកក្កដា ឆ្នាំ២០២០ នៅសាលាខេត្តសៀមរាប ។
ឯកឧត្តម ប្រធានគណៈកម្មការ លើកឡើងថា បើទោះជាខេត្តសៀមរាប ត្រូវពឹងផ្អែកជាចំបងទៅលើវិស័យទេសចរណ៍ ក៏ប៉ុន្តែវិស័យកសិកម្មបានងើបឈរឡើង សម្រាប់ការរក្សាលំនឹងជីវភាពប្រជាជន ពិសេសគឺក្នុងស្ថានភាពនៃការរងផលប៉ះពាល់ដោយវិបត្តិកូវីត១៩។ លើសពីនេះខេត្តមួយនេះ ក៏មានលទ្ធភាពនាំចេញស្រូវអង្ករ ទៅកាន់ទីផ្សារក្រៅប្រទេសផងដែរ។ រាជរដ្ឋាភិបាលកម្ពុជា ក្រោមការដឹកនាំដោយសម្តេចតេជោ ហ៊ុន សែន បានដាក់ចេញនូវយុទ្ធសាស្រ្តសំខាន់ៗ និងមានប្រសិទ្ធភាព ដើម្បីឆ្លើយតបទៅនឹងស្ថានភាពនៃវិបត្តិកូវីត១៩ និងកំពុងធ្វើឲ្យពេលវេលានេះ បានក្លាយជាកាលានុវត្តន៍ សម្រាប់ពង្រឹង និងពង្រីកវិស័យកសិកម្ម ដើម្បីទ្រទ្រង់សេដ្ឋកិច្ចទីផ្សារ និងជីវភាពប្រជាជន។ ទន្ទឹមនោះ គោលនយោបាយជំនួយសង្គម ការផ្តល់បណ្ណក្រីក្រដល់ប្រជាពលរដ្ឋក្រីក្រ ពិសេសប្រជាពលរដ្ឋក្រីក្រ ដែលរងផល់ប៉ះពាល់ដោយសារវិបត្តិជំងឺកូវីដ១៩ កម្មករ និយោជិត គឺជាការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ដើម្បីដោះស្រាយបញ្ហាប្រឈមនៃវិបត្តិជាសកលនេះ។
ថ្លែងក្នុងកិច្ចប្រជុំនេះ ឯកឧត្តម ទៀ សីហា អភិបាលខេត្តសៀមរាប បង្ហាញថា គិតត្រឹមឆមាសទី១ ឆ្នាំ២០២០នេះ វិស័យទេសចរណ៍ ក្នុងខេត្តសៀមរាបថយចុះជិត ៦៩ភាគរយ ឬស្មើនឹងជិត៤សែននាក់ បើធៀបនឹងរយៈពេលដូចគ្នាក្នុងឆ្នាំ២០១៩ ខេត្តមួយនេះទទួលបានភ្ញៀវទេសចរ សរុបជាង ១លាន ២សែននាក់។
ឯកឧត្តម អភិបាលខេត្ត ក៏បានបញ្ជាក់ផងដែរថា អនុវត្តន៍តាមយុទ្ធសាស្រ្តឆ្លើយតបទៅនឹងវិបត្តិជំងឺកូវីដ១៩ របស់រាជរដ្ឋាភិបាល រដ្ឋបាលខេត្ត បានចុះផ្សព្វផ្សាយ និងជំរុញការចិញ្ចឹមសត្វ ការដាំដុះដំណាំរួមផ្សំ រួមនិងកិច្ចសហការជាមួយកម្មវិធីលើកកម្ពស់ជីវភាពប្រជាពលរដ្ឋ របស់ក្រសួងកសិកម្ម និងអង្គការក្រៅរដ្ឋាភិបាលនានា។ ទន្ទឹមនោះ រដ្ឋបាលខេត្ត បាននិងកំពុងរៀបចំកែលម្អសោភណ្ឌភាព និងហេដ្ឋារចនាសម្ព័ន្ធក្នុងក្រុង រួមមានផ្លូវថ្នល់ អគ្គិសនី ប្រព័ន្ធទឹកស្អាត ភ្លើងបំភ្លឺសាធារណៈ ប្រព័ន្ធទឹកសម្អុយ ព្រមទាំងការងារពង្រឹងសន្តិសុខសុវត្ថិភាពសណ្តាប់ធ្នាប់សាធារណៈ និងការកែលម្អនៅតាមតំបន់រមណីយដ្ឋាននានាផងដែរ ដើម្បីទាក់ទាញភ្ញៀវទេសចរ បន្ទាប់ពីវិបត្តិជំងឺកូវីដ១៩ បានធូរស្រាល ឬបញ្ចប់។
អត្ថបទ និង រូបភាព ៖ លោក យូ វង្ស និង លោក ងិន គឹមឡេង
កែសម្រួលអត្ថបទ : លោក សេង ផល្លី
